Wonembewa na Mateyu 12:1-50
-
Yesu ni “Mbuya wa Satade” (1-8)
-
Munthu wopunduka djanja ankupolesewa (9-14)
-
Ntumiki yemwe Mulungu akondwera naye (15-21)
-
Viwanda vinkuchosewa pakuphatisa basa mzimu uchena (22-30)
-
Chimo yomwe ingakhululukiriwelini (31, 32)
-
Muti udziwika na vipaso vake (33-37)
-
Chizindikiro cha Yona (38-42)
-
Mzimu wonyantsa ukabwerera pomwe kwa munthu (43-45)
-
Amayi wake wa Yesu na azibale wake (46-50)
12 Panthawe inango pa ntsiku ya Satade, Yesu angafamba na kugwata m’minda ya tirigu. Wopfunzira wake adabva njala ndipo adayamba kubudula ngalangala za tirigu nkumbadya.
2 Afalisi padawona vimwevi adamuuza kuti: “Ona vomwe wopfunzira wako ankuchita! Vimwevi ni vosabvumizika pa ntsiku ya Satade.”
3 Koma iye adawadawira kuti: “Ko imwepo mulibe kuwerenga vomwe Davide adachita, iye na amuna omwe enze naye padabva njala?
4 Iye adangena m’nyumba ya Mulungu, ndipo adadya mikate yowonesa kwa Mulungu, yomwe iye na wanthu womwe enze naye wale ambafunikanalini kudya mobverana na malamulo koma wantsembe wokha.
5 Panango mulibe kuwerenga mu Chilamulo kuti wantsembe mu kachisi ambatewedzalini malamulo ya Satade nkumbaphata basa pa Satade koma olo nteno ambawonewalini kuti ni wophonya?
6 Koma ninkukuuzani kuti alipano yemwe ni nkulu maninge kuposha kachisi.
7 Sembe mudabvesa tanthauzo ya mawu yakuti: ‘Ninkufuna chifundo osati ntsembe,’ mudakaweruzalini wanthu wosaphonya.
8 Ndawa Mwana wa munthu ni Mbuya wa Satade.”
9 Padachoka pamwapo, adayenda kukangena mu sunagoge wawo.
10 Mumo mwenze munthu munango wopunduka djanja. Pamwapo iwo adamubvunza kuti: “Ko nivobvumizika kupolesa munthu wodwala pa ntsiku ya Satade?” Cholinga chawo chenze chakuti amugumanire chifukwa.
11 Koma iye adawadawira kuti: “Muchikhala na nkhosa ibodzi yokha, basi iyo nkugwera muchidindi pa ntsiku ya Satade, ko alipo pakati panu yemwe angaichoselini?
12 Munthu ni wofunika maninge kuposha nkhosa. Ndipomwapa, nivobvumizika kuchita chinthu chabwino pa ntsiku ya Satade.”
13 Patsogolo pake adamuuza munthu ule kuti: “Pfuthula djanja yako.” Iye adaipfuthuladi ndipo idakhala pomwe bwinobwino ninge mweyenzere inzake.
14 Koma Afalisi mwawo adabula nkukakonza chiwembu kuti amuphe.
15 Yesu padazindikira chiwembu mwechi adachoka pa malo mwayo. Wanthu azinji adamutewera ndipo adawapolesa wose,
16 koma adawatsimikizira mwamphanvu kuti ayi kuti amuulule.
17 Adachita vimwevi kuti vomwe Mulungu adalewa pakuphatisa basa mneneri Yesaya vikwanirisike. Iye adalewa kuti:
18 “Onani ntumiki wangu yemwe namusalula, munthu wapamoyo pangu yemwe anikondweresa maninge. Nidzaikhe mzimu wangu pa iye ndipo wanthu wa khaindi inango adzawawonese chilungamo chaicho.
19 Adzayambanelini na munthu panango kugegedzana ndipo palibe yemwe adzabve mawu yake m’misewu ikuluikulu.
20 Ntsanga yophwanyika adzaithyolelini ndipo chingwe cha kandyero chomwe chili utsi lotoloto adzachidzimwelini, mpakana akwanise kubweresa chilungamo.
21 Shuwadi, mudzina yake makhaindi yazinji ya wanthu yadzadikhire vabwino.”
22 Patsogolo pake adamubweresera munthu yemwe wenze na chiwanda. Munthu muyo wenze na bvuto yosawona, ndipo ambakwanisalini kuyankhula. Iye adamupolesa, mpakana munthu wosayankhula ule adayamba kuyankhula na kuwona.
23 Pavidateno, gulu ya wanthu ile idadabwa maninge ndipo idayamba kulewa kuti: “Ko moyu ni Mwanalini wa Davide uyu?”
24 Afalisi padabva vimwevi adalewa kuti: “Muyu achosalini viwanda na mphanvu zake neye, koma na mphanvu za Belezebule* nkulu wa viwanda.”
25 Padadziwa maganizo yawo, iye adawauza kuti: “Ufumu uliwose wogawikana umala ndipo thaundi panango nyumba iliyose yogawikana ikhalisalini.
26 Molingana na vimwevi, peno Satana ankuchosa pomwe Satana, ndiye kuti wagawikana. Manje peno nteno ufumu wake ungapitirize tani kukhalapo?
