Wonembewa na Maliko 9:1-50
-
Yesu adachinja maonekedwe (1-13)
-
Mulumbwana yemwe wenze na chiwanda adapolesewa (14-29)
-
Vinthu vose ni vokwanisika kwa munthu wachikhulupiriro (23)
-
-
Yesu ankunena pomwe va kufa kwake (30-32)
-
Opfunzira wa Yesu ankugegedzana pankhani yakuti nkulu ni mbani (33-37)
-
Munthu yemwe ankutsutsanalini nase, ndiye kuti ali kumbali yathu (38-41)
-
Vinthu vokhukhumudwisa (42-48)
-
“Mukhale na munyu” (49, 50)
9 Pamwapo adawauza pomwe kuti: “Shuwa ninkukuuzani kuti pali anango omwe aimirira pano omwe adzalawelini impfa olo pang’ono mpakana adzayambe awona Ufumu wa Mulungu wabwera na mphanvu zake.”
2 Pazidapita ntsiku 6, Yesu adatenga Petulo, Yakobo na Yohani, nkukwera nawo m’phiri itali kwawokhawokha. Pamwapo iye adachinja maonekedwe iwo ankuwona.
3 Malaya yake yakunja yadayamba kuyetima nkuchena maninge kuposha momwe chovala chingachenere podi chiwatchiwe na munthu wodziwa maninge kuwatcha padziko yapasi pano.
4 Komasoti Eliya na Mose adawonekera kwa iwo ndipo adayamba kukambirana na Yesu.
5 Pamwapo Petulo adauza Yesu kuti: “Mpfunzisi, vingakhale bwino kuti isepano timbakhale pano. Tikhome matenti yatatu pano, ibodzi yanu, ibodzi ya Mose na inango ya Eliya.”
6 Petulo alibe kudziwa kuti alewe chani ndawa wopfunzira mwawa adachita mantha maninge.
7 Pamwapo padabwera ntambo womwe udawabisa. Patsogolo pake padabveka mawu yochokera mu ntambo mumo yakuti: “Uyu ni Mwana wangu wapamoyo. Mumbamubvere.”
8 Pamwapo iwo adanyang’ana uku na uku ndipo adandowona kuti palibe aliyese, koma Yesu yekha basi.
9 Koma pangabuluka m’phiri umo, Yesu adawalamula mwamphanvu kuti osati auze munthu aliyese vomwe iwo awona mpakana Mwana wa munthu adzamukisiwe kwa wakufa.
10 Iwo adasungadi vimwevo muntima, koma adayamba kukambirana vomwe kumuka kwa akufa muko kunkutanthauza.
11 Pamwapo adayamba kumubvunza kuti: “Ndawa chani alembi anena kuti Eliya afunika kuyamba wabwera?”
12 Iye adawadawira kuti: “Eliya adzayambedi wabwera nkubwezeresa vinthu vose. Koma ndawa chani malemba yalewa kuti Mwana wa munthu afunika kugumana na mabvuto yazinji komasoti kumuchitira vinthu voipa?
13 Koma ine ninkukuuzani kuti Eliya adabwera kale ndipo adamuchitira vilivose vomwe iwo ambafuna, mobverana na vomwe Malemba yanena va iye.”
14 Padafendera komwe kwenze wopfunzira anango wale, iwo adawona gulu ikulu ya wanthu yomwe yenze idawazungulira ndipo penze alembi womwe ambagegedzana nawo.
15 Koma wanthu wose womwe enze pa gulu ire padamuwona, adadabwa ndipo adamuthamangira kuti akamumonise.
16 Pamwapo iye adawabvunza kuti: “Munkugegedzana nawo chani?”
17 Munthu munango yemwe wenze pagulu mwiyo adamudawira kuti: “Mpfunzisi, ine nabweresa mwana wangu mwamuna kwa imwepo ndawa anamzimu womwe umukangisa kuyankhula.
18 Mzimu moyu uchita kuti ukamubwerera, umugwesera pasi. Akateno achita phovu nkamwa na kukukuta manu ndipo afoka. Nakumbira opfunzira wanu kuti abulise mzimu moyu, koma akangira.”
19 Iye adadawira kuti: “Imwepo m’badwo ulibe chikhulupiriro, ko nipitirize kukhala namwe mpakana lini? Nipitirize kukupirirani mpakana lini? Bwerani naye kuno.”
20 Pamwapo iwo adayenda naye kwa Yesu. Koma mzimu muyo pudawona Yesu, nthawe mweyoletu udachitisa kuti mwana muyo aphuphe. Adagwa pasi nkubvunvulikabvunvulika ndipo angachita phovu kukamwa.
21 Pamwapo Yesu adabvunza ababa wake kuti: “Ko vimwevi vakhala vinkumuchitikira kwa nthawe itali tani?” Ababa wa mwana muyo adanena kuti: “Kundoyambira ali mwana,
22 ndipo nthawe zizinji umugwesera pamoto na m’madzi kuti umudzonge. Koma peno mungakwanise kutithandiza, tichitireni chifundo.”
