Wonembewa na Mateyu 15:1-39
15 Pamwapo Afalisi na alembi wochokera ku Yerusalemu adayenda kwa Yesu nkumubvunza kuti:
2 “Ndawa chani wopfunzira wanu atewedzalini miyambo ya azibereki? Mwakulinganiza, asambalini* m’manja akafuna kudya chakudya.”
3 Koma iye adawadawira kuti: “Ndawa chani imwepo mutewedzalini malamulo ya Mulungu ndawa ya miyambo yanu?”
4 Mwakulinganiza, Mulungu adati: ‘Mumbalemekeze ababa wanu na amayi wanu.’ Ndipo adanena pomwe kuti: ‘Aliyese woyankhula mawu yoipa* kwa ababa wake panango amayi wake ambaphewe.’
5 Koma imwepo munena kuti: ‘Aliyese wouza ababa wake panango amayi wake kuti: “Chirichose chaninacho chomwe nidakakuthandizani nacho ni mphaso yakuti nipereke kwa Mulungu,”
6 afunikalini kuthandiza ababa wake.’ Miyambo yanu yachitisa kuti mawu ya Mulungu yakhale yalibe phindu.
7 Wanthu woipa imwe! Yesaya adaleweratu chaivo pankhani ya imwepo pomwe adati:
8 ‘Wanthu mwawa anilemekeza na milomo yokha, koma mitima yawo ayaikha kutali na inepano.
9 Chirichose chomwe achita pakunitumikira chiribe phindu ndawa apfunzisa malamulo ya wanthu ninge malamulo ya Mulungu.’”
10 Padanena vimwevi, adachemera gulu ya wanthu ire kuti ifendere ndipo adawauza kuti: “Tetekerani ndipo mubvesese tanthauzo yake:
11 Chomwe chingena pakamwa pa munthu chimuipisalini, koma aipisiwa na chomwe chibula pakamwa pake.”
12 Pamwapo wopfunzira wake adabwera nkumubvunza kuti: “Ko munkudziwa kuti vamwanena vile Afalisi akalipa navo?”
13 Koma iye adawadawira kuti: “Mbewu iriyose yomwe iribe kubzaliwa na Ababa wangu wakudzulu idzazuliwe.
14 Asiyeni mwawo. Iwo ni azitsogoleri wa wanthu wosawona. Ndipomwapa peno munthu wosawona ankutsogolera munthu wosawona munzake, wose awiri adzagwere mu dindi.”
15 Manje Petulo adakumbira kuti: “Titsumbudzulireni chitsanzo chire.”
16 Yesu adawabvunza kuti: “Ko imwepo mulibe kubvesesambo?
17 Ko munkudziwalini kuti chirichose chomwe chingena nkamwa chingena m’mimba basi nkukataiwa kuchimbudzi?
18 Koma chirichose chomwe chibula pakamwa chichokera mu ntima ndipo vinthu vimwevo ndivo vomwe viipisa munthu.
19 Mwakulinganiza, mu ntima mubula maganizo yoipa aya: Maganizo yakupha wanthu, yachigololo, ya uhule,* yakuba, maumboni yonama na yonyoza Mulungu.
20 Vimwevi ndivo vomwe viipisa munthu, koma kudya chakudya ulibe kusamba* m’manja kuipisalini munthu.”
21 Yesu padachoka kumuko adayenda m’madera ya Turo na Sidoni.
22 Manje kudabwera mayi munango wa ku Foinike kuchokera m’madera mwayo ndipo adakuwa kuti: “Nichitireni chifundo Ambuya Mwana wa Davide. Mwana wangu nkazi anachiwanda chomwe chinkumuboneresa maninge.”
23 Koma iye alibe kumudawira chinthu. Pamwapo wopfunzira wake adabwera nkumuuza kuti: “Muuzeni ambayende, ndawa ankupitiriza kukuwa m’mambuyo mwathu umu.”
24 Iye adadawira kuti: “Ine niribe kutumiziwa kwa wanthu anango, koma kwa nkhosa zosokera za m’nyumba ya Izirayeli.”
25 Koma mayi ule adabwera pafupi nkumugwadira ndipo adalewa kuti: “Ambuya, nithandizeni pulizi!”
26 Iye adamudawira kuti: “Nibwinolini kutenga chakudya cha wana nkuthusira tumbwaya.”
27 Mayi ule adadawira kuti: “Inde Ambuya, koma tumbwaya tukudya vakudya vombwera pa meza ya ambuya wawo.”
28 Pamwapo Yesu adamudawira kuti: “Mayi iwe, chikhulupiriro chako ni chikulu. Vomwe unkufuna vichitike kwa iwepo.” Ndipo nthawe mweyo mwana wake adapola.
29 Padachoka kumuko, Yesu adayenda kufupi na nyanja ya Galileya ndipo adakwira m’phiri nkukhala pasi m’phiri mumo.
30 Pamwapo wanthu azinji adabwera kwa iye. Adabwera na wanthu wopunduka, wothyoka vidzo, wa bvuto yosawona, wa bvuto yosayankhula na anango azinji wosiyanasiyana. Wanthu mwawa adawakhazika pa minyendo yake ndipo iye adawapolesa.
31 Pamwapo gulu ya wanthu ire idadabwa kuwona wanthu wosayankhula ankukwanisa kuyankhula, wopunduka ankufamba ndipo wa bvuto yosawona ankuwona ndipo adatamanda Mulungu wa Izirayeli.
32 Koma Yesu adachemera wopfunzira wake nkuwauza kuti: “Gulu ya wanthu mweyi inkunibvesa ntsisi, ndawa wanthu mwawa akhala na inepano kwa ntsiku zitatu ndipo alibe chakudya. Ninkufunalini kuwauza kuti ambayende na njala ndawa angalenguke munjira.”
33 Koma wopfunzira wale adamuuza kuti: “Kumalo kulibe wanthu ninge kuno, chakudya chokwana gulu yose mweyi tichigumane kuponi?”
34 Pamwapo Yesu adawabvunza kuti: “Munamikate ingasi?” Iwo adamudawira kuti: “Tinayo 7 na tuntsomba tung’onong’ono.”
35 Padauza wanthu mwawo kuti akhale pasi,
36 adatenga mikate 7 yale na ntsomba zire. Padayamika, adayanyemanyema nkuyamba kupereka kwa wopfunzira wale ndipo iwo adagawira gulu yose ya wanthu ire.
37 Wanthu wose mwawo adadya mpakana kukhuta ndipo vose vomwe vidasala adavikonkhobza ndipo vidadzala madengu yakuluyakulu yokwana 7.
38 Koma womwe adadya enze amuna wokwana 4000, osawerengera akazi na wana ang’onoang’ono.
39 Patsogolo pake padauza wanthu wale kuti ambayende kwawo, iye adapakira barko nkukafika mudera ya Magadani.
Mawu ya m’nyantsi
^ Kumuku ni kusamba m’manja mobverana na miyambo yawo.
^ Panango kuti: “yamwano.”
^ Mu Chigiriki ni porneía, kutanthauza njira zose za kugonana kosabvumizika. Onani matanthauzo ya mawu yanango.
^ Kumuku ni kusamba m’manja mobverana na miyambo yawo.
