Wonembewa na Maliko 5:1-43
5 Patsogolo pake iwo adafika ku tsidya inango ya nyanja, mu dera ya Agerasa.
2 Ndipo Yesu padandobuluka mu barko, adagumana na munthu yemwe wenze na mzimu wonyantsa ankuchokera kumanda.*
3 Iye ambakonda kukhala kumanda muko ndipo kuyambira kalekale palibe munthu aliyese yemwe ambakwanisa kumumanga, ndawa podiya amangiwe na tcheni ambagwata.
4 Iye adamangiwako na matangadza* komasoti matcheni mobwerezabwereza, koma ambagwata matcheni mwayo na kuthyola matangadza mwayo, ndipo palibe munthu yemwe ambamukwanisa.
5 Ndipo nthawe zose usiku na masikati ambakuwa kumanda na m’mapiri ndipo ambadzitematema na minyala.
6 Koma padawona Yesu ali patali, adamuthamangira nkumugwadira.
7 Patsogolo pake adakuwa na mawu yamphanvu yakuti: “Ko munkufuna chani kwa inepano imwepo Yesu Mwana wa Mulungu Wam’dzulum’dzulu? Ninkukulumbirisani pali Mulungu kuti osati munidzudze.”
8 Ndawa Yesu ambauza mzimu muyo kuti: “Bula mwa munthu moyu, mzimu wonyantsa iwe.”
9 Pamwapo Yesu adamubvunza munthu moyu kuti: “Dzina yako ndiwe mbani?” Iye adadawira kuti: “Dzina yangu ndine Gulu ndawa tilipo azinji.”
10 Ndipo adapitiriza kugwigwirira Yesu kuti osati atumize mizimu mwayo kutali na dera mwiyo.
11 Manje chigulu cha nkhumba chimbadyera m’mphepete mwa phiri.
12 Pamwapo mizimu mwawo idamugwigwirira kuti: “Titumizeni mu nkhumba zire kuti tikangenemo.”
13 Pamwapo iye adaibvumiza. Padateno, mizimu yonyantsa mwayo idabula nkukangena mu nkhumba zire ndipo nkhumba zose mwizo zidathamangira kuphompho nkumogera mu nyanja. Nkhumba mwizo zenzepo pafupifupi 2000 ndipo zidamira mu nyanja mumo.
14 Koma anyakabusa wa nkhumba zire adathawa nkukanena vimwevi m’mathaundi na m’mamiyi ndipo wanthu adabwera kudzawona vomwe vidachitika.
15 Pamwapo adafika kwa Yesu ndipo adawona munthu wachiwanda ule yemwe pakuyamba wenze na gulu ya mizimu yonyantsa. Adamuwona wenze khale pasi alivale bwinobwino komasoti maganizo yake yali bwinobwino ndipo iwo adachita mantha.
16 Komasoti omwe adawona vomwe vidachitika vile adafotokozera wanthu mwawo vomwe vidachitikira munthu wenze na viwanda ule na nkhumba zire.
17 Pamwapo wanthu mwawo adayamba kugwigwirira Yesu kuti achoke mudera ya kwawo.
18 Manje Yesu pangapakira barko, munthu yemwe wenze na viwanda ule adamugwigwirira kuti ayendembo naye pabodzi.
19 Yesu alibe kumubvumiza koma adamuuza kuti: “Yenda kumuyi kwa azibale wako ndipo ukawauze vose vomwe Yahova* wakuchitira na chifundo chomwe wakuwonesa.
20 Pamwapo munthu ule adachoka ndipo adayamba kufalisa mu Dekapole* vose vomwe Yesu adamuchitira mpakana wanthu wose adadabwa maninge.
21 Yesu padayambuka pomwe pa barko nkubwerera tsidya inango, gulu ikulu ya wanthu idabwera kwa iye ndipo iye wenze m’mphepete mwa nyanja.
22 Patsogolo pake m’bodzi wa atsogoleri wa sunagoge dzina yake Yairo adafika. Padamuwona adagwada pamendo pake.
23 Iye adamugwigwirira mobwerezabwereza kuti: “Mwana wangu wachikazi ankudwala mwa penopeno.* Pulizi, naboni mukamuphate na manja yanu kuti apole nkukhala na moyo.”
