Wonembewa na Maliko 11:1-33
11 Iwo padasala pang’ono kufika ku Yerusalemu, ku Betefage na ku Betaniya pa Phiri ya Maolivi, Yesu adatumiza wopfunzira wake awiri.
2 Iye adawauza kuti: “Yendani m’muyi womwe munkuuwona ule, ndipo mukandongena mumo mukagumane bulu mng’ono mwamuna ali mangirire, yemwe munthu akanati kupakirako kuyambira kalekale. Mukamumasule nkubwera naye kuno.
3 Munthu akakakubvunzani kuti: ‘Ndawa chani munkumumasula?’ Mukanene kuti: ‘Ambuya ankumufuna, ndipo akandomaliza kumuphatisa basa adzamubweze kuno nthawe mweyoletu.’”
4 Pamwapo iwo adanyamuka ndipo adamugumanadi bulu mwamuna ali mangiririwe pamuyi, m’mphepete mwa nsewu ung’ono. Ndipo iwo adamumasula bulu moyu.
5 Koma anango mwa wanthu womwe enze adaimirira pafupi na mwapo adawabvunza kuti: “Pamunkumasula bulu moyu, mufuna muchite naye tani?”
6 Iwo adawauza vomwe Yesu adanena ndipo adawabvumiza kuti ayende.
7 Wanthu mwawo adabweresa bulu ule kwa Yesu. Patsogolo pake adayanza malaya yawo yakunja pansana pa bulu muyo ndipo iye adakwerapo.
8 Komasoti wanthu azinji adayanza malaya yawo yakunja munsewu, koma anango adagwata masamba m’maminda.
9 Pamwapo womwe enze patsogolo na omwe angabwera m’mambuyo angakuwa kuti: “M’pulumuseni! Wodalisiwa ni yemwe ankubwera mu dzina ya Yahova!*
10 Wodalisiwa ni Ufumu womwe unkubwera wa ababa wathu Davide! Mupulumuseni kudzuludzulu uko!”
11 Iye adangena mu Yerusalemu nkufika mu kachisi. Pamwapo adanyang’ananyang’ana vinthu vose, koma pakuti nthawe yenze idamala kale, adayenda ku Betaniya pabodzi na wopfunzira wake 12 wale.
12 Mangwana yake, pambachoka ku Betaniya, adabva njala.
13 Na patali adawona muti wa nkuyu womwe wenze na masamba. Iye adayenda pamwapo kuti awone peno angagumanepo kanthu. Koma padafika pa muti moyu, alibe kugumanapo chirichose koma masamba yokha basi, ndawa yenzelini nthawe ya nkhuyu.
14 Pamwapo iye adauza muti muyo kuti: “Munthu adzadyelini pomwe vipaso vako mpakana kalekale.” Ndipo wopfunzira wake ambabvesera.
15 Manje iwo adafika ku Yerusalemu. Kumuko adangena mu kachisi nkuyamba kuthamangisa wanthu womwe angagulisa na kugula vinthu mukachisi mumo, ndipo adagwesa mameza ya wanthu womwe angachinja kobiri na kugwesa pomwe mipando ya wanthu womwe angagulisa nkhangaiwa.
16 Iye alibe kubvuma kuti munthu aliyese yemwe watakula katundu agwate na mukachisi.
17 Iye angapfunzisa ndipo ambawauza kuti: “Ko si pale Malemba yanena kuti: ‘Nyumba yangu idzachemerewe nyumba yopemphereramo wanthu wa makhaindi yose’? Koma imwepo mwaisandusa mphako ya vigananga.”
18 Antsembe akulu na alembi adabva vimwevo, ndipo adayamba kufagafaga njira yakuti amuphere ndawa ambamugopa pakuwona kuti gulu yose ya wanthu imbadabwa na vomwe angapfunzisa.
19 Kum’maulo kwa ntsiku mwiyo, iwo adabula mu thaundi mwiyo.
20 Koma machibesebese pangagwata, adawona kuti muti wa nkuyu ule wafota kale na mizu yake.
21 Pamwapo Petulo adamukumbukira muti ule ndipo adalewa kuti: “Mpfunzisi, onani! Muti wa nkuyu uyu womwe mudautemberera ule wafota.”
22 Yesu adawadawira kuti: “Mumbakhulupirire Mulungu.
23 Shuwa ninkukuuzani kuti aliyese wouza phiri iyi kuti: ‘Choka pano ukadzithuse mu nyanja,’ ndipo ankukaikiralini muntima mwake koma anachikhulupiriro chakuti vomwe wanena vichitikedi, vidzakhaledi teno.
24 Ndipomwapa ninkukuuzani kuti, vinthu vose vomwe munkukumbira na kuvipempherera, mumbakhulupirire kuti mwavitambira kale ndipo mudzavitambiredi.
25 Ndipo mukaimirira nkumbapemphera, mumbakhululuke chilichose chomwe munango adakuphonyerani kuti Ababa wanu wakudzulu akukhululukirenimbo machimo yanu.”
26 * ——
27 Patsogolo pake adafika pomwe ku Yerusalemu. Ndipo pangafamba mu kachisi, antsembe akulu, alembi na akulu adabwera
28 nkumubvunza kuti: “Ko munaulamuliro wochitira vinthu vimwevi? Panango ni mbani yemwe adakupasani ulamuliro moyu?”
29 Yesu adawadawira kuti: “Inembo nikubvunzeni mbvunzo m’bodzi. Munidawire, ndipo inembo nikuuzeni yemwe adanipasa ulamuliro womwe nichitira vinthu vimwevi.
30 Ko ubatizo womwe Yohani ambachita udachokera kudzulu panango kwa wanthu? Nidawireni.”
31 Pamwapo iwo adayamba kukambirana kuti: “Tikanena kuti: ‘Udachokera kudzulu,’ iye atibvunze kuti: ‘Manje ndawa chani mulibe kumukhulupirira?’
32 Koma ko tingalewe kuti: ‘Udachokera kwa wanthu’?” Iwo ambagopa gulu ya wanthu, ndawa wanthu wose mwawa ambakhulupirira kuti Yohani wenzedi mneneri.
33 Pamwapo adamudawira Yesu kuti: “Tinkudziwalini.” Yesu adawauza kuti: “Inembo nikuuzenilini yemwe adanipasa ulamuliro womwe nichitira vinthu vimwevi.”
