Wonembewa na Mateyu 17:1-27
17 Pazidapita ntsiku 6, Yesu adatenga Petulo, Yakobo na m’bale wake Yohani nkukwera nawo phiri itali kwa okhaokha.
2 Manje iwo adawona kuti wachinja mawonekedwe yake. Nkhope yake idagaka maninge ninge dzuwa, ndipo malaya yake yakunja yadagaka* maninge.
3 Patsogolo pake adawona Mose na Eliya ankukambirana na Yesu.
4 Pamwapo Petulo adauza Yesu kuti: “Ambuya, vingakhale bwino kuti isepano timbakhale pano. Peno munkufuna, ningakhome matenti yatatu pano, ibodzi yanu, ibodzi ya Mose na inango ya Eliya.”
5 Akalibe kumaliza kuyankhula, ntambo wogaka maninge udawafunikiza, ndipo padabveka mawu yochokera mu ntambo mumo yakuti: “Uyu ni Mwana wangu wapamoyo yemwe anikondweresa maninge. Mumbamubvere.”
6 Wopfunzira mwawo padabva vimwevi, adagwada nkujolima mpakana nkhope zawo pasi ndipo adachita mantha maninge.
7 Pamwapo Yesu adawafenderera ndipo adawaphata nkulewa kuti: “Mukani, ayi kugopa.”
8 Padanyang’ana, adawona kuti palibe munthu munango aliyese koma Yesu yekha basi.
9 Pangabuluka m’phiri mule, Yesu adawalamula kuti: “Ayi kuuza munthu aliyese masomphenya mwaya mpakana Mwana wa munthu adzamukisiwe kwa wakufa.”
10 Koma wopfunzira mwawo adamubvunza kuti: “Manje ndawa chani alembi anena kuti Eliya afunika kuyamba wabwera?”
11 Iye adadawira kuti: “Inde, Eliya adzabweredi ndipo adzabwezerese vinthu vose.
12 Koma ine ninkukuuzani kuti Eliya adabwera kale koma iwo alibe kumuzindikira ndipo adamuchitira vilivose vomwe iwo ambafuna. Iwo adzadzudze pomwe Mwana wa munthu mwanjira mweyi.”
13 Padayankhula teno, wopfunzira wale adazindikira kuti iwo ambalewa va Yohani M’batizi.
14 Padafika pafupi na gulu ya wanthu, mwamuna munango adamufenderera ndipo adamugwadira nkulewa kuti:
15 “Ambuya, mubvere ntsisi mwana wangu mwamuna, ndawa ankudwala matenda ya mpfai ndipo ankubonera maninge. Nthawe zizinji agwera pamoto na m’madzi.
16 Nenze nayenda naye kwa opfunzira wanu koma akangira kumupolesa.”
17 Yesu adadawira kuti: “Imwe m’badwo ulibe chikhulupiriro na wosokonezeka maganizo, ko nipitirize kukhala namwe mpakana lini? Nipitirize kukupirirani mpakana lini? Bwerani naye kuno.”
18 Pamwapo Yesu adatsuula chiwanda chile ndipo chidachoka. Nthawe mweyo mulumbwana ule adapola.
19 Pamwapo wopfunzira adayenda kwa Yesu ali payekha nkumubvunza kuti: “Ndawa chani isepano takangira kubulisa chiwanda chile?”
20 Iye adawadawira kuti: “Ndawa ya kuchepa kwa chikhulupiriro chanu. Shuwa ninkukuuzani kuti peno mungakhale na chikhulupiriro cholingana na kantsere ka mpiru kuchepa kwake, mudzakwanise kuuza phiri iyi kuti: ‘Choka pano uyende apo,’ ndipo idzachokedi. Palibe chomwe chidzakhale chosakwanisika kwa imwepo.”
21 * ——
22 Padasonkhana pabodzi ku Galileya, Yesu adawauza kuti: “Mwana wa munthu adzaperekewe m’manja mwa wanthu
23 ndipo adzamuphe. Koma pa ntsiku yachitatu adzamukisiwe.” Padabva vimwevi iwo adakwinyirira maninge.
24 Padafika ku Kaperenao, wanthu wotsonkhesa mtsonkho wa madalakima* yawiri adayenda kwa Petulo nkumubvunza kuti: “Ko mpfunzisi wanu apereka madalakima yawiri ya mtsonkho?”
25 Iye adati: “Inde apereka.” Koma padangena m’nyumba akalibe kulewa chinthu, Yesu adamubvunza kuti: “Simoni, unkuganiza tani? Ko mafumu ya dziko yapasi yatambira kobiri za mtsonkho kuchokera kwa mbani? Kuchokera kwa wana wawo, panango kuchokera kwa wanthu wachilendo?”
26 Padadawira kuti: “Kuchokera kwa wanthu wachilendo,” Yesu adamuuza kuti: “Manje wana afunikalini kupereka mtsonkho.
27 Koma kuti tileke kuwakalipisa, yenda kunyanja ukathuse medzo yako ndipo ukatenge ntsomba yoyambirira kumedza. Ukakaikanganula kukamwa kwake, ukagumaneko kobiri ibodzi ya siliva. Ukaitenge nkuperekera mtsonkho wako na wangu.”