24 Pavidateno, Yesu adanyamuka naye pabodzi, ndipo gulu ikulu ya wanthu imbamulondola nkumbamupanikiza.
25 Manje penze nkazi munango yemwe ambadwala matenda yotaya magazi kwa magole 12.
26 Mafulumero yazinji yadamuchitisa kuti ashupike* maninge. Iye adadzonga chuma chake chose koma alibe kupola, m’malo mwake matenda mwayo yambandokulirakulira.
27 Padabva va Yesu, adangena mu gulu ya wanthu wale nkupita na kumbuyo kwake, patsogolo pake adaphata malaya yake yakunja.
28 Adachita vimwevi ndawa mu ntima mwake ambadziuza kuti: “Nikandophata malaya yake yakunja, nipoleretu.”
29 Nthawe mweyo adaleka kutaya magazi, ndipo adayamba kubva mthupi mwake kuti matenda yake yakulu yale yapola.
30 Nthawe mweyoletu Yesu adazindikira kuti mphanvu yabula mthupi mwake ndipo adachungunuka mu gulu ya wanthu nkuwabvunza kuti: “Ni mbani waniphata malaya yangu yakunja aya?”
31 Koma wopfunzira wake adamuuza kuti: “Imwembo munkuwona kuti wanthu wose awa ankukupanikizani, manje mungachite kubvunza kuti ‘ni mbani waniphata?’”
32 Koma iye adayamba kuunguzaunguza kuti awone yemwe wamuphata.
33 Nkazi ule adachita mantha nkuyamba kunjenjemera padadziwa vomwe vamuchitikira ndipo adafika pafupi nkugwada pamaso pake nkumuuza vose.
34 Iye adauza nkazi ule kuti: “Mwana iwe, chikhulupiriro chako chakupolesa. Yenda mu ntendere ndipo matenda yako yakulu mwayo yamaliretu.”
35 Adakali kuyankhula, padafika amuna anango wochokera kumuyi kwa mtsogoleri wa sunagoge ule ndipo adamuuza kuti: “Mwana wanu ule wamwalira! Musiyeni Mpfunzisi muyu, ayi kumushupa.”
36 Koma Yesu adabva vomwe iwo ambalewa ndipo adauza mtsogoleri wa sunagoge ule kuti: “Ayi kugopa,* undokhala na chikhulupiriro basi.”
37 Panthawe mweyo, alibe kubvuma kuti aliyese amutewere koma adandobvumiza Petulo, Yakobo na Yohani yemwe wenze m’bale wake wa Yakobo.
38 Pamwapo adafika kumuyi kwa mtsogoleri wa sunagoge ndipo adabva zungo ya wanthu ankulira na kudandaula maninge.
39 Padangena nkati, adabvunza wanthu mwawo kuti: “Ndawa chani munkuchita zungo komasoti kulira teneuyu? Mwana uyu alibe kumwalira, koma ankugona.”
40 Padanena vimwevi, wanthu mwawo adayamba kumuseka monyoza. Koma padawabulisa wose, adatenga ababa na amayi wa mwana ule, komasoti wanthu womwe enze nawo pabodzi ndipo adangena komwe kwenze mwana ule.
41 Pamwapo adaphata djanja ya mwana ule nkulewa kuti: “Talita cumi,” mawu yomwe yakatsumbudzuliriwa yatanthauza kuti: “Kamtsikana iwe, ninkulewa na iwepo, muka!”
42 Nthawe mweyoletu mtsikana ule adamuka nkuyamba kufamba. (Mtsikana muyo wenze na magole 12.) Ndipo wanthu mwawo adakondwa maninge.
43 Koma iye adawalamula mobwerezabwereza* kuti ayi kuti auze aliyese vimwevi. Patsogolo pake adawauza kuti amupase chakudya mtsikana muyo.
Mawu ya m’nyantsi
^ Panango kuti: “manda ya chikumbuso.”
^ Matangadza ni matabwa yoboola yomwe ambaphinirira nayo mendo, manja panango khosi pofuna kumalisa ntukutuku wa munthu.
^ Onani vakumapeto A5.
^ Dekapole ni dera yomwe yenze na mathaundi 10.
^ Panango kuti: “wasala pang’ono kufa.”
^ Panango kuti: “abve kuwawa.”
^ Panango kuti: “leka kuchita mantha.”
^ Panango kuti: “adawalamula mwamphanvu.”
