Wonembewa na Maliko 14:1-72
-
Antsembe ankupangana vakuti aphe Yesu (1, 2)
-
Yesu ankuikhiwa mafuta yonunkhira (3-9)
-
Yudasi ankupereka Yesu (10, 11)
-
Pasika womalizira (12-21)
-
Yesu adayambisa Chakudya chamaulo cha Ambuya (22-26)
-
Yesu adaneneratu kuti Petulo adzamulambe (27-31)
-
Yesu ankupemphera mu Getsemane (32-42)
-
Yesu adamangiwa (43-52)
-
Ankuboneresewa mu Tiribunali ya Sanihedirini (53-65)
-
Petulo ankulamba Yesu (66-72)
14 Manje kwenze kudasala ntsiku ziwiri kuti Pasika na Chikondwerero cha Mikate Yalibe Vofufumisa chichitike. Ndipo wantsembe akulu na alembi ambafagafaga njira yakuti aphatise basa pakuphata* Yesu mochenjera nkumupha.
2 Iwo ambanena kuti: “Osati tidzamuphatire pa phwando, kuchitira kuti wanthu angadzachite chipiringu.”
3 Pa nthawe yomwe Yesu wenze ku Betaniya mu nyumba mwa Simoni wa khate, kudafika mayi munango yemwe wenze na botolo yokonzewa na mwala wa alabasitala ya mafuta yonunkhira. Mafuta mwaya yenze nado chaiye ndipo yenze yodula maninge. Iye adafungula botolo ya alabasitala ire mwa kuchita kuphwanya, nkuyamba kuthira mafuta mwayo mu msolo mwa Yesu.
4 Wanthu anango padaona vimwevi, adayamba kubvunzana mokalipa kuti: “Ndawa chani ankudzonga mafuta yonunkhira mwaya?
5 Mafuta yonunkhira mwaya yadakagulisiwa kobiri yoposha madinari 300* ndipo kobiri zimwezo zidakaperekewa kwa wanthu wosauka!” Pamwapo iwo adaipidwa* naye maninge mayi muyo.
6 Koma Yesu adawauza kuti: “Musiyeni, ndawa chani mukumushupisa? Iye wanichitira vinthu vabwino.
7 Wosauka mwawa munawo nthawe zose, ndipo mungakwanise kuwachitira vabwino nthawe iriyose yomwe munkufuna. Koma inepano mudzakhalelini nane nthawe zose.
8 Mayi muyu wachita vomwe angakwanise. Iye waikhiratu mafuta yonunkhira pa thupi yangu pakukonzekera kuikhiwa kwangu m’manda.
9 Shuwa ninkukuuzani, kulikose komwe ntontholo wabwino udzalalikiriwe padziko yose, wanthu ambadzanene vomwe mayi muyu wachita kuti ambadzamukumbukire.”
10 Patsogolo pake Yudasi Sikariyoti, m’bodzi wa opfunzira 12 wale, adachoka nkuyenda kwa antsembe akulu kuti akapereke Yesu kwa iwo.
11 Padabva vimwevo, iwo adakondwa ndipo adamupolomisa kuti amupase kobiri za siliva. Pamwapo iye adayamba kufagafaga mpata wabwino wakuti amupereke.
12 Ntsiku yoyamba ya Chikondwerero cha Mikate Yalibe Vofufumisa, pomwe mwamwambo ambapereka ntsembe nyama ya Pasika, wopfunzira wake adamubvunza kuti: “Ko munkufuna tikakukonzereni kuponi malo yodyerako Pasika?”
13 Pamwapo Yesu adatuma awiri mwa opfunzira wake wale nkuwauza kuti: “Yendani mu thaundi ndipo mwamuna munango akagumane namwe ali senze mtsuko wa madzi. Mukamulondole,
14 ndipo m’nyumba momwe akangene, mukauze munikachiro wa nyumba mweyo kuti: ‘Mpfunzisi wanena kuti: “Ko chipinda cha alendo chiri kuponi momwe nikadyeremo Pasika pabodzi na wopfunzira wangu?”’
