Wonembewa na Maliko 4:1-41
-
VITSANZO VONENA VA UFUMU (1-34)
-
Wowaza mbewu (1-9)
-
Chomwe chidachitisa kuti Yesu aphatise basa vitsanzo (10-12)
-
Adabvekesa chitsanzo cha wowaza mbewu (13-20)
-
Kandyero amubunikiralini na dengu (21-23)
-
Mpimo womwe mupimira anzanu (24, 25)
-
Wowaza mbewu yemwe ankugona (26-29)
-
Kantsere ka mpiru (30-32)
-
Adaphatisa basa vitsanzo (33, 34)
-
-
Yesu ankulekesa chimphepo (35-41)
4 Yesu adayamba pomwe kupfunzisa m’mphepete mwa nyanja ndipo gulu ya wanthu idasonkhana pafupi na iye. Pamwapo iye adapakira mu barko nkukhala pasi mu barko mumo pataliko na wanthu mwawo, koma gulu yose ya wanthu mwawo idakhazikika m’mphepete mwa nyanja.
2 Ndipo adayamba kuwapfunzisa vinthu vizinji pakuphatisa basa vitsanzo. Pakuwapfunzisa ambawauza kuti:
3 “Tetekerani! Wowaza mbewu adayenda kukawaza mbewu.
4 Pangawaza, mbewu zinango zidagwera m’mphepete mwa nsewu ndipo kudabwera mbalani nkuzidya.
5 Zinango zidagwera pa minyala pomwe penze palibe dothi yokwana ndipo zidamera mwakankulumize ndawa dothi mwiyo yenze ing’onong’ono.
6 Koma dzuwa pidagaka maninge zidawauka ndipo zidafota ndawa yakuti zenze zilibe mizi yakukwana.
7 Mbewu zinango zidagwera pa minga ndipo minga mwizo pazidakula zidakangisa mbewu mwizo kukula mwakuti zilibe kubereka chipaso chilichose.
8 Koma zinango zidagwera pa dothi yabwino ndipo zidamera nkukula mwakuti zidayamba kubala vipaso. Mbewu inango idabala vipaso 30, inango 60 ndipo inango 100.”
9 Patsogolo pake adalewa pomwe kuti: “Yemwe anamatu yakubva, abve.”
10 Manje pewenze payekha, anango womwe enze naye pafupi pabodzi na atumi 12 wale, adayamba kumubvunza pankhani ya vitsanzo vile.
11 Iye adawauza kuti: “Imwepo mwapasiwa mwayi wakuti mubvese chintsintsi chopatulika cha Ufumu wa Mulungu. Koma womwe ali kunja auziwa vose pakuphatisira basa vitsanzo
12 kuti kunyang’ana ambanyang’ane, koma osati ambakwanise kuwona. Kubva ambabve, koma osati ambakwanise kuzindikira tanthauzo yake. Komasoti kuti aleke kuchinja na kukhululukiriwa.”
13 Iye adawauza pomwe kuti: “Peno munkubvesalini chitsanzo ichi, manje ko mungakwanise tani kubvesa vitsanzo vinango?
14 “Wowaza ule awaza mawu.
15 Ndipomwapa, mbewu zomwe zigwera m’mphepete mwa nsewu, ni mawu yomwe yawaziwa mwa wanthu womwe achita kuti akandobva mawu mwayo, Satana abwera nkudzachosa mawu yomwe yawaziwa mwa iwo.
16 Molingana na vimwevi, mbewu zomwe zawaziwa paminyala ni mawu yomwe yawaziwa mwa wanthu omwe achita kuti akandobva mawu mwayo, ayatambira mokondwa.
17 Koma mwa iwo wokha akwanisalini kukhala na mizi ndipo apitiriza mu kanthawe kang’onong’ono. Ndipomwapa akandoyamba kuboneresewa panango kudzudziwa ndawa ya mawu mwayo, afokeratu.
18 Manje pali pomwe mbewu zinango zomwe ziwaziwa paminga. Amwawa ni wanthu womwe akubva mawu,
19 koma nkhawa za moyo wa nthawe* ino, mphanvu yabodza ya chuma na shungu yofuna vinthu vose, vingena nkukangisa mawu mwayo kukula ndipo abalalini vipaso.
