Wonembewa na Maliko 12:1-44
12 Patsogolo pake adayamba kuyankhula nawo pakuphatisa basa vitsanzo kuti: “Munthu munango adalima munda wake wa uva nkumanga mpanda kuzungulira munda muyo. Komasoti adakumba dindi yoponderamo uva nkumanga ntsanja.* Padateno adausiya m’manja mwa alimi nkuyenda kudziko inango.
2 Manje nthawe ya vipaso paidakwana, adatumiza kapolo wake kwa alimi mwawo kuti akamupaseko vipaso vinango pa vipaso va m’munda wa uva muyo.
3 Koma iwo adamuphata nkumumenya ndipo adamubweza alibe chinthu.
4 Iye adatumiza pomwe munango kwa iwo, koma moyu adamutema mumsolo komasoti kumuchitira vinthu voipa.
5 Adatumiza pomwe munango, koma moyu adamupha. Pamwapo adatumiza pomwe akapolo anango azinji. Anango adawamenya ndipo anango adawapha.
6 Iye adasala na munthu m’bodzi yekha kuti amutumize, mwana wake wapamoyo. Mwapo adamutumizadi nkunena kuti: ‘Mwana wangu yekha uyu akamulemekeze.’
7 Koma alimi mwawo adayamba kukambirana kuti: ‘Yaa! Muyu ndiye wati adzatambire chuma cha banja. Bwerani, naboni timuphe ndipo chuma chimwicho chidzakhale chathu.’
8 Pamwapo adamuphata nkumupha ndipo adamubulisa m’munda wa uva muyo.
9 Ko munichiro wa munda moyu adzachite chani? Iye adzabwere nkupha alimi mwawo ndipo munda wa uva muyo adzaupereke kwa anango.
10 Ko mulibe kuwerengako vomwe lemba inena? Pale inena kuti: ‘Mwala womwe womanga nyumba adaulamba wakhala mwala* wapakhona wofunika maninge.
11 Umoyu wachokera kwa Yahova* ndipo ni wodabwisa m’maso mwathu.’”
12 Padabva vimwevo angafuna kumuphata.* Koma adagopa gulu ya wanthu, ndawa iwo adadziwa kuti iye adanena chitsanzo mwicho ankuganizira iwo. Ndipomwapa adandomusiya nkuchokapo.
13 Patsogolo pake adamutumizira Afalisi anango na wanthu womwe angatewera Herode kuti akamutape nkamwa.
14 Padafika, iwo adamuuza kuti: ‘Mpfunzisi, tikudziwa kuti imwepo munamalini ndipo muchitalini vinthu pakundofuna kukondweresa munthu, ndawa munyang’analini mawonekedwe ya wanthu koma muwauza chaivo* wanthu mukambawapfunzisa va Mulungu. Ko ni vobvumizika kupereka mtsonkho kwa Kaisara panango neye?
15 Ko timbapereke panango osati timbapereke? Yesu adazindikira kuti ankumuyesa nzeru ndipo adawabvunza kuti: “Ndawa chani munkuniyesa? Bweresani kobiri ya dinari kuno niwone.”
16 Iwo adamubweresera ndipo adawabvunza kuti: “Ko nkhope iyi na mawu vili pamwapa ni vambani?” Iwo adamudawira kuti: “Ni va Kaisara.”
17 Pamwapo Yesu adanena kuti: “Perekani vinthu va Kaisara kwa Kaisara, koma va Mulungu kwa Mulungu.” Ndipo iwo adadabwa naye maninge.
18 Patsogolo pake Asaduki womwe ambanena kuti wakufa adzamukisiwelini, adabwera nkumubvunza kuti:
19 “Mpfunzisi, Mose adatinembera kuti peno mwamuna wamwalira nkumusiya nkazi koma alibe kusiya mwana, m’bale wake afunika kutenga nkazi wamasiye muyo nkubalira wana m’bale wake ule.
20 Manje penze amuna 7 wa pachibale. Woyamba adalowola nkazi, koma adamwalira alibe wana.
21 Wachiwiri adalowola nkazi muyo koma nayembo adamwalira ne kusiya mwana. Vidachitika pomwe chibodzibodzi kwa wachitatu.
22 Ndipo wose 7 wale alibe kusiya mwana. Pamapeto pake nkazi ule adamwalirambo.
23 Ko pamwapa akufa akadzamukisiwa, nkazi moyu adzakhale wambani? Pakuti wose 7 adamulowola.”
24 Yesu adawadawira kuti: “Munkuphonyesa. Munkuphonyesa tene ndawa yakuti munkudziwalini Malemba panango mphanvu ya Mulungu, ntenolini?