15 Iye akakuoneseni chipinda chikulu cha m’dzulu chokonzewa bwino. Mukatikonzere Pasika mumo.”
16 Pamwapo wopfunzira mwawo adayenda nkungena mu thaundi, ndipo vidachitikadi ndendende ninge momwe iye adawauzira. Ndipo kumuko adakonza vinthu vose vofunika pa Pasika.
17 Cha kumaulo, Yesu adafika pabodzi na wopfunzira 12 wake wale.
18 Ndipo padakhala pa meza nkumbadya chakudya, Yesu adati: “Shuwa ninkukuuzani, m’bodzi wa imwepo yemwe ankudya nane pabodzi, anipereke.”
19 Iwo adabva ntsisi ndipo adayamba kumubvunza m’bodzim’bodzi kuti: “Ko panango ndine?”
20 Iye adati: “Ni m’bodzi wa imwepo 12, yemwe ankusaiza nane pabodzi m’mbale* umu.
21 Mwana wa munthu achoke, mobverana na vomwe malemba yafotokoza pakunena va iye. Koma tsoka kwa munthu yemwe ankupereka Mwana wa munthu! Vidakakhala bwino adakati munthu moyu alibe kubadwa.”
22 Ankupitiriza kudya, iye adatenga nkate nkupemphera kwa Mulungu, patsogolo pake adaunyemanyema nkuwapasa ndipo adati: “Tengani, nkate uyu ankuimira thupi yangu.”
23 Patsogolo pake adatenga khapu ya vinyu ndipo padapemphera adaipereka kwa iwo ndipo wose adamwa.
24 Patsogolo pake adawauza kuti: “Vinyu muyu unkuimira ‘magazi yangu ya pangano,’ yomwe yadzakhesewe ndawa ya wanthu azinji.
25 Shuwa ninkukuuzani, nidzamwelini pomwe chakumwa chochokera ku uva mpakana pa ntsiku yomwe nidzamwe chinyowani mu Ufumu wa Mulungu.”
26 Pamapeto pake, padamaliza kuyimba nyimbo zotamanda Mulungu, adabula nkuyenda ku Phiri ya Maolivi.
27 Yesu adawauza kuti: “Mose imwepo muthawe nkunisiya nekha, ndawa Malemba yanena kuti: ‘Nidzaphe nyakabusa, ndipo nkhosa zidzamwazikane.’
28 Koma nikadzamuka kwa akufa, nidzatsogole kukafika ku Galileya imwepo mukanati kufikako.”
29 Koma Petulo adadawira kuti: “Podiya wose athawe nkukusiyani, ine nekha nidzakuthawenilini.”
30 Pamwapo Yesu adamudawira kuti: “Shuwa ninkukuuza iwepo lero, kuti usiku mwauno, tambala akanati kulira kawiri, unilambe katatu.”
31 Koma Petulo adapitiriza kunena kuti: “Peno nkufa, inepano nife namwe pabodzi, ningakulambenilini.” Pamwapo wose adayamba kunenambo chibodzibodzi.
32 Pamwapo wose adafika pa malo yochemerewa kuti Getsemane ndipo adauza wopfunzira mwawo kuti: “Khazikikani pasi pano, ine ninkuyenda kukapemphera.”
33 Pambayenda kumuko adatenga Petulo, Yakobo na Yohani ndipo adayamba kukwinyirira na kushupika maninge mu ntima mwake.
34 Patsogolo pake adawauza kuti: “Inepano ndine wokwinyirira maninge mpakana kufuna kufa. Khalani pampano ndipo mupitirize kukhala maso.”
35 Padayenda patsogolo pang’ono, adagwada mpakana nkhope yake pasi ndipo adayamba kupemphera kuti peno ni vokwanisika, ora mweyi imupitirire.
