Wonembewa na Mateyu 18:1-35
18 Panthawe mweyo, wopfunzira adabwera kwa Yesu nkumubvunza kuti: “Mbani makamaka yemwe adzakhale nkulu maninge mu Ufumu wakudzulu?”
2 Pamwapo iye adachemera mwana mng’ono nkumuikha pakati pawo.
3 Basi nkuwauza kuti: “Shuwa ninkukuuzani, mukaleka kuchinja nkukhala ninge wana ang’ono, mudzangenelini mu Ufumu wakudzulu.
4 Ndipomwapa, aliyese yemwe adzadzichepese ninge mwana mng’ono uyu, ndiye wati adzakhale nkulu maninge mu Ufumu wakudzulu.
5 Ndipo aliyese yemwe watambira mwana mng’ono maninge ninge moyu mudzina yangu, watambira pomwe inepano.
6 Koma aliyese wokalipisa m’bodzi wa tuwana tumotu tomwe tunikhulupirira, vingamukhalire bwino maninge achimumangirira chimwala cha mphero mkhosi mwake chomwe bulu afambisa, nkumumiza mu nyanja yodiba.
7 “Tsoka kwa dziko ndawa ya vokalipisa! Inde palibe mochitira, vokalipisa mwevi vifunika kubwera basi, koma tsoka kwa munthu yemwe abweresa vokalipisa vimwevi!
8 Ndipomwapa, peno djanja yako panango mwendo wako ukuphonyesa, uugwate na kuutaya kutali. Ndawa vilibwino kuti ukagumane moyo ulibe chidzo chibodzi panango uli wopunduka, kusiyana nakuti ukathusiwe m’moto wosapera unamanja yako yose yawiri panango mendo yako yose yawiri.
9 Ndipo peno diso yako ikuchimwisa, uikolowole nkuitaya kutali. Ndawa vilibwino kuti ukagumane moyo unadiso ibodzi kusiyana nakuti ukathusiwe mu Gehena* wa moto unamaso yako yose yawiri.
10 Samalani wanthu imwe kuti osati munyoze m’bodzi wa tuwana motu, ndawa ninkukutsimikizirani kuti angelo wawo wakudzulu awona nkhope ya Ababa wangu wakudzulu nthawe zose.
11 * ——
12 “Munkuganiza tani? Peno munthu anankhosa 100 ndipo ibodzi mwa nkhosa mwizo yasokera, ko angasiyelini nkhosa 99 zire m’phiri nkuyenda kukafagafaga yosokera ire?
13 Akaigumana, shuwa ninkukuuzani kuti akondwa maninge na nkhosa mwiyo kusiyana na nkhosa 99 zomwe zilibe kusokera.
14 Molingana na vimwevi, Ababa wangu* wakudzulu afunalini kuti olo m’bodzi pa tuwana tumutu adzongeke.
15 “Ndipo peno m’bale wako wachimwa, uyende ukamufotokozere pamwekha iwepo na iye. Peno wakubvera, ndiye kuti wamubweza m’bale wako muyo.
16 Koma akaleka kukubvera, uyendeko na munthu munango m’bodzi panango awiri kuti nkhani yose ikatsimikizike na mboni ziwiri panango zitatu.
17 Amwawa akaleka kuwabvera, uuze mpingu. Ndipo mpingu moyu akaleka kuubvera pomwe, kwa iwepo akhale ninge munthumbo wa khaindi inango panango ninge wotsonkhesa mtsonkho.
18 “Shuwa ninkuuzani, vilivose vomwe mudzamange padziko yapasi vidzakhale kuti vamangiwa kale kudzulu. Ndipo vilivose vomwe mudzamasule padziko yapasi, vidzakhale kuti vamasuliwa kale kudzulu.
19 . Ninkukuuzani pomwe kuti peno awiri mwa imwepo padziko yapasi pano mungabverane kuti mukumbire chinthu chilichose chofunika, Ababa wangu wakudzulu adzakuchitireni.
20 Ndawa kulikose komwe kwasonkhana awiri panango atatu mudzina yangu, inepano nidzakhale pakati pawo.”
21 Pamwapo Petulo adabwera nkumubvunza kuti: “Ambuya, ko m’bale wangu nimbamukhululukire kangasi akambaniphonyera? Mpakana maulendo 7?”
22 Yesu adamudawira kuti: “Ninkukuuza kuti osati maulendo 7 basi, koma mpakana maulendo 77.
23 “Ndipomwapa Ufumu wakudzulu tingaulinganize na mpfumu yomwe inkufuna kuti akapolo wake abweze chikwerete.
24 Mpfumu mwiyo pidayamba kutambira vikwerete vile, atumiki wake adabweresa munthu yemwe wenze na chikwerete cha matalente 10 000.*
25 Koma ndawa yakuti adakakwanisalini kubweza chikwerete mwicho, abwana wake adalamula kuti mwamuna muyo, nkazi wake, wana wake na vose vewenze navo vigulisiwe nkubwezera kobiri zake.
26 Pamwapo kapolo ule adagwada nkujolika ndipo adati: ‘Nichitireni chifundo pulizi, nidzakubwezereni zose.’
27 Bwana ule adamuchitira chifundo kapolo ule nkumukhululukira chikwerete chake chose chire.
28 Koma kapolo moyu padabula, adagumana na kapolo munzake yemwe adamukweretesa kobiri yokwana madinari 100. Pamwapo adamuphata nkumushipa pakhosi nkulewa kuti: ‘Nibwezere chikwerete chire kankulumize.’
29 Kapolo munzake ule adagwada pasi nkuyamba kumudandaulira kuti: ‘Pulizi nichitireni chifundo, nidzakubwezereni.’
30 Koma iye alibe kubvuma ndipo adayenda kudjeri nkumufungira mpakana adzamalize kubweza chikwerete.
31 Akapolo anzake padawona vomwe vidachitika, adakwinyirira maninge ndipo adayenda kwa abwana wawo nkukawafotokozera vose vidachitika.
32 Pamwapo bwana wake ule adamuchemeresa nkumuuza kuti: ‘Kapolo woipa iwe, inepano nidakukhululukira chikwerete chako chose chile pomwe udanidandaulira.
33 Manje ndawa chani ulibe kumuchitirambo chifundo kapolo munzako, ninge momwe inepano nakuchitira?’
34 Pamwapo bwana ule adakalipa maninge ndipo adayenda naye kwa wonyang’anira djeri kuti akamufungire mudjeri mpakana adzamalize kubweza chikwerete chose chire.
35 Ababa wangu wakudzulu adzakuchitirenimbo volingana na vimwevi peno aliyese wa imwepo akhululukiralini m’bale wake na moyo wose.”
Mawu ya m’nyantsi
^ Onani matanthauzo ya mawu yanango.
^ Panango kuti: “wanu.”
^ Matalente 10 000 ya siliva, yankuimira madinali 60 000 000.
