Wonembewa na Maliko 13:1-37
13 Yesu pambabula mu kachisi, m’bodzi mwa wopfunzira wake adamuuza kuti: “Mpfunzisi, wonani momwe minyala na nyumba izi vinkuwonekera vokhuza!”
2 Koma Yesu adamuuza kuti: “Ko waziwona nyumba zapadzulu mwezi? Pano padzasalelini mwala uliwose padzulu pa unzake womwe udzagwesewelini.”
3 Padakhala pasi m’phiri ya Maolivi, kachisi ankuwonekera bwino, Petulo, Yakobo, Yohani na Andireya adamubvunza ali paokha kuti:
4 “Tiuzeni, nilini pati vidzachitike vinthu vose vimwevi, ndipo chizindikiro chowonesa kuti vinthu vose vimwevi vinkufika kumapeto ni chani?”
5 Pamwapo Yesu adayamba kuwauza kuti: “Samalani kuti munthu osati akusokereseni.
6 Azinji adzabwere mudzina yangu nkunena kuti: ‘Khrisitu ule ndinepano,’ ndipo adzasokerese wanthu azinji.
7 Komasoti mukadzabva zungo ya nkhondo na mbiri za nkhondo, ayi kudzachita mantha. Vimwevi vifunika kuchitika, koma mapeto yadzakhale yakanati yafika.
8 “Ntundu udzaukirane na ntundu unango ndipo ufumu udzaukirane na ufumu unango. Kudzakhale vivomezi m’malo yosiyanasiyana ndipo kudzakhale pomwe njala. Kumoku kudzakhale kuyamba kwa mabvuto yakulu.
9 “Koma imwepo khalani wochenjera. Wanthu adzakuyendeseni kumatiribunali yang’onoyang’ono, ndipo adzakukwapuleni m’masunagoge nkukuimiririsani pamaso pa magovernador na mafumu ndawa yakuti ndimwe ateweri wangu kuti iwo apfunzire va ine.
10 Komasoti ntontholo wabwino ufunika kuyamba walalikiriwa kwa wanthu wa makhaindi yose.
11 Koma pomwe ankuyenda namwe kukakuperekani, ayi kufulumiza kukhala na nkhawa kuti mukanene chani. Vomwe mukauziwe panthawe mweyo, mukanene mwivo ndawa woyankhula ndimwelini, koma mzimu uchena.
12 Komasoti munthu adzapereke m’bale wake kuti aphewe ndipo baba adzapereke mwana wake. Wana adzasatukire azibereki wawo ndipo adzawaphese.
13 Ndipo wanthu wose adzazondane namwe ndawa ya dzina yangu. Koma yemwe adzapirire mpakana kumapeto ndiye wati adzapulumuke.
14 “Koma mukadzawona chinthu choipa chodzonga chiri imirire pamalo yomwe chifunikalini kuima (wowerenga adzadziwiretu), pamwapo omwe ali mu Yudeya adzayambe kuthawira kumapiri.
15 Munthu yemwe ali padenga ya nyumba, osati adzabuluke panango kungena nkati kukatenga chirichose m’nyumba mwake mumo.
16 Ndipo munthu yemwe ali m’munda, osati adzabwerere ku vinthu vomwe wavisiya m’mambuyo nkukatenga malaya yake yakunja.
17 Tsoka kwa akazi wa mimba na woyamwisa wana mu ntsiku zimwezo!
18 Pitirizani kupemphera kuti osati vidzachitike mu nthawe ya mphepo.
19 Ndawa ntsiku zimwezo zidzakhale ntsiku za chisautso chomwe chikanati kuchitikako kundochokera pa nthawe yomwe Mulungu adayamba kulenga vinthu mpakana pa nthawe mwiyo ndipo chidzachitikelini pomwe.
20 Shuwa ninkukuuzani, sembe Yahova* alibe kufupikisa ntsiku zimwezo, palibe adakapulumuka. Koma ndawa ya wale womwe adawasankhula, iye wafupikisa ntsiku zimwezi.
21 “Komasoti pa nthawe mweyo, munthu akadzakuuzani kuti: ‘Onani! Khrisitu ule ali kuno, panango kuti: ‘Onani! Ali uko,’ ayi kudzakhulupirira vimwevo.
22 Ndawa kudzabwere wanthu wonamizira kuti ni Khrisitu na aneneri wabodza ndipo adzachite vizindikiro vodabwisa kuti peno nivokwanisika adzasokerese wosankhuliwa mwawo.
23 Ndipomwapa, imwepo khalani wochenjera. Inepano nakuuzirantuni vinthu vose.
24 “Koma ntsiku zimwezo, chisautso chimwecho chikadzandoti chamala, dzuwa idzachite mdima ndipo mwezi udzagakelini.
25 Nyenyezi zidzagwe kuchokera kudzulu ndipo mphanvu zomwe zili kudzulu zidzagunduzike.
26 Patsogolo pake, wanthu adzawone Mwana wa munthu ankubwera m’mitambo na mphanvu ikulu komasoti ulemerero.
27 Pamwapo iye adzatumize angelo ndipo adzaunganidze wosaluliwa wake kuchokera ku mphepo zinayi, kuchokera kumalekedzero ya dziko yapasi kukafika kumalekedzero ya munlengalenga.
28 “Manje pfunzirani va muti wa nkuyu kuchokera pa chitsanzo ichi: Nthawi yake itete ikaphukira nkuchita masamba, mudziwa kuti chisalo chafendera.
29 nchibodzibodzimbo imwepo, mukadzawona vinthu vimwevi vinkuchitika mudzadziwe kuti iye ali pafupi, ali pa nsuwo chaipo.
30 Shuwa ninkukuuzani kuti m’badwo moyu udzamalelini wose kufa, mpakana vinthu vose vimwevi vidzachitike.
31 Kudzulu na dziko yapasi vidzachoke, koma mawu yangu yadzakhaleko mpakana kalekale.
32 “Kulewa va ntsiku mweyo panango nthawe yake, palibe yemwe ankudziwa, olo angelo wakudzulu panango Mwana, koma Ababa wokha basi.
33 Khalani maso ndipo khalani tcheru, ndawa munkudziwalini kuti nilini pomwe nthawe yoikhiwiratu mweyi idzafike.
34 Viri ninge munthu yemwe ankuyenda kudziko inango ndipo wasiya nyumba m’manja mwa akapolo wake, aliyese pa basa yake, nkulamula gwarda wa pansuwo pa mpanda kuti ambakhale tcheru.
35 Ndipomwapa, pitirizani kukhala maso ndawa munkudziwalini nthawe yomwe munikachiro nyumba adzabwere. Mukudziwalini peno adzabwere maulo, usiku, madandakucha panango kumachibesebese,
36 kuti akadzafika mwadzidzidzi, osati adzakugumaneni munkugona.
37 Koma vomwe ninkukuuzani ivi ninkuuza wanthu wose kuti: Khalani maso.”
Mawu ya m’nyantsi
^ Onani vakumapeto A5.
