Wonembewa na Maliko 8:1-38
8 Mu ntsiku mwezo, gulu ya wanthu idasonkhana pomwe koma yenze ilibe chakudya. Pamwapo Yesu adachemera wopfunzira wake nkuwauza kuti:
2 “Gulu ya wanthu mweyi, inkunibvesa ntsisi inepano ndawa wanthu mwawa akhala na inepano kwa ntsiku zitatu ndipo alibe chakudya.
3 Nikawauza kuti ambayende kwawo ali na njala alenguke panjira. Ndipo anango achokera kutali maninge.”
4 Koma wopfunzira wake adamudawira kuti: “Kumalo kulibe wanthu ninge kuno, munthu angayagumane kuponi mikate yokwana kudyesa wanthu wose mwawa?”
5 Pamwapo Yesu adawabvunza kuti: “Munamikate ingasi?” Iwo adadawira kuti: “Tinayo 7.”
6 Pamwapo adauza wanthu mwawo kuti akhale pasi. Patsogolo pake adatenga mikate 7 yale nkuyamika. Padateno adayanyemanyema nkuyamba kupereka kwa wopfunzira wake kuti ayagawe, ndipo iwo adagawira gulu yose ya wanthu.
7 Wopfunzira mwawo enze pomwe na tuntsomba tung’onong’ono, ndipo pomwe adadalisa tuntsomba muto adawauza kuti agawire pomwe wanthu mwawo.
8 Pamwapo wanthu wose mwawo adadya nkukhuta, mwakuti vosala vomwe adakonkhobza vidadzadza madengu yakuluyakulu yokwana 7.
9 Koma penze amuna wothamangira 4000. Patsogolo pake adawauza kuti ambayende.
10 Nthawe mwiyo, iye adapakira barko pabodzi na wopfunzira wake nkufika mudera ya Dalamanuta.
11 Kumuko kudafika Afalisi ndipo adayamba kutsutsana naye. Ambafuna kuti iye awaonese chizindikiro chochokera kudzulu pakundofuna kumuyesa.
12 Pamwapo adapuma mwamphanvu nkulewa kuti: “Ndawa chani m’badwo moyu unkufunisisa chizindikiro? Shuwa ninkukuuzani, m’badwo moyu udzawonesewelini chizindikiro chilichose.”
13 Padalewa vimwevi adawasiya nkukwera pomwe barko nkuyenda kutsidya inango.
14 Koma iwo adayebwa kutakula mikate, ndipomwapa enze alibe chilichose mu barko mumo, koma enze na nkate ubodzi wokha basi.
15 Ndipo adawachenjeza mwamphanvu kuti: “Khalani maso! Chenjerani na chofufumisa cha Afalisi na cha Herode.”
16 Pamwapo wopfunzira mwawo adayamba kugegedzana pa nkhani yosowa nkate.
17 Yesu padawona vimwevo adawabvunza kuti: “Ndawa chani munkugegedzana pa nkhani yosowa nkate? Ko munkuzindikiralini na kubvesa tanthauzo yake mpakana pano? Ko mitima yanu idakali yosazindikira?
18 ‘Podiya kuti maso muli nayo koma munkuwonalini. Ndipo olo kuti matu munayo, munkubvalini.’ Ko munkukumbukiralini
19 vomwe vidachitika panidanyemanyema mikate 5 nkudyesa amuna 5000? Ko mudalokotera madengu yangasi ya vosalira?” Iwo adadawira kuti: “Yenzepo madengu 12.”
20 “Panidanyemanyema mikate 7 nkudyesa amuna wokwana 4000, ko mudalokotera madengu yakuluyakulu yangasi ya vosala? Iwo adamudawira kuti: “Yenzepo 7.”
21 Pamwapo adawabvunza kuti: “ Manje mukanati mwabvesa tanthauzo yake?”
22 Manje adafika ku Betsaida. Kumuko wanthu adamubweresera munthu yemwe wenze na bvuto yosawona. Wanthu mwawo adamugwigwirira kuti agumirire munthu muyo.
23 Iye adaphata djanja ya munthu wosawona ule nkuyenda kunja kwa muyi. Kumuko iye adaikha mata m’maso mwa munthu ule ndipo adamuphata na manja yawiri nkumubvunza kuti: “Ko unkukwanisa kuwona chilichose?”
24 Munthu muyo adanyang’ana kudzulu nkunena kuti: “Ninkuwona wanthu, koma ankuwoneka ninge miti yomwe inkufambafamba.”
25 Iye adaphata pomwe m’maso mwa munthu ule ndipo adayamba kuwona bwinobwino. Munthu muyo adapoleratu mwakuti adayamba kuwona chilichose bwinobwino.
26 Pamwapo adamuuza kuti ambayende kwawo, nkulewa kuti: “Koma ayi kuti ungene m’muyi umu.”
27 Ndipomwapa Yesu na wopfunzira wake adachoka nkuyenda ku mamiyi ya ku Kaisareya wa ku Filipi. Ankufamba munjira, adayamba kubvunza wopfunzira wake kuti: ‘Ko wanthu ankunena kuti ine ndine mbani?”
28 Iwo adamudawira kuti: “Ankulewa kuti ndimwe Yohani M’batizi, anango ankulewa kuti ndimwe Eliya, koma anango ankulewa kuti ndimwe mnenerimbo basi.”
29 Pamwapo adabvunza wopfunzira mwawo kuti: “Manje imwepo munena kuti ndine mbani?” Petulo adadawira kuti: “Ndimwe Khrisitu.”
30 Padanena vimwevo, adawalamula mwamphanvu kuti ayi kuti auze aliyese va iye.
31 Komasoti adayamba kuwapfunzisa kuti Mwana wa munthu afunika kugumana na mabvuto yazinji komasoti kulambiwa na akulu, antsembe akulu na alembi. Ndipo adzaphewe nkumukisiwa pakadzapita ntsiku zitatu.
32 Shuwadi, iye adayankhula mawu mwaya mosapita m’mbali. Koma Petulo adatenga Yesu nkuyenda naye pambali nkuyamba kumutsuula.
33 Padabva vimwevi, Yesu adachungunuka nkunyang’ana wopfunzira wake, pamwapo adatsuula Petulo kuti: “Yenda kumbuyo kwangu Satana! Ndawa vomwe uganiza ni maganizolini ya Mulungu, koma ni maganizo ya wanthu.”
34 Patsogolo pake iye adachemera gulu ya wanthu pabodzi na wopfunzira wake nkuwauza kuti: “Peno munthu ankufuna kunitewera, adzilambe yekha ndipo atakule muti wake wodzudzikirapo* nkupitiriza kunitewera.
35 Ndawa aliyese yemwe ankufuna kupulumusa moyo wake adzauluze. Koma aliyese woluza moyo wake ndawa ya ine na ntontholo wabwino adzaupulumuse.
36 Ko munthu angaphindule chani peno angagumane vinthu vose va mudziko iyi koma nkuuluza moyo wake?
37 Panango ko munthu angapereke chani chakuti achinjanise na moyo wake?
38 Ndawa aliyese wochita manyazi na ine na mawu yangu mu m’badwo wachigololo* na wochimwa uno, Mwana wa munthu adzachitembo naye manyazi akadzabwera mu ulemerero wa Ababa wake pabodzi na angelo wochena.”
