Wonembewa na Maliko 7:1-37
7 Manje Afalisi na alembi anango womwe adachokera ku Yerusalemu adabwera kwa Yesu.
2 Pamwapo iwo adawona wopfunzira wake anango ankudya chakudya na m’manja mopsyipa panango kuti mosasamba.*
3 (Afalisi na Ayuda wose akudyalini akalibe kusamba m’manja mpakana mutukonyokonyo, pakutewedza mwambo wa azibereki.
4 Ndipo akabwera kuchokera kubazali akudyalini mpakana asambiretu. Pali pomwe miyambo yanango yazinji yomwe adayatambira ndipo ankuyatewedza ninge kuvuwika m’madzi makhapu, mitsuko na vombo va nkuwa.*)
5 Pamwapo Afalisi na alembi mwawa adamubvunza kuti: “Ndawa chani wopfunzira wanu atewedzalini miyambo ya azibereki koma akudya chakudya na m’manja mopsyipa?”
6 Iye adawadawira kuti: “Yesaya adaleweratu chaivo pankhani ya imwepo wanthu woipa, mobverana na vomwe Malemba yalewa kuti: ‘Wanthu awa anilemekeza na milomo yokha, koma mitima yawo ayaikha kutali na inepano.
7 Vilivose vomwe anchita ponipempherera vilibe basa ndawa apfunzisa malamulo ya wanthu ninge kuti ni malamulo ya Mulungu.’
8 Munyalanyaza malamulo ya Mulungu nkumbangingimira miyambo ya wanthu.”
9 Komasoti adawauza kuti: “Mochenjera munyalanyaza malamulo ya Mulungu kuti mumbatewedze miyambo yanu.
10 Mwakulinganiza, Mose adalewa kuti: ‘Mumbalemekeze ababa na amayi wanu,’ ndipo adalewa pomwe kuti: ‘Aliyese woyankhula mawu yoipa* kwa ababa wake panango amayi wake ambaphewe.’
11 Koma imwepo munena kuti: ‘Munthu akauza amayi wake panango ababa wake kuti: “Chilichose chomwe ninacho chomwe nidakakuthandizani nacho, ni khobani, (kutanthauza mphaso yakuti nikapereke kwa Mulungu),”’
12 imwepo mubvumalini pomwe kuti munthu muyo achitire ababa wake panango amayi wake chinthu chilichose.
13 Mukambachita vimwevi muchitisa kuti mawu ya Mulungu yakhale yalibe basa ndawa ya miyambo yanu yomwe mudayapereka kwa wanthu. Ndipo muchita vinthu vizinji vatene.”
14 Padateno, adachemera gulu ya wanthu mwawo kuti abwere pomwe kwa iye ndipo adawauza kuti: “Tetekerani kuno mose ndipo mubvese tanthauzo yake.
15 Palibe chilichose chochokera kunja kwa munthu nkungena mthupi mwake chomwe chingaipise munthu. Koma vinthu vomwe vibula mwa munthu ndivo vomwe viipisa munthu.”
16 * ——
17 Manje padangena m’nyumba inango patali na gulu ya wanthu ire, wopfunzira wake adayamba kumubvunza va chitsanzo chire.
18 Pamwapo iye adawabvunza kuti: “Ko namwembo ndimwe wosazindikira ninge mwawale? Ko munkudziwalini kuti palibe chochokera kunja kwa thupi nkungena mthupi mwa munthu chomwe chingamuipise?
19 Vili teno ndawa chipitalini na muntima mwake koma na m’matumbo mwake, ndipo chiyenda kukabula ku chimbudzi.” Na mawu mwaya Yesu adagemula kuti vakudya vose ni vochena.
20 Iye adalewa pomwe kuti: ‘Chobula mu thupi ya munthu ndicho chomwe chiipisa munthu.
21 Ndawa mu ntima mwa munthu mubula maganizo yoipa ninge ya uhule,* yakuba, yakupha wanthu,
22 yachigololo, dyera, kuchita voipa, khalidwe yonama, khalidwe yosowa manyazi, diso ya njiru, mawu yonyoza, kudzikuza na kuchita vinthu mosowa nzeru.
23 Voipa vose vimwevi vibula mu ntima mwa munthu ndipo vimuipisa.”
24 Padachoka kumuko adayenda mudera ya Turo na Sidoni. Kumuko adangena m’nyumba inango ndipo alibe kufuna kuti aliyese adziwe kuti iye ali kumuko. Koma wanthu adadziwa basi.
25 Nthawe mweyo, nkazi munango yemwe mwana wake wenze na mzimu wonyantsa adabva va iye ndipo adabwera kudzagwada pa mendo pake.
26 Nkazi moyu wenze Mgiriki, wa Chisurofoinike.* Iye adakumbira Yesu mobwerezabwereza kuti amuchosere chiwanda mwana wake.
27 Yesu adauza nkazi muyo kuti: “Vifunika kuti wana ayambe akhuta, ndawa ni bwinolini kutenga chakudya cha wana nkuthusira tumbwaya.”
28 Koma nkazi muyo adamudawira kuti: “Inde Ambuya, koma tumbwaya tukudya vombwera va wana mwawa vikambagwa pa meza.”
29 Yesu padabva vimwevi adauza nkazi muyo kuti: “Pakuti walewa vimwevi, yenda, chiwanda chimwecho chabula mwa mwana wako muyo.”
30 Pamwapo adayenda kumuyi kwake ndipo adakagumana mwana ule ali gone pa m’bedi ndipo chiwanda chire chabula.
31 Pomwe Yesu angachoka mudera ya Turo kuyenda ku nyanja ya Galileya, adagwata na ku Sidoni komasoti mudera ya Dekapole.*
32 Kumuko wanthu adamubweresera munthu wa bvuto yosabva komasoti woshupika kuyankhula. Iwo adamukumbira kuti amuphate na djanja yake munthu muyo.
33 Koma iye adatenga munthu muyo nkuchoka naye pa gulu ya wanthu mwawo nkuyenda naye pambali. Padateno adapitisa vala vake m’matu ya munthu muyo, ndipo padalavulira mata pa vala vake adagumirira lilimi ya munthu muyo.
34 Padateno adanyang’ana kudzulu nkupuma mwamphanvu ndipo patsogolo pake adauza munthu ule kuti: “Efata,” kutanthauza kuti: “Funguka.”
35 Padateno, matu yake yadafunguka ndipo bvuto yake yosayankhula ire idamaliratu, mpakana adayamba kuyankhula bwinobwino.
36 Pamwapo adawalamula kuti osati auze munthu aliyese vomwe vachitika. Koma ambachita kuti akawalambiza mwamphanvu kuti osati auze aliyese, ndipo pangavifalisa maninge.
37 Iwo adadabwa maninge ndipo adalewa kuti: “Shuwadi wachita vinthu vose bwinobwino. Podiya wanthu womwe enze na bvuto yosabva ankubva ndipo womwe enze na bvuto yosayankhula ankuyankhula.”
Mawu ya m’nyantsi
^ Kumuku ni kusamba m’manja mobverana na miyambo yawo.
^ Panango kuti: “kobre”
^ Panango kuti: “yamwano; yotukwana.”
^ Onani matanthauzo ya mawu yanango.
^ Panango kuti: “wa ku Foinike.”
^ Dekapole ni dera yomwe yenze na mathaundi 10.
