Wonembewa na Maliko 6:1-56
6 Pamwapo adachoka kumuko nkuyenda dera ya kwawo ndipo wopfunzira wake adamutewera.
2 Pidafika ntsiku ya Satade, iye adayamba kupfunzisa mu sunagoge. Wanthu azinji womwe ambamubvesera adadabwa ndipo adanena kuti: “Ko munthu moyu adavitenga kuponi vinthu vimwevi? Ndipo ndawa chani nzeru zimwezi zidaperekewa kwa iye, nakuti ambakwanise kuchita basa zamphanvu teneuyu?
3 Ko sikuti ni mwana wa Mariya uyu yemwe basa yake ni yopala matabwa, ndipo sikuti iye ni m’bale wake wa Yakobo, Yosefe, Yudasi na Simoni? Ndipo azilongosi wake ni awalini womwe tilinawo pampano?” Pamwapo adayamba kuipidwa naye.
4 Koma Yesu adawauza kuti: “Mneneri alemekezewalini kwawo, olo na azibale wake, podi na womwe akhala nawo nyumba ibodzi, koma kunango.”
5 Ndipomwapa, alibe kuchita basa zamphanvu zilizose kumoku, koma adandoikha manja yake pa wanthu wodwala ang’onong’ono nkuwapolesa.
6 Shuwadi iye adadabwa kuwona kuti wanthu mwawo enze alibe chikhulupiriro. Ndipomwapa, iye adayenda kumiyi yapafupi nkumbakapfunzisa.
7 Patsogolo pake adachemera wopfunzira 12 wale, nkuyamba kuwatumiza awiriawiri ndipo adawapasa mphanvu kuti ambakwanise kuchosa mizimu yonyantsa.
8 Komasoti adawalamula kuti ayi kutenga kanthu kalikose pa ulendo moyu, koma mpsyimbo yokha basi. Adawalamula kuti ayi kuti atakule nkate, chakudya panango kobiri m’machola mwawo,
9 koma adawauza kuti avale ntsapato, ndipo osati avale malaya yawiri.
10 Ndipo adawauza pomwe kuti: “Mukafika pa nyumba iriyose, mumbakhale m’nyumba mumo mpakana nthawe yochoka kumuko ikwane.
11 Kulikose komwe akakutambirenilini panango kuleka kukubveserani, mukambachoka kumuko kunkhumulani pfumbi kumapazi kwanu kuti ukhale umboni kwa iwo.”
12 Pamwapo adayenda kukalalikira kuti wanthu alape,
13 ndipo adachosa viwanda vizinji komasoti kuikha* mafuta wanthu azinji wodwala na kuwapolesa.
14 Patsogolo pake Mpfumu Herode idabva vimwevi ndawa dzina ya Yesu idabvekera maninge ndipo wanthu angalewa kuti: “Yohani M’batizi wamuka ndipomwapa ankuchita basa zamphanvu.”
15 Koma anango ambalewa kuti: “Ni Eliya.” Ndipo anango ambalewa kuti: “Ni mneneri ninge momwe enzere aneneri wakalekale.”
16 Koma Herode padabva va Yesu adanena kuti: “Shuwa, Yohani yemwe nidamugwata msolo ule wamukisiwadi.”
17 Adanena vimwevi ndawa yakuti Herode moyu adatumiza wanthu kuti akaphate Yohani, nkumumanga ndipo adamufungira mudjeri, ndawa Herode adalowola Herodiya nkazi wa m’bale wake Filipo.
18 Adachita vimwevi ndawa Yohani ambauza Herode kuti: “Ni vosabvumizika kuti mutenge nkazi wa m’bale wanu.”
19 Ndipomwapa Herodiya adamusungira chizondo ndipo angafuna kumupha, koma alibe kukwanisa kuchita vimwevo.
20 Herode ambagopa Yohani ndawa ambadziwa kuti ni munthu wolungama komasoti wabwino ntima, ndipomwapa angamuteteza. Padabva vomwe Yohani anganena, iye adasowa chochita, koma adapitiriza kumubvesera mokondwa.
21 Ntsiku yakuti Herodiya akwanirise volinga vake idafika. Imweyi yenze ntsiku yokumbukira kubadwa kwa Herode ndipo adakonzera chakudya cha maulo wanthu wake wolemekezeka, akuluakulu wa masocha na wanthu obvekera maninge wa mu Galileya.
22 Manje mwana nkazi wa Herodiya adangena nkuyamba kuvina, ndipo adakondweresa Herode na wanthu anango womwe angadya* naye pabodzi. Pamwapo mpfumu idauza mtsikana ule kuti: “Unikumbire chilichose chomwe unkufuna ndipo nikupase.”
23 Shuwa, adachita kulumbirira kuti: “Chilichose chomwe unganikumbire nikupase, podi uchinikumbira hafu ya ufumu wangu.”
24 Pamwapo adabula nkukabvunza amayi wake kuti: “Ko nikakumbire chani?” Amayi wake mwawo adamuuza kuti: “Kakumbire msolo wa Yohani M’batizi.”
25 Nthawe mweyo adayenderatu kwa mpfumu mwakankulumize nkuikumbira kuti: “Ninkufuna munipase msolo wa Yohani M’batizi m’mbale manjemanje apa.”
26 Podiya kuti Herode adabva ntsisi maninge, alibe kulamba pakuganiza kuti wapolomisa kale ndipo alendo* wake abvambo.
27 Pamwapo nthawe mweyoletu mpfumu idatumiza nsocha yemwe wenze gwarda wake nkumulamula kuti abwerese msolo wa Yohani. Iye adayenda nkukamugwata msolo mudjeri mule,
28 nkuubweresa m’mbale. Patsogolo pake adaupereka kwa mtsikana ule ndipo mtsikana moyu adaupereka kwa amayi wake.
