Wonembewa na Maliko 2:1-28
2 Pazidapita ntsiku zinganani, Yesu adangena pomwe mu Kaperenao ndipo wanthu adabva kuti ali pamuyi.
2 Pamwapo wanthu azinji adasonkhana kumuko mwakuti penze palibe pomwe malo yokhala, ndawa wanthu adadzala mpakana pa nsuwo ndipo adayamba kuwawuza ntontholo wabwino.
3 Pamwapo kudafika wanthu womwe adamubweresera munthu wozizira vidzo ndipo adatakuliwa na wanthu anayi.
4 Koma adakakwanisalini kumufikisa kwa Yesu ndawa ya kuwanda kwa wanthu. Ndipomwapa, adanyanyula denga sitiriti na pomwe penze Yesu, ndipo padaboola pa denga mwapo adabulusirapo machira ya munthu wozizira vidzo ule.
5 Yesu padawona chikhulupiriro chawo, adauza wozizira vidzo ule kuti: “Mwana iwe, machimo yako yakhululukiriwa.”
6 Manje alembi anango enze pamwapo ndipo adayamba kuganiza m’mitima yawo kuti:
7 “Ndawa chani munthu moyu ankuyankhula tene? Ankunyoza Mulungu moyu. Ni mbani pomwe munango angakwanise kukhululukira machimo, ni Mulungulini yekha basi?”
8 Koma panthawe mweyo, Yesu adazindikira mu ntima mwake kuti iwo ankuganiza vimwevo, ndipo adawabvunza kuti: “Ndawa chani munkuganiza vinthu vimwevi m’mitima yanu?
9 Chosashupa nchiponi, kuuza wozizira vidzo uyu kuti: ‘Machimo yako yakhululukiriwa,’ panango kulewa kuti: ‘Nyamuka ndipo takula machira yako mwaya umbayende’?
10 Koma kuti mudziwe kuti Mwana wa munthu anamphanvu padziko yapasi zokhululukira machimo—” patsogolo pake adauza wozizira vidzo ule kuti:
11 “Ninkulewa na iwepo kuti: Nyamuka, tenga machira yako mwaya ndipo umbayende kwanu.
12 Pavidakhala teno, munthu ule adanyamuka nkutenga machira yake nkufamba pamaso pa wanthu wose. Pamwapo wanthu wose adadabwa maninge ndipo adatamanda Mulungu kuti: “Tenze tikanati tawonako vinthu vatene.”
13 Patsogolo pake, iye adayenda pomwe m’mphepete mwa nyanja. Gulu yose ya wanthu idapitiriza kuyenda kwa iye ndipo adayamba kuwapfunzisa.
14 Pangafamba, adawona Levi mwana wa Alifeyo alikhale mu ofesi yotsonkheramo mtsonkho ndipo adamuuza kuti: “Ukhale wotewera wangu.” Nthawe mweyo adanyamuka nkumutewera.
15 Nthawe inango Yesu na wopfunzira wake angadya chakudya* m’nyumba mwa Levi ndipo wanthu azinji wotsonkhesa mtsonkho na wochimwa angadya* naye pabodzi. Kumuko kwenze wanthu azinji womwe angamutewera.
16 Koma alembi wa Afalisi, padawona kuti ankudya pabodzi na wanthu wochimwa na wotsonkhesa mtsonkho, adayamba kubvunza wopfunzira wake kuti: “Ndawa chani ankudya pabodzi na wotsonkhesa mtsonkho na wochimwa?”
17 Yesu padabva vimwevi adawadawira kuti: “Wanthu wolimba afunikiralini mfulumero, koma wodwala. Nilibe kubwera kudzachemera wanthu wolungama, koma wochimwa.”
18 Wopfunzira wa Yohani na Afalisi angadzimana kudya. Pamwapo iwo adabwera kwa iye nkumubvunza kuti: “Ndawa chani wopfunzira wa Yohani na wopfunzira wa Afalisi adzimana kudya, koma wopfunzira wanu adzimanalini?”
19 Yesu adawadawira kuti: “Azinzake wa mwamuna yemwe walowola manjemanje afunikalini kuleka kudya peno mwamuna muyo adakali nawo pabodzi, ntenolini? Peno mwamuna muyo adakali nawo pabodzi palibe chifukwa chodzimanira kudya.
20 Koma ntsiku zikubwera pomwe wolowola uyo adzachosewe pakati pawo ndipo pa ntsiku mweyo adzadzimane kudya.
21 Palibe yemwe asonerera chigamba cha nguwo inyowani pa malaya yakunja yakalekale. Akachita vimwevo, chigamba chinyowani chile chikwekweta nkung’amba malaya yakale yale ndipo kung’ambika muko kuingizirika maninge.
22 Komasoti palibe munthu yemwe aikha vinyu unyowani m’machola ya chikumba yakalekale. Akachita vimwevo, vinyu muyo uphulisa machola mwayo. Patsogolo pake vinyu muyo utayika ndipo machola mwayo yadzongekeratu. Koma wanthu athira vinyu unyowani m’machola ya chikumba yanyowani.”
23 Yesu pambafamba m’maminda ya tirigu pa ntsiku ya Satade, wopfunzira wake adayamba kubudula ngalangala za tirigu nkumbadya.
24 Pamwapo Afalisi adamuuza kuti: “Ona! Ndawa chani wopfunzira wako ankuchita vinthu vosabvumizika pa ntsiku ya Satade?
25 Koma iye adawadawira kuti: “Ko mulibe kuwerenga vomwe Davide adachita, iye na amuna womwe enze naye padabva njala ndipo enze alibiretu chakudya chilichose?
26 Mu nkhani yolewa va Abiyatara wantsembe nkulu, Davide adangena m’nyumba ya Mulungu ndipo adadya nkate woonesa* kwa Mulungu womwe aliyese ambafunikalini kudya mobverana na malamulo koma wantsembe wokha basi. Iye adatenga mikate mwayo nkupasa amuna womwe enze naye pabodzi. Ko imwepo mulibe kuwerengako nkhani mweyi?”
27 Patsogolo pake adawauza kuti: “Satade idakhalako ndawa ya munthu, koma munthu alibe kukhalako ndawa ya Satade.
28 Ndipomwapa, Mwana wa munthu ni Mbuya wa Satade.”
Mawu ya m’nyantsi
^ Enze adakhala mozungulira meza.
^ Enze adakhala mozungulira meza.
^ Panango kuti: “wachionesero.”