23 Yesu adabvunza ababa mwawo kuti: “Mwati ‘peno mungakwanise’? Chilichose ni chokwanisika kwa munthu yemwe anachikhulupiriro.
24 Nthawe mweyoletu ababa wa mwana ule adakuwa nkulewa kuti: “Chikhulupiriro ninacho! Limbisani chikhulupiriro changu!”
25 Manje Yesu padawona kuti gulu ya wanthu inkuthamangira kwa iwo, adakalipira mzimu wonyantsa ule kuti: “Iwe mzimu wokangisa munthu kuyankhula na kubva, ninkukulamula kuti bula ndipo ayi kudzangena pomwe mwa iye.”
26 Mwana muyo padakuwa na kuphupha maninge, mzimu muyo udabula ndipo ambawoneka ninge wafa, mwakuti wanthu azinji ambanena kuti: “Wamwalira!”
27 Koma Yesu adamuphata djanja nkumumusa ndipo mwana muyo adaimirira.
28 Manje padangena m’nyumba, wopfunzira wake adamubvunza ali kwaokha kuti: “Ndawa chani isepano takangira kubulisa chiwanda chile?”
29 Iye adawadawira kuti: “Mzimu wa khaindi mweyi ungachokelini na chilichose, koma na pemphero basi.”
30 Padachoka kumuko adapitiriza ulendo wawo kujula mu Galileya, koma iye alibe kufuna kuti aliyese adziwe kuti iye ali kumuko.
31 Ndawa iye angapfunzisa wopfunzira wake nkuwauza kuti: “Mwana wa munthu adzaperekewe m’manja mwa wanthu ndipo adzamuphe. Koma podiya kuti adzamuphe, adzamuke pakadzapita ntsiku zitatu.”
32 Koma wopfunzira mwawo alibe kubvesa mawu yake mwaya ndipo ambagopa kuti amubvunze.
33 Patsogolo pake adafika ku Kaperenao. Manje peenze m’nyumba adawabvunza kuti: “Munjira mule mumbagegedzana chani?”
34 Iwo adandokhala chete ndawa munjira ambagegedzana kuti nkulu ni mbani pakati pawo.
35 Pamwapo adakhala pasi nkuchemera wopfunzira 12 wale nkuwauza kuti: “Peno aliyese ankufuna kukhala woyamba, afunika kukhala womalizira pa wose na ntumiki wa wose.”
36 Pamwapo adatenga mwana mng’ono nkumuimisa pakati pawo ndipo adamukumbatira nkuwauza kuti:
37 “Aliyese yemwe watambira mwana mng’ono ninge moyu mudzina yangu, watambira pomwe inepano. Ndipo aliyese yemwe watambira inepano, alibe kundotambira inepano nekha, koma watambira pomwe Mulungu yemwe adanituma.”
38 Patsogolo pake Yohani adauza Yesu kuti: “Mpfunzisi, isepano tawona munthu munango ankubulisa viwanda mu dzina yanu koma tamulambiza ndawa ankufambalini nase pabodzi.”
39 Koma Yesu adalewa kuti: “Ayi kumulambiza, ndawa palibe yemwe angachite basa zamphanvu mudzina yangu koma nthawe ibodzibodzi mweyo nkumbanilewa voipa.
40 Ndawa yemwe ankutsutsanalini nase ali kusaidi yathu.
41 Komasoti aliyese yemwe wakupasani khapu ya madzi yakumwa ndawa yakuti ndimwe wopfunzira wa Khrisitu, shuwa ninkukuuzani, munthu muyo mphoto yake idzataikelini.
42 Koma aliyese wokalipisa m’bodzi wa tuwana mutu tomwe tunachikhulupiriro, vingamukhalire bwino maninge peno angamumangirire chimwala cha mphero mkhosi mwake chomwe bulu afambisa, nkumuponya munyanja.
43 Peno djanja yako ikuphonyesa, uigwate. Vilibwino kuti ukagumane moyo ulibe chidzo chibodzi kusiyana na kuyenda ku Gehena,* ku moto womwe ungadzimwiwelini, unamanja yose yawiri.
44 * ——
45 Ndipo peno phazi yako ikuphonyesa, uigwate. Vilibwino kuti ukagumane moyo uli wopunduka kusiyana nakuti uponyewe mu Gehena unamapazi yose yawiri.
46 * ——
47 Peno diso yako ikuchimwisa, uitaye. Vilibwino kuti ukangene mu Ufumu wa Mulungu unadiso ibodzi kusiyana nakuti uponyewe mu Gehena* unamaso yose yawiri,
48 komwe nkhonye zikufalini ndipo moto wake udzimwalini.
49 Ndawa aliyese akufunika kuwaziwa munyu womwe unkuimira moto.
50 Munyu ni wabwino, manje peno munyu wamala mphanvu, ko mphanvu yake iyo ingabwezeresewe tani? Khalani na munyu mwa imwe mwekha ndipo sungani ntendere pakati panu.”
Mawu ya m’nyantsi
^ Onani matanthauzo ya mawu yanango.
^ Onani vakumapeto A3.
^ Onani vakumapeto A3.
^ Onani matanthauzo ya mawu yanango.