29 Wopfunzira wake padabva vimwevo adabwera kudzatenga chitanda chake nkukaikha m’manda.*
30 Atumi adayenda kwa Yesu nkumuuza vose vomwe iwo adachita komasoti kupfunzisa.
31 Iye adawauza kuti: “Imwepo bwerani kuno tiyende kwatekha kulibe wanthu kuti mukapumule pang’ono.” Ndawa yakuti wanthu azinji ambabwera na kuyenda ndipo enze alibe mpata wakuti apumule panango kudya.
32 Pamwapo adapakira barko nkuyenda kwawokhawokha komwe kwenze kulibe wanthu.
33 Koma wanthu adawona pangachoka ndipo azinji adadziwa vimwevo. Pamwapo wanthu wochokera m’mathaundi yose adathamangira kumuko na minyendo ndipo iwo ndiwo adayambirira kufika.
34 Koma padabuluka adawona gulu ikulu ya wanthu ndipo adawabvera ntsisi ndawa enze ninge nkhosa zilibe nyakabusa. Pamwapo adayamba kuwapfunzisa vinthu vizinji.
35 Pakudayamba kudoka, wopfunzira wake adabwera kwa iye nkunena kuti: “Kuno kulibe wanthu ndipo nthawe yamala.
36 Auzeni wanthu mwawa kuti anyamuke ayende m’mamiyi yapafupi na madera yozungulira kuti akagule chakudya chakuti adye.”
37 Koma iye adawadawira kuti: “Imwepo muwapase chakudya.” Yesu padalewa vimwevi, iwo adamubvunza kuti: “Ko tiyende kukagula mikate ya kobiri zokwana madinari 200* nkupasa wanthu mwawa kuti adye?”
38 Iye adawabvunza kuti: “Munamikate yangasi? Yendani mukawone!” Padayawona, adalewa kuti: “Yalipo 5 na ntsomba ziwiri.”
39 Pamwapo adauza wanthu mwawo kuti akhale m’magulu pa uswa wopsyipirira.
40 Ndipo adakhaladi m’magulu. Magulu yanango yambaikhiwa wanthu 100, ndipo magulu yanango ambaikhiwa wanthu 50.
41 Ndipomwapa adatenga mikate 5 na ntsomba ziwiri zire nkunyang’ana kudzulu na kupemphera. Patsogolo pake adanyemanyema mikate mwayo nkupereka kwa wopfunzira wake kuti agawire wanthu, ndipo adagwatagwata ntsomba ziwiri zire nkugawira wanthu wose.
42 Pamwapo wose adadya mpakana kukhuta
43 ndipo adalokotera mikate yosala yomwe yadadzala madengu 12 osawerengera na ntsomba.
44 Wanthu womwe adadya nkate enzepo amuna wokwana 5000.
45 Pamwapo, mwakankulumize Yesu adauza wopfunzira wake kuti akwere barko abakayende tsidya inango yowonekera cha ku Betsaida. Koma iye adakhalilira na cholinga chakuti auze wanthu wale kuti ambayende kwawo.
46 Padalairana na wanthu wale, iye adachoka nkuyenda kuphiri kukapemphera.
47 Maulo pakudayamba kudoka, barko ile yenze pakati pa nyanja, koma iye wenze yekha kuntunthu.
48 Padawona kuti wopfunzira wake ankushupika kuchapa ndawa angalimbana na mphepo yamphanvu, iye adawalondola ankufamba pa nyanja. Imweyi yenze nthawe ya kumadandakucha.* Koma wopfunzira mwawo ambawona ninge kuti iye afuna kuwapitirira.
49 Wopfunzira mwawo padamuwona ankufamba padzulu pa nyanja adaganiza kuti: “Yamwaya ni masalamusi basi!” Ndipo adakuwa maninge.
50 Adachita vimwevi ndawa wose mwawo adamuwona ndipo adachita mantha. Koma nthawe mwiyoletu iye adawauza kuti: “Dekhani, ndine. Ayi kuchita mantha.”
51 Pamwapo Yesu adapakirambo barko mwiyo ndipo mphepo ire idaleka. Padawona mwevi adadabwa maninge.
52 Pakuti ambabvesalini tanthauzo ya mikate yale, iwo ambapitiriza kushupika kuti abvese vinthu vose.
53 Padayambuka nkufika ku ntunthu, adafika ku Genesareti nkutsamisa barko mwiyo pafupi.
54 Koma padandobuluka mu barko mule, wanthu adamuzindikira.
55 Pamwapo wanthu adathamanga uku na uku mudera yose mwiyo nkuyamba kutakula pa machira wanthu wose womwe angadwala, nkuyenda nawo kulikose komwe adabva kuti iye ali kumuko.
56 Ndipo akandongena m’mamiyi, panango m’mathaundi na m’madera yozungulira, wanthu ambakhazika wodwala m’mabazali. Iwo ambamugwigwirira kuti andophatako usalu woposa wa m’mphepete mwa malaya yake yakunja, ndipo wanthu wose omwe ambauphata ambapola.
Mawu ya m’nyantsi
^ Panango kuti: “kudzoza.”
^ Enze adakhala mozungulira meza.
^ Panango kuti: “wanthu omwe enze adakhala naye mozungulira meza.”
^ Panango kuti: “m’manda ya chikumbuso.”
^ Onani vakumapeto B14.
^ Nthawe mweyi ni 3:00 madandakucha mpaka 6:00 machibese.