27 Peno inepano nibulisa viwanda na mphanvu ya Belezebule, ko ateweri wanu abulisa na mphanvu ya mbani? Ndipomwapa ateweri wanu mwawa adzakuweruzeni kuti ndimwe wophonya.
28 Koma peno inepano nibulisa viwanda na mphanvu ya mzimu wa Mulungu, ndiye kuti Ufumu wa Mulungu wakufikirani modzidzimusa.
29 Ko munthu angakwanise kungena m’nyumba ya munthu wamphanvu nkumutengera vinthu vake koma osayamba wamumanga munthu wamphanvu muyo? Akachita teno, ndipo pangakwanise kumutengera vinthu vake va m’nyumba.
30 Aliyese yemwe alilini ku saidi yangu ankutsutsana nane, ndipo yemwe aphatalini basa younganidza wanthu pabodzi na inepano awagawanisa.
31 “Ndipomwapa, ninkukuuzani kuti wanthu adzakhululukiriwe chimo ya khaindi iliyose na mawu yaliyose yonyoza, koma wonyoza mzimu adzakhululukiriwelini.
32 Mwakulinganiza, aliyese woyankhula mawu yonyoza Mwana wa munthu adzakhululukiriwe. Koma aliyese woyankhula mawu yonyoza mzimu uchena adzakhululukiriwelini mu nthawe ino* olo nthawe inkubwera.
33 “Imwepo muchitisa kuti muti na vipaso vake vikhale vabwino panango muchitisa kuti muti na vipaso vake vikhale vowola, ndawa muti udziwika na vipaso vake.
34 Wana wa nyoka imwe, mungayankhule tani vabwino pomwe ndimwe woipa? Ndawa pakamwa payankhula vochokera muntima.
35 Munthu wabwino ayankhula vinthu vabwino ndawa yakuti muntima mwake muli dzale na vinthu vabwino, koma munthu woipa ayankhula vinthu voipa ndawa yakuti muntima mwake muli dzalembo na vinthu voipa.
36 Ninkukuuzani kuti pa Ntsiku ya Chiweruzo, wanthu adzadawire mulandu pa mawu yaliyose yoipa yomwe iwo ayankhula.
37 Ndawa na mawu yako udzaweruziwe kuti ndiwe wolungama, ndipo na mawu yako pomwe udzaweruziwe kuti ndiwe wophonya.”
38 Manje alembi anango na Afalisi adamukumbira kuti: “Mpfunzisi, tinkufuna mutiwoneseko chizindikiro.”
39 Pakuwadawira iye adawauza kuti: “M’badwo woipa na wachigololo, unkufunisisa kuwonesewa chizindikiro. Koma udzapasiwelini chizindikiro chilichose kupatulapo chizindikiro cha mneneri Yona chokha basi.
40 Ndawa ninge momwe Yona adakhalira m’mimba mwa chintsomba ntsiku zitatu usiku na masikati, Mwana wa munthu adzakhalembo muntima wa dziko yapasi ntsiku zitatu usiku na masikati.
41 Wanthu wa ku Nineve adzamuke pa Ntsiku ya Chiweruzo pabodzi na m’badwo uyu ndipo adzautsutse ndawa iwo adalapa padabva ulaliki wa Yona. Koma manje munango woposha Yona alipano.
42 Mpfumukazi ya ku Sul idzamukisiwe pabodzi na m’badwo moyu ndipo idzautsutse, ndawa mpfumukazi mweyi idabwera kuchokera kumalekedzero ya dziko yapasi kudzabva nzeru za Solomo. Koma manje, munango woposha Solomo alipano.
43 “Mzimu woipa ukachoka mwa munthu, uyenda uchifagafaga malo yokhala mudera ilibe madzi, koma ugumanalini malo yaliyose.
44 Pamwapo ulewa kuti: ‘Nibwerere ku nyumba yangu ile yanidachoka.’ Ukafika ugumana kuti mulibe aliyese, koma ni mopsairiwa bwino na mokhuzisiwa.
45 Ukateno, uyenda kukatenga mizimu inango 7 yoipa maninge kuposha moyu, ndipo yakangena nkati mumo yakhala mumo. Vimwevi vichitisa kuti vochita va munthu ule vikhale voipa maninge kuposha pakuyamba. Ndimo mwati vidzakhalirembo na m’badwo woipa moyu.”
46 Ali nkati moyankhula na chigulu cha wanthu, kudabwera amayi wake na azibale wake. Iwo adaima panja ndipo ambafuna kuti ayankhule naye.
47 Pamwapo munthu munango adamuuza kuti: “Amayi wanu na azibale wanu ali panja apa ankufuna kuyankhula namwe.”
48 Pakudawira, iye adauza munthu yemwe angayankhula naye ule kuti: “Ko amayi wangu ni mbani ndipo azibale wangu ni mbani?”
49 Pamwapo adapfuthula djanja yake nkulata wopfunzira wake nkulewa kuti: “Ona! Amayi wangu na azibale wangu ni awa!
50 Ndawa aliyese yemwe achita vomwe Ababa wangu wakudzulu afuna, muyo ndiye adzakhale m’bale wangu, mulongosi wangu na amayi wangu.”
Mawu ya m’nyantsi
^ “Belezebule” ni dzina inango ya Satana yemwe ni nkulu panango kuti wolamulira viwanda.
^ Onani matanthauzo ya mawu yanango.
