Wonembewa na Maliko 3:1-35
3 Yesu adangena pomwe kachiwiri mu sunagoge. Mumo mwenze munthu wopunduka* djanja.
2 Pamwapo Afalisi ambamunyang’anisisa kuti awone peno angapolese munthu muyo pa Satade, na cholinga chakuti amugumanire mulandu.
3 Ndipo iye adauza munthu wopunduka* djanja ule kuti: “Imirira, bwera ukhale pakati apa.”
4 Patsogolo pake adawabvunza kuti: “Ko malamulo yabvumiza kuchita chani pa Satade, chabwino panango choipa? Kupulumusa moyo panango kupha?” Koma iwo adandokhala chete.
5 Yesu adawanyang’ana mokalipa ndipo adabva ntsisi maninge ndawa ya kuuma ntima kwawo. Patsogolo pake adauza munthu ule kuti: “Pfuthula djanja yako.” Iye adaipfuthuladi ndipo idakhala pomwe bwinobwino.
6 Padawona vimwevi, Afalisi mwawo adachoka ndipo nthawe mweyo adayenda kukamukonzera chiwembu pabodzi na wanthu omwe angatewera Herode kuti amuphe.
7 Koma Yesu na wopfunzira wake adachoka nkuyenda ku nyanja ndipo chigulu cha wanthu wochokera ku Galileya na ku Yudeya chidamulondola.
8 Mpakana wanthu azinji wochokera ku Yerusalemu, ku Idumeya, kutsidya ya Yorodano na wochokera m’madera ya ku Turo na Sidoni, adabva vose vomwe iye angachita ndipo adayenda kwa iye.
9 Pamwapo iye adauza wopfunzira wake kuti amubweresere barko ing’ono kuti akweremo, kuti gulu ya wanthu ile osati imupanikize.
10 Pakuti wenze adapolesa wanthu azinji, wose womwe enze na matenda yakulu adamuzinga kuti andomugumirira.
11 Ndipo olo mizimu yonyantsa, imbati ikamuwona imbadzigwesa pasi pamaso pake nkukuwa kuti: “Imwepo ndimwe Mwana wa Mulungu.”
12 Koma mobwerezabwereza iye adailamula mwamphanvu kuti osati imuulule.
13 Patsogolo pake, iye adakwera m’phiri nkuchemera wanthu womwe ambawafuna ndipo iwo adayenda kwa iye.
14 Pamwapo adasalula gulu ya wanthu 12 omwe adawapasa dzina yakuti atumi, kuti ambafambe naye nthawe zose nakuti ambawatume kukalalikira
15 nkuwapasa mphanvu zokwanisa kuchosa viwanda.
16 Pagulu ya wanthu 12 womwe adasalula wale penze Simoni yemwe adamupasa pomwe dzina yakuti Petulo,
17 Yakobo mwana wa Zebedayo na Yohani m’bale wake wa Yakobo (awiri mwawa adawapasa pomwe dzina yakuti Boanege, yomwe itanthauza kuti: “Wana wa Kaphaliwali”),
18 Andereya, Filipo, Batolomeyo, Mateyu, Thomasi, Yakobo mwana wa Alifeyo, Tadeyo, Simoni Kananiya,*
19 na Yudasi Sikariyoti yemwe patsogolo pake adapereka Yesu.
Patsogolo pake Yesu adangena m’nyumba.
20 Kumuko gulu ya wanthu idasonkhana pomwe mpakana iye adachita kusowa mpata wakuti adye.
21 Koma azibale wake padabva vimwevo, adayenda kukamuphata ndawa iwo ambalewa kuti: “Wafuntha.”
22 Komasoti alembi womwe adachokera ku Yerusalemu ambanena kuti: “Ali na Belezebule,* ndipo achosa viwanda na mphanvu ya nkulu wa viwanda.”
23 Padawachemera, adayankhula nawo pakuphatisa basa vitsanzo kuti: “Ko Satana angabulise tani Satana?
24 Peno ufumu wagawikana, ufumu muyo ungakhaliselini.
25 Ndipo peno nyumba yagawikana, nyumba mweyo ingakhaliselini.
26 Molingana na vimwevi, peno Satana wadziukira yekha ndipo wagawikana, angakhaliselini koma ankuyenda kukamala.
27 Shuwa ninkukuuzani kuti palibe yemwe angakwanise kungena m’nyumba ya munthu wamphanvu nkumutengera vinthu vake peno alibe kuyamba wamumanga munthu wamphanvu muyo. Akateno ndipo pangakwanise kumutengera vinthu vake m’nyumba mwake mumo.
28 Shuwa ninkukuuzani, wana wa wanthu adzakhululukiriwe vinthu vose, peno adachita machimo ya khaindi yanyi panango kuyankhula mawu yonyoza.
29 Koma aliyese yemwe wanyoza mzimu uchena adzakhululukiriwelini mpakana kalekale, koma adzakhale na mulandu wa chimo yosapera.”
30 Adalewa vimwevi ndawa yakuti iwo ambamulewa kuti: “Anamzimu woipa.”
31 Pamwapo padafika amayi wake na azibale wake ndipo adaima panja nkutuma munthu kuti akamuchemere.
32 Gulu ya wanthu idakhala momuzungulira ndipo wanthu mwawo adamuuza kuti: “Amayi wanu na azibale wanu ali panja apa, ankukufunani.”
33 Koma iye adawadawira kuti: “Ko amayi wangu na azibale wangu ni mbani?”
34 Pamwapo adanyang’ana wose omwe enze adakhala pasi momuzungulira wale nkunena kuti: “Onani! Amayi wangu na azibale wangu ni awa.
35 Aliyese yemwe achita vomwe Mulungu afuna, muyo ndiye m’bale wangu, mulongosi wangu na amayi wangu.”
Mawu ya m’nyantsi
^ Panango kuti: “wozizira.”
^ Panango kuti: “wozizira.”
^ Dzina yakuti “Kananiya” inkutanthauza munthu wachangu.
^ “Belezebule” ni dzina inango ya Satana yemwe ni nkulu panango kuti wolamulira viwanda.