36 Pamwapo adati: “Abba,* Ababa, vinthu vose ni vokwanisika kwa imwepo. Nichosereni khapu iyi. Koma osati mwakufuna kwangu, koma mwakufuna kwanu.”
37 Padateno adabwerera ndipo adawagumana ankugona. Pamwapo adabvunza Petulo kuti: “Simoni, shuwadi kuti ukugona? Ko wenze ulibe mphanvu kuti upitirize kukhala maso kwa ora ibodzi?
38 Khalani maso ndipo mupitirize kupemphera kuti osati mungene m’mayesero. Shuwadi, mzimu ni wofunisisa, koma thupi ni yofoka.”
39 Padateno adachoka soti nkuyenda kukapemphera, ndipo adanena pomwe mawu yabodzibodzi mwayale.
40 Padabwerera adawagumana pomwe ankugona, ndawa vikope vawo venze vidalemera, pamwapo iwo adasowa chomudawira.
41 Adabwerera soti kachitatu nkuwauza kuti: “Shuwa nthawe ninge ino munkugona na kupumula? Basi! Nthawe yakwana! Onani Mwana wa munthu ankuperekewa m’manja mwa wanthu ochimwa.
42 Nyamukani, naboni timbayende. Onani! Wonipereka ule ali pafupi.”
43 Nthawe mweyo akalibe kumaliza kuyankhula, Yudasi m’bodzi wa wopfunzira 12 wale, adafika pabodzi na gulu ya wanthu kuchokera kwa antsembe akulu, alembi na akulu, ali takule vibemba na vimibonga.
44 Apa nkuti womupereka ule wawapasa chizindikiro chakuti: “Yemwe wati nikamubejali, ni muyoletu, mukamuphate nkuyenda naye ndipo muonesese kuti osati akuthaweni.”
45 Pamwapo Yudasi adayenda sitiriti nkukafika pomwe penze Yesu ndipo adanena kuti: “Rabi!”* Ndipo adamubejali.
46 Pamwapo iwo adamuphata nkumumanga.
47 Koma m’bodzi pa wanthu omwe enze imirire naye pafupi, adasolola chibemba nkutema nacho kapolo wa nkulu wa antsembe, mpakana kugwatiratu dzitu yake.
48 Koma Yesu adawabvunza kuti: “Ndawa chani mwabwera kudzaniphata munavibemba na vimibonga ninge kuti mukuyenda kukalimbana na chigananga?
49 Ntsiku na ntsiku nenze namwe mu kachisi nkumbapfunzisa, koma mulibe kuniphata. Koma mwevi vinkuchitika kuti Malemba yakwanirisiwe.”
50 Pavidateno wopfunzira wose adamuthawa nkumusiya yekha.
51 Koma mulumbwana munango yemwe adandofunika nguwo yabwino alibe chovala chinango nkati, ambamulondola chapafupi ndipo wanthu mwawo ambayesesa kuti amuphate.
52 Koma mulumbwana muyo adawasiyira nguwo yake ire ndipo adathawa ali pezipezi.*
53 Manje iwo adatenga Yesu nkuyenda naye kwa nkulu wa antsembe ndipo antsembe akulu komasoti akulu na alembi wose adasonkhana kumuko.
54 Koma Petulo angamulondola ali patali mpakana adafika pamuyi pa nkulu wa antsembe muyo. Petulo adakhala pasi pabodzi na anyabasa wa m’nyumba mumo nkumbawotha moto.
55 Pamwapo antsembe akulu na wanthu wa mu Tiribunali Ikulu ya Ayuda, ambafagafaga umboni wakuti anamizire Yesu mulandu na cholinga chakuti amuphe, koma alibe kuugumana.