20 Pomalizira, mbewu zomwe zidabzaliwa pa dothi yabwino ni wanthu womwe abvesera mawu ndipo ayatambira bwino nkubala vipaso munango 30, munango 60 ndipo munango 100.”
21 Iye adawauza pomwe kuti: “Kandyero amugwanankhiralini na dengu panango kuuyikha kuntsi kwa m’bedi, achita teno? Koma auyikha pa choikhapo kandyero, ko ntenolini?
22 Ndawa palibe chobisika chomwe chidzaululikelini ndipo palibe chomwe chisungiwa mwachintsintsi maninge chomwe chidzadziwikelini.
23 Yemwe anamatu yakubva, abve.”
24 Adapitiriza kuwauza kuti: “Tetekerani bwinobwino vomwe ninkukuuzani ivi. Mpimo womwe munkupimira anzanu, namwembo mudzapimiriwe muyo. Shuwadi, adzakuingizireni vizinji.
25 Ndawa omwe anavo adzapasiwe vizinji, koma omwe alibe adzatengerewe olo vomwe anavo kale.”
26 Iye adapitiriza kuyankhula kuti: “Ufumu wa Mulungu uli ninge momwe munthu awazira mbewu pa dothi.
27 Munthu muyo agona usiku nkumbamuka kukachena ndipo mbewu mwizo zimera nkukula. Koma momwe vimwevi vichitikira, munikachiro uyo adziwalini.
28 Pang’ono na pang’ono, payokha dothi ile ibala vipaso. Chakuyamba tirigu ukula, patsogolo pake uchosa ngalangala, pamapeto pake tirigu wokhuma bwino awonekera mu ngalangala mumo.
29 Koma mbewu mwizo zikakhuma, iye azimweta na djeko ndawa nthawe yokolola yakwana.”
30 Iye adapitiriza kuti: “Ko Ufumu wa Mulungu tingaulinganize na chani, panango tingaufotokoze na chitsanzo chiponi?
31 Uli ninge kantsere ka mpiru komwe pa nthawe yowaza kakhala kang’ono maninge pa ntsere zose za padziko yapasi.
32 Koma akakabzala kamera nkukula kuposha mbewu zose za kudimba ndipo kakhala na nthawi zikuluzikulu, mpakana mbalani zigumana malo yokhala mu mthunzi wake.”
33 Iye adawauza mawu pakuphatisa basa vitsanzo vizinji volingana na vimwevi, malingana na vomwe adakakwanisa kubvesa.
34 Shuwadi, nthawe zose iye ambayankhula nawo pakuphatisa basa vitsanzo, koma kumbali angafotokoza vinthu vose kwa wopfunzira wake.
35 Kumaulo kwa ntsiku mweyo, iye adauza wopfunzira wake kuti: “Naboni tiyambuke tiyende tsidya inango iyo.”
36 Pamwapo padauza gulu ya wanthu ile kuti ambayenda, wopfunzira mwawo adachoka naye pa barko yomwe enze adapakira ile, koma enze pomwe na mabarko yanango.
37 Patsogolo pake kudayamba chimphepo champhanvu cha nkuntho, ndipo mabimbi yambamenya barko mwiyo mwakuti idasala pang’ono kumira.
38 Koma Yesu wenze kumbuyo kwa barko ndipo ambagona, ndipo wenze adatsamira ntsago. Pamwapo adamumusa nkumubvunza kuti: “Mpfunzisi, moyo wathu uli pangozi! Ndawa chani munkuikhiralini nzeru?”
39 Padabva vimwevi adamuka nkutsuula mwamphanvu mphepo ile nkuuza nyanja mweyo kuti: “Leka! Demba!” Padateno, chonzi chire chidaleka ndipo kudademba maninge.
40 Pamwapo iye adawabvunza kuti: “Ndawa chani munkuchita mantha* tene? Ko mukalibiretu chikhulupiriro?”
41 Koma iwo adachita mantha maninge ndipo adayamba kubvunzana kuti: “Ko munthu moyu ni mbani makamaka? Mpakana chonzi na nyanja kumbamubvera!”
