Wonembewa na Mateyu 14:1-36
14 Pa nthawe mweyo, Herode yemwe ambatonga dera mwiyo adabva va Yesu
2 ndipo adauza atumiki wake kuti: “Moyu ni Yohani M’batizi. Adamuka kwa akufa ndipomwapa ankuchita basa zamphanvu.”
3 Herode* adaphata Yohani nkumumanga ndipo adamufungira mudjeri ndawa Herode adalowola Herodiya nkazi wa m’bale wake Filipo.
4 Adachita vimwevo ndawa Yohani ambamuuza kuti: “Nivosabvumizika kuti mutenge nkazi moyu kuti akhale nkazi wanu.”
5 Koma olo kuti Herode ambafuna kupha Yohani, ambagopa gulu ya wanthu ndawa yakuti iwo ambakhulupirira kuti iye wenze mneneri.
6 Koma paidafika ntsiku yokumbukira kubadwa kwa Herode, mwana nkazi wa Herodiya adavina pa ntsiku mweyo ndipo adakondweresa maninge Herode,
7 mpakana adachita kulumbira nkupolomisa mtsikana muyo kuti adzamupase chilichose chomwe angakumbire.
8 Pomwe amayi wake adachita kumuuziratu vati akumbire, mtsikana muyo adalewa kuti: “Munipase msolo wa Yohani M’batizi mpuleti manjemanje apa.”
9 Mpfumu mweyi idabva ntsisi koma pakuganizira polomisi yomwe idachita na wanthu enzepo pa phwando,* idalamula kuti msolo uyo uperekewe.
10 Pamwapo adatuma munthu kuti akagwate msolo wa Yohani kudjeri.
11 Pamwapo adabweresa msolo ule mpuleti nkuupereka kwa mtsikana ule ndipo iye adayenda nawo kwa amayi wake.
12 Patsogolo pake wopfunzira wake adabwera kudzatenga chitanda chake nkukaikha m’manda. Padateno adayenda kukauzambo Yesu.
13 Yesu padabva vimwevi, adachoka kumuko pa barko nkuyenda kumalo kulibe wanthu kuti akakhale payekha. Koma gulu ya wanthu paidabva vimwevi idamutewera inkufamba na minyendo kuchokera m’mathaundi yawo.
14 Yesu padabuluka mu barko, adawona gulu ikulu ya wanthu ndipo adawabvera ntsisi nkuwapolesera wanthu wawo wodwala.
15 Koma chakumaulo wopfunzira wake adabwera kwa iye nkulewa kuti: “Kuno kulibe wanthu ndipo nthawe yamala, auzeni wanthu mwawa kuti ambayende. Ayende m’mamiyi kuti akagule chakudya kuti adye.”
16 Koma Yesu adawadawira kuti: “Palibe chati ayendere, imwepo muwapase chakudya.”
17 Iwo adamuuza kuti: “Tilibe chilichose pano, tinamikate 5 na ntsomba ziwiri basi.”
18 Iye adati: “Vibwereseni kuno.”
19 Pamwapo adauza gulu ya wanthu kuti ikhale pasi pa uswa. Ndipo adatenga mikate 5 na ntsomba ziwiri zire, ndipo adanyang’ana kudzulu nkupemphera. Padateno, adanyemanyema mikate yale nkuyapereka kwa wopfunzira wake kuti agawire gulu ya wanthu ire.
20 Wose adadya mpakana kukhuta, adakonkhobza vomwe vidasalira mwakuti vidadzala madengu 12.
21 Koma womwe adadya enze amuna wothamangira 5000 osawerengera akazi na wana ang’onoang’ono.
22 Pamwapo, mwakankulumize Yesu adauza wopfunzira wake kuti akwere barko abakayende tsidya inango. Koma iye adasalilira kuti auze wanthu wale kuti ambayende kwawo.
23 Padauza wanthu wale kuti ambayende, adakwera m’phiri yekhayekha kukapemphera. Iye adakhala kumuko yekhayekha mpakana kudadoka.
24 Pa nthawe mweyi nkuti barko ile yayenda kutali pakati pa madzi, ndipo imbagwinyiwa mwamphanvu na mabimbi ndawa angalimbana na mphepo yamphanvu.
25 Koma kumadandakucha,* iye adafika kwa wopfunzira wake wale ankufamba padzulu pa madzi.
26 Wopfunzira mwawo padamuwona ankufamba padzulu pa nyanja, adachita mantha nkulewa kuti: “Mwaya ni masalamusi basi!” Ndipo adakuwa mwamantha.
27 Koma nthawe mweyo Yesu adawauza kuti: “Ayi kugopa, ndine.”
28 Pamwapo Petulo adadawira kuti: “Ambuya peno ndimwedi, niuzeni nifambe pamadzi apa nibwere kuna imwepo.”
29 Iye adamuuza kuti: “Bwera!” Pamwapo Petulo adabuluka mu barko nkufamba pamadzi nkuyenda komwe kwenze Yesu.
30 Koma padawona mphepo ya nkuntho, adachita mantha. Padayamba kumira adakuwa kuti: “Ambuya, nipulumuseni!”
31 Nthawe mwiyo Yesu adapfuthula djanja yake nkumuphata ndipo adamuuza kuti: “Wachikhulupiriro chochepa iwe, ndawa chani wakaikira?”
32 Padakwera mu barko, mphepo ya nkuntho ile idaleka.
33 Pamwapo, womwe enze mu barko wale adamugwadira* nkulewa kuti: “Ndimwedi Mwana wa Mulungu.”
34 Ndipo adayambukira ku ntunthu ku Genesarete.
35 Wanthu wa mudera mweyi padamuzindikira, adatumiza mawu mudera yose ndipo adamubweresera wanthu wose womwe angadwala.
36 Wanthu ambamukumbira kuti andophatako usalu woposa wa m’mphepete mwa malaya yake ya kunja, ndipo wose womwe ambamuphata ambapoleratu.
Mawu ya m’nyantsi
^ Moyu ni Herode Antipa. Onani matanthauzo ya mawu yanango.
^ Panango kuti: “festa.”
^ Nthawe mweyi ni 3:00 madandakucha mpaka 6:00 machibese.
^ Panango kuti: “adamujolimira.”