56 Wanthu azinji ambapereka maumboni yabodza kuti amunamizire mulandu, koma maumboni yawo mwayo yangatsutsana.
57 Komasoti wanthu anango angaimilira nkumbapereka maumboni yomunamizira kuti:
58 “Ise tidamubva muyu ankunena kuti: ‘Ine nidzagwese kachisi muyu yemwe adamangiwa na manja, ndipo mu ntsiku zitatu zokha nidzamange munango osati womangiwa na manja.’”
59 Koma olo kuti ambanena vimwevi, umboni wawo wenzelini wobverana.
60 Pamwapo, nkulu wa antsembe adaimirira pakati pawo nkubvunza Yesu kuti: “Ko udawirelini? Ko unkubvalini vomwe wanthu mwawa ankukunamizira?”
61 Koma iye adandokhala chete ne kumudawira chinthu. Nthawe mwiyo nkulu wa antsembe adayamba kumubvunza soti kuti: “Ko iwepo ndiwe Khrisitu Mwana wa Wodalisiwa?”
62 Pamwapo Yesu adanena kuti: “Inde ndinedi ndipo mudzawone Mwana wa munthu ali khale kudjanja yamakulu yamphanvu. Mudzamuwone pomwe ankubwera pa mitambo ya kudzulu.”
63 Nkulu wa antsembe padabva vimwevi, adang’amba vovala vake nkunena kuti: “Ko tingafune pomwe mboni zinango pamwapa?
64 Mwachita kudzibvera mwekha momwe ankunyozera Mulungu. Munkuona tani pamwapa?”* Wose adanena kuti akufunika kufa basi.
65 Ndipo anango adayamba kumulavulira mata kumubisa kunkhope na kumbamumenya mafaiti. Iwo ambamuuza kuti: “Lotera!” Padamukwantsa mbama, masocha ya pa tiribunali yadamutenga.
66 Manje Petulo pewenze m’nyantsi pamuyi mwapo, kudabwera mtsikana m’bodzi pa atsikana omwe enze anyabasa wa akulu wa antsembe.
67 Padaona Petulo ankuwotha moto, adamunyang’anisisa nkunena kuti: “Imwepo mwenzembo na Yesu, wa ku Nazareti ule.”
68 Koma iye adalamba nkunena kuti: “Ninkumudziwalini olo pang’ono munthu muyu ndipo ninkubvesalini kuti unkunena chani.” Padateno, Petulo adabula panja nkuyenda pansuwo wa mpanda.
69 Kumuko mtsikana munango yemwe wenze nyabasa, adamuwona ndipo adayamba pomwe kuuza wanthu omwe enze imirire pafupi kuti: “Akulu awa alimbo mugulu ya opfunzira wake.”
70 Pamwapo iye adalamba pomwe. Pakadapita kanthawe pang’ono, yemwe wenze imirire pafupi, adayamba pomwe kuuza Petulo kuti: “Shuwa iwepo ulimbo mugulu ya opfunzira wake. Ndipo ndiwembo wa ku Galileya.”
71 Koma iye adayamba kutemberera na kulumbira kuti: “Munthu muyu yemwe unkunena iwepo nimudziwalini ine.”
72 Nthawe mwiyoletu tambala adalira kachiwiri, ndipo Petulo adakumbukira mawu ya Yesu yale yakuti: “Tambala akanati kulira kawiri, udzanilambe katatu.” Ndipo adawawiwa mu ntima maninge nkuyamba kulira.
Mawu ya m’nyantsi
^ Panango kuti: “pakumanga.”
^ Onani vakumapeto B14.
^ Panango kuti: “adayamba kumuyankhula mawu yoipa.”
^ Panango kuti: “m’puleti.”
^ Mawu mwaya ni ya mu Chiaramu ndipo yatanthauza kuti “Ababa!”
^ Panango kuti: “Mpfunzisi.”
^ Mawu yachigiriki yomwe tayatsumbudzulira kuti “ali pezipezi,” yatanthauza kuti “ali vale vovala vankati vokha” osati alibiretu chilichose.
^ Panango kuti: “munkuganiza tani?”
