Wonembewa na Mateyu 1:1-25
1 Bukhu ya mzera wa azibereki wa Yesu Khrisitu mwana wa Davide, mwana wa Abulahamu:
2 Abulahamu adabereka Isaki.
Isaki adabereka Yakobo.
Yakobo adabereka Yuda na azibale wake.
3 Yuda adabereka Perezi na Zera, ndipo mayi wawo wenze Tamara.
Perezi adabereka Hezironi.
Hezironi adabereka Ramu.
4 Ramu adabereka Aminadabu.
Aminadabu adabereka Naasoni.
Naasoni adabereka Salimoni.
5 Salimoni adabereka Boazi, ndipo mayi wake wenze Rahabi.
Boazi adabereka Obedi ndipo mayi wake wenze Rute.
Obedi adabereka Jese.
6 Jese adabereka Mpfumu Davide.
Davide adabereka Solomo, yemwe mayi wake wenze nkazi wa Uriya.
7 Solomo adabereka Rehobowamu.
Rehobowamu adabereka Abiya.
Abiya adabereka Asa.
8 Asa adabereka Yehosafati.
Yehosafati adabereka Yehoramu.
Yehoramu adabereka Uziya.
9 Uziya adabereka Yotamu.
Yotamu adabereka Ahazi.
Ahazi adabereka Ezekiya.
10 Ezekiya adabereka Manase.
Manase adabereka Amoni.
Amoni adabereka Yosiya.
11 Yosiya adabereka Yekoniya na azibale wake pa nthawe yomwe Ayuda adatengewa nkuyendesewa ku Babulo.
12 Ayuda padatengewa nkuyendesewa ku Babulo, Yekoniya adabereka Salatiyeli.
Salatiyeli adabereka Zerubabele.
13 Zerubabele adabereka Abiyudi.
Abiyudi adabereka Eliyakimu.
Eliyakimu adabereka Azoro.
14 Azoro adabereka Zadoki.
Zadoki adabereka Akimu.
Akimu adabereka Eliyudi.
15 Eliyudi adabereka Eleazara.
Eleazara adabereka Matani.
Matani adabereka Yakobo.
16 Yakobo adabereka Yosefe mwamuna wake wa Mariya, yemwe adabereka Yesu wochemerewa kuti Khrisitu.
17 Ndipomwapa, mibadwo yose kuchokera pa Abulahamu kukafika pa Davide yenzepo 14. Kuchoka pa Davide nkukafika panthawe yomwe Ayuda adatengewa nkuyendesewa ku Babulo yenzepo mibadwo 14. Kuchoka pa nthawe yomwe Ayuda adatengewa nkuyendesewa ku Babulo nkudzafika pa Khrisitu, penze mibadwo 14.
18 Vomwe vidachitika kuti Yesu Khrisitu abadwe ni ivi: Pa nthawe yomwe amayi wake Mariya adapolomisiwa na Yosefe kuti adzamulowole, Mariya uyo adagumanika kuti anamimba yochitisiwa na mzimu uchena* akanati alowolana.
19 Koma ndawa yakuti mwamuna wake Yosefe wenze munthu wolungama ndipo ambafunalini kuti amuchitise manyazi kwa wanthu, adaganiza va kundomusiya mwachintsintsi.
20 Koma padaiganizira maninge nkhani mweyi, mngelo wa Yahova adamubwerera kutulo nkumuuza kuti: “Yosefe mwana wa Davide, ayi kugopa kutenga Mariya nkazi wako kuyenda naye kumuyi, ndawa yakuti mimba yomwe anayo yachitisiwa na mphanvu ya mzimu uchena.
21 Iye adzabereke mwana mwamuna ndipo udzamupase dzina yakuti Yesu. Ndawa adzapulumuse wanthu wake ku machimo yawo.”
22 Vose vimwevi vidachitikadi kuti vomwe Yahova adanena pakuphatisira basa mneneri wake vikwanirisike. Iye adati:
23 “Tetekerani! Namwali adzakhale na mimba ndipo adzabereke mwana mwamuna. Mwana muyo adzamupase dzina yakuti Emanueli,” yomwe ikatsumbudzuliriwa itanthauza kuti “Mulungu ali nase.”
24 Pamwapo Yosefe adamuka nkuchita vomwe mngelo wa Yahova adamuuza. Adatenga nkazi wake nkuyenda naye kumuyi.
25 Koma alibe kugona naye mpakana adabereka mwana mwamuna. Mwana muyo adamupasa dzina yakuti Yesu.
Mawu ya m’nyantsi
^ Panango kuti: “mphanvu.”
