Wonembewa na Mateyu 16:1-28
16 Pamwapo Afalisi na Asaduki adafika kwa Yesu ndipo pakufuna kumuyesa nzeru, adamukumbira kuti awaonese chizindikiro chochokera kudzulu.
2 Koma Yesu adawadawira kuti: “Kukambadoka munena kuti: ‘Nthawe ilibwino, ndawa kudzulu kwafuwira ninge moto.’
3 Koma machibese munena kuti: ‘Lero kunkuwoneka ninge kugwe nvula, ndawa kudzulu kwafuwira ndipo kunamitambo.’ Mudziwa kutsumbudzulira kaonekedwe ka kudzulu, koma mukangira kutsumbudzulira vizindikiro va nthawe ino.
4 M’badwo woipa na wachigololo,* unkufunisisa kuwonesewa chizindikiro, koma udzapasiwelini chizindikiro chirichose kupatulapo chizindikiro cha Yona chokha.” Padanena vimwevi, adachoka nkuwasiya.
5 Patsogolo pake wopfunzira wake adayambukira tsidya inango koma adayebwa kutakula mikate.
6 Yesu adawauza kuti: “Chenjerani ndipo musamale na chofufumisa cha Afalisi na Asaduki.”
7 Koma iwo adayamba kukambirana kuti: “Tayebwa kutakula mikate pakubwera kuno.”
8 Yesu adadziwa vimwevi, ndipo adalewa kuti: “Wachikhulupiriro chochepa imwe, ndawa chani munkukambirana kuti mulibe mikate?
9 Ko mukanati mwaibvesa basi mpfundo yake? Panango ko munkukumbukiralini wanthu 5000 womwe adadya mikate 5 na kuwanda kwa madengu ya chakudya chosalira chomwe mudakonkhobza?
10 Panango ko mwayebwa wanthu 4000 omwe adadya mikate 7 na kuwanda kwa madengu yakuluyakulu ya chakudya chosalira chomwe mudakonkhobza?
11 Manje ndawa chani munkukwanisalini kubvesa kuti ninkunenalini va nkate, koma ninkulewa kuti mumbasamale na vofufumisa va Afalisi na Asaduki?”
12 Padateno, iwo adazindikira kuti ankunenalini kuti asamale na vofufumisa va nkate, koma vakuti asamale na vomwe Afalisi na Asaduki apfunzisa.
13 Padafika mudera ya Kaisareya wa ku Filipi, Yesu adabvunza wopfunzira wake kuti: “Ko wanthu ankunena kuti Mwana wa munthu ni mbani?”
14 Iwo adamudawira kuti: “Anango ankunena kuti ndimwe Yohani M’batizi, anango akuti ndimwe Eliya koma anango ankunena kuti ndimwe Yeremiya panango mneneri munango.”
15 Pamwapo iye adawabvunza kuti: “Manje imwepo munena kuti ndine mbani?”
16 Simoni Petulo adadawira kuti: “Ndimwe Khrisitu, Mwana wa Mulungu wamoyo.”
17 Yesu adamuuza kuti: “Ndiwe wokondwa Simoni mwana wa Yona, ndawa ni munthulini* yemwe wakuululira vimwevi, koma Ababa wangu wakudzulu ndiwo achita vimwevi.
18 Ndipomwapa, inembo ninkukuuza kuti: Iwepo ndiwe Petulo ndipo pamwala moyu nidzamangepo mpingo wangu, misuwo ya manda* yadzaugonjeselini.
19 Inepano nidzakupase makhiyi ya Ufumu wa kudzulu. Chilichose chaungamange padziko yapasi chidzakhale kuti chamangiwambo kudzulu, ndipo chirichose chomwe ungamasule padziko yapasi chidzakhale kuti chamasuliwambo kudzulu.”
20 Pamwapo adalamula wopfunzira wake mwamphanvu kuti ayi kuti aulule kuti iye ni Khrisitu.
21 Kuyambira nthawe mweyo, Yesu adayamba kuuza wopfunzira wake kuti iye ankufunika kuyenda ku Yerusalemu. Kumuko akadzudziwe maninge na akulu, wantsembe akuluakulu na alembi. Ndipo akaphewe, koma pa ntsiku yachitatu adzamukisiwe.
22 Pamwapo Petulo adatenga Yesu nkuyenda naye pambali nkuyamba kumutsuula kuti: “Dzikomereni ntima Ambuya. Ayi kubvuma kuti vimwevi vikuchitikireni olo pang’ono.”
23 Koma iye adachungunuka nkuuza Petulo kuti: “Yenda kumbuyo kwangu Satana! Ndiwe chokhukhumudwisa kwa ine, ndawa vomwe uganiza ni maganizolini ya Mulungu, koma ni maganizo ya wanthu.”
24 Patsogolo pake Yesu adauza wopfunzira wake kuti: “Peno munthu ankufuna kunitewera, adzilambe yekha ndipo atakule muti wake wodzudzikirapo* nkupitiriza kunitewera.
25 Ndawa aliyese yemwe ankufuna kupulumusa moyo wake adzauluze, koma aliyese yemwe waluza moyo wake ndawa ya inepano adzaugumane.
26 Ko munthu angaphindule chani peno angagumane vinthu vose va mudziko ino koma nkuluza moyo wake? Panango ko munthu angapereke chani chomwe angachinjanise na moyo wake?
27 Ndawa Mwana wa munthu adzabwere mu ulemerero wa Ababa wake pabodzi na angelo wake. Pa nthawe mwiyo adzapereke mphoto kwa aliyese mobverana na makhalidwe yake.
28 Shuwadi ninkukuuzani kuti mwa anango womwe ali imirire pano adzalawelini impfa olo pang’ono mpaka ayambe awona Mwana wa munthu ankubwera ninge mpfumu.”
Mawu ya m’nyantsi
^ Panango kuti: “ulibe chikhulupiriro.”
^ Panango kuti: “wamagazi na nyama.”
^ Panango kuti: “Hade,” kutanthauza manda ya wanthu wose.
^ Onani matanthauzo ya mawu yanango.