25 Ndawa akufa akadzamukisiwa, amuna adzalowolelini, ndipo akazi adzalowodwelini, koma adzakhale ninge angelo wakudzulu.
26 Koma pa mpfundo yakuti wakufa amukisiwa, ko imwepo mulibe kuwerenga m’bukhu ya Mose, mu nkhani yolewa va chitsamba cha minga, kuti Mulungu adamuuza kuti: ‘Ine ndine Mulungu wa Abulahamu, Mulungu wa Isaki na Mulungu wa Yakobo’?
27 Iye ni Mulungu wa wanthu wamoyo, osati wakufa. Munkuphonyesa maninge wanthu imwe.”
28 Mulembi m’bodzi yemwe adafika nkuwabva ankutsutsana, adadziwa kuti adawadawira bwino. Pamwapo adabvunza Yesu kuti: “Ko lamulo yoyamba* ni iponi pa malamulo yose?”
29 Yesu adadawira kuti: “Yoyamba ni yakuti: ‘Bveserani Aizirayeli imwe, Yahova* Mulungu wathu ni Yahova* m’bodzi.
30 Mumbakonde Yahova* Mulungu wanu na ntima wanu wose, moyo wanu wose, maganizo yanu yose na mphanvu zanu zose.’
31 Yachiwiri ni iyi: ‘Umbakonde munzako ninge momwe udzikondera wekha.’ Palibe lamulo inango ikulu kuposha mwaya.”
32 Mulembi muyo adanena kuti: “Mpfunzisi, mwanena bwino mobverana na chonadi, ‘Iye ni M’bodzi ndipo palibe soti Mulungu munango kupatulapo iye.’
33 Ndipo kukonda Mulungu na ntima wose, maganizo yose, mphanvu zose komasoti kukonda munzako ninge momwe udzikondera wekha, ni vofunika maninge kuposha ntsembe zose zoshoka zantero na ntsembe zinango.”
34 Yesu padazindikira kuti mulembi muyo wadawira mwanzeru, adamuuza kuti: “Iwepo ulilini kutali na Ufumu wa Mulungu.” Koma palibe adachita chikanga kuti amubvunze pomwe.
35 Koma pomwe Yesu angapfunzisa mu kachisi adanena kuti: “Ndawa chani alembi anena kuti Khrisitu ni mwana wa Davide?
36 Mothandiziwa na mzimu uchena, Davide moyu adanena kuti: ‘Yahova* adauza Ambuya wangu kuti: “Khala ku djanja yangu ya makulu mpakana nidzaikhe azondi wako pasi pa mapazi yako.”’
37 Davide muyo adamuchemera kuti Ambuya, manje vingakwanisike tani kuti akhale mwana wake?”
Ndipo gulu ikulu ya wanthu ingamubvesera mokondwa.
38 Pakupfunzisa, Yesu adalewa pomwe kuti: “Chenjerani na alembi womwe akonda kufambafamba ali vale mikhanjo komasoti akonda kumonisiwa m’mabazali.
39 Akondasoti kukhala m’mipando yakutsogolo m’masunagoge na m’malo yolemekezeka* maninge pa chakudya cha maulo.
40 Iwo atengera chuma* akazi wamasiye, ndipo achita mapemphero yataliyatali pakufuna kudziwonesera. Wanthu mwawa adzatambire chilango chowawa* maninge.”
41 Pamwapo adakhala pasi pamalo yomwe ambakwanisa kuwona moponyamo vopereka ndipo adayamba kuwona momwe gulu ya wanthu ingaponyera kobiri moponyera vopereka mumo. Adawona wanthu azinji wolemera ankuponyamo kobiri zizinji.
42 Pamwapo padafika nkazi wamasiye wosauka ndipo adaponyamo tukobiri tuwiri tung’onotung’ono, tochepa mphanvu maninge.
43 Pamwapo Yesu adachemera wopfunzira wake nkuwauza kuti: “Shuwa ninkukuuzani kuti nkazi wamasiye wosauka uyu waponya zizinji kuposha anango wose womwe aponya kobiri moponyeramo vopereka.
44 Viriteno ndawa wose mwawa aponya zomwe atapa pa zizinji zomwe alinazo, koma mayi uyu mu umphawi wake waponya zose zomwe wenze nazo, inde zose zomwe zidakamuthandiza pa moyo wake.”
Mawu ya m’nyantsi
^ Panango kuti: “dala”
^ Panango kuti: “ukulu.”
^ Onani matanthauzo ya mawu yanango.
^ Panango kuti: “kumumanga.”
^ Panango kuti: “vabwino.”
^ Panango kuti: “yofunika maninge.”
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “yabwino.”
^ Panango kuti: “nyumba.”
^ Panango kuti: “chikulu.”
