Wonembewa na Mateyu 11:1-30
11 Yesu padamaliza kupereka malangizo kwa wopfunzira wake 12 wale, adachoka kumuko nkuyenda kukapfunzisa na kulalikira ku mathaundi yanango.
2 Koma Yohani ali mudjeri, adabva vomwe Khrisitu angachita ndipo adatuma wopfunzira wake
3 kukamubvunza kuti: “Ko Mesiya yemwe tinkumudikhirira uyo ndimwepo, panango tidikhirire munango?”
4 Pakudawira, Yesu adawauza kuti: “Yendani mukamuuze Yohani vomwe munkubva na kuwona:
5 Omwe enze na bvuto yosawona ankuwona, wopunduka ankufamba, wakhate ankuchenesewa ndipo womwe enze na bvuto yosabva ankubva. Wakufa ankumukisiwa ndipo wosauka ankuuziwa ntontholo wabwino.
6 Wokondwa ni wale omwe agumanalini chokhumudwisa kwa inepano.”
7 Pomwe wopfunzira wa Yohani angabwerera, Yesu adayamba kuuza gulu ya wanthu va Yohani kuti: “Ko mwenze mwayenda mu chipululu kukawona chani? Ko mwenze mwayenda kukawona ntsanga yogunduzika na mphepo?
8 Manje mwenze mwayenda kukawona chani? Panango mumbayenda kukawona munthu wovala vovala vapadzulu?* Neye, pale omwe avala vovala vapadzulu agumanika m’nyumba za mafumu.
9 Manje chikulukulu chemwenze mwayenda kukawona ni chani? Panango mwenze mwayenda kukawona mneneri? Inde ninkukuuzani, Yohani wenze mneneri koma wenze wofunika maninge kuposha aneneri.
10 Pakunena va Yohani, Malemba yanena kuti: ‘Tetekera! Ine ninkutumiza nthumi yangu kuti itsogole kukakukonzera njira!’
11 Shuwa ninkukuuzani, pa wanthu wose palibe nkulu kuposha Yohani M’batizi. Koma munthu yemwe ni mng’onoko mu Ufumu wakudzulu ni nkulu kuposha iye.
12 Kuyambira mu ntsiku za Yohani M’batizi mpakana lero, wanthu ankuyesesa mwakhama kuti agumane mwayi wongena mu Ufumu wakudzulu, ndipo womwe ankuyesesa mwakhama ankuugumana.
13 Ndawa vose vomwe aneneri adanemba na Chilamulo, vidaneneratu vinthu vodzachitika mpakana nthawe ya Yohani.
14 Peno mukhulupirire panango neye, Yohani ni ‘Eliya yemwe aneneri adaneneratu kuti adzabwere.’
15 Yemwe anamatu abve.
16 “Ko m’badwo moyu niulinganize na mbani? Uli ninge wana womwe akhala pasi m’bazali nkumbakuwirira wana anzawo womwe asenzeka nawo
17 kuti: ‘Tidakulizirani chinonje koma mulibe kuvina. Tidalira mokuwa koma imwepo mulibe kudzigugudza pachifuwa ndawa yokwinyirira.’
18 Molingana na mwevi, Yohani adabwera ndipo angadyalini panango kumwa. Koma wanthu ambanena kuti: ‘Anachiwanda.’
19 Kudabwera Mwana wa munthu ndipo akudya na kumwa, koma wanthu ankunena kuti: ‘Onani! Munthu wolungwa na wokonda maninge vinyu, shamwali wa wotsonkhesa mtsonkho na wochimwa.’ Mulimose mwavingakhalire, nzeru itsimikizika kuti ni yolungama ndawa ya basa zake.”
20 Pamwapo adayamba kudzudzula mathaundi yomwe adachitamo basa zizinji zamphanvu ndawa yakuti yalibe kulapa. Iye adati:
21 “Tsoka kwa iwepo Korazini! Tsoka kwa iwepo Betsaida! Ndawa basa zamphanvu zomwe zidachitika mwa iwepo sembe zidachitika ku Turo na ku Sidoni, wanthu adakalapa kalekale, sembe avala masakha na kukhala padotha.
22 Koma ninkukuuzani kuti chilango chanu chidzakhale chowawa maninge kuposha cha Turo na Sidoni pa Ntsiku ya Chiweruzo.
23 Iwembo Kaperenao, ko panango udzakwiziwe kudzulu? Neye, koma udzapolikire ku Manda,* ndawa basa zamphanvu zomwe zidachitiwa mwa iwepo sembe zidachitika ku Sodomu, thaundi mweyi sembe idakalipo na lero.
24 Koma ninkukuuzani kuti chilango cha Kaperenao chidzakhale chowawa maninge kuposha cha Sodomu pa Ntsiku ya Chiweruzo.”
25 Panthawe mwiyo Yesu adalewa kuti: “Ninkukutembejani imwepo Ababa pamaso pa wose, Ambuya wakudzulu na dziko yapasi, ndawa wanthu wanzeru na wozindikira mwawabisira vinthu vimwevi ndipo mwaviulula kwa wana ang’onoang’ono.
26 Inde Ababa, ndawa yakuti imwepo mudabvuma kuti vimwevi vichitike.
27 Ababa wangu apereka vinthu vose kwa inepano, ndipo palibe yemwe ankumudziwa bwino Mwana koma Ababa wokha. Komasoti palibe ankuwadziwa bwino Ababa koma Mwana yekha na aliyese yemwe Mwana muyo wafuna kumuululira va Ababa mwawo.
28 Bwerani kwa ine mose imwepo womwe mwaneta ndawa ya kuphata basa yonetesa ndipo nidzakutsitsimuseni.
29 Takulani djoko yangu ndipo bvumani kuti nikupfunziseni, ndipo mudzatsitsimuliwe ndawa yakuti ndine wopfatsa na wodzichepesa.
30 Ndawa djoko yangu ni yosashupa kutakula ndipo ntolo wangu ni wopepuka.”
Mawu ya m’nyantsi
^ Panango kuti: “vabwino maninge.”
^ Panango kuti: “Hade,” kutanthauza manda ya wanthu wose.
