Wonembewa na Mateyu 19:1-30
19 Yesu padamaliza kuyankhula vinthu vimwevi, adachoka ku Galileya nkuyenda kumalire ya Yudeya kutsidya inango ya Yorodano.
2 Gulu ikulu ya wanthu idamulondola kumuko ndipo iye adawapolesa.
3 Manje Afalisi adabwera kwa iye na cholinga chakuti amuyese nzeru ndipo adamubvunza kuti: “Ko ni vobvumizika kuti mwamuna asiye nkazi wake pa chifukwa chilichose?”
4 Yesu adadawira kuti: “Ko mulibe kuwerenga kuti yemwe adalenga wanthu pakuyambirira adawalenga mwamuna na nkazi
5 nkulewa kuti: ‘Ndipomwapa, mwamuna adzasiye ababa wake na amayi wake nkukhala na nkazi wake ndipo awiri mwawo adzakhale thupi ibodzi’?
6 Ndipo iwo ni awirilini pomwe, koma ni thupi ibodzi. Ndipomwapa, chomwe Mulungu wachimanga pabodzi, munthu ayi kuti achimasule.”
7 Iwo adamubvunza kuti: “Manje ndawa chani Mose adalamula kuti mwamuna ambapereke kalata yomalisira ukwati kwa nkazi nkumusiya?”
8 Iye adadawira kuti: “Ndawa ya kuuma kwanu ntima, Mose adakubvumizani kuti mumbamalise ukwati, koma pakuyambirira venzelini teno.
9 Ine ninkukuuzani kuti aliyese yemwe wasiya nkazi wake nkulowola munango wachita chigololo kupatulapo peno wamusiya ndawa yakuti iye wachita uhule.”*
10 Pamwapo wopfunzira wake adalewa kuti: “Peno viriteno kwa mwamuna na nkazi wake, vilibwino kundoleka kulowola.”
11 Iye adawauza kuti: “Ni woselini womwe angakwanise kuchita vimwevi, koma wale wokha womwe anamphaso.
12 Ndawa anango alowolalini ndawa yakuti adabadwa teno ndipo anango ndawa yakuti adathenewa na wanthu. Koma pali anango womwe alowolalini ndawa ya Ufumu wakudzulu. Yemwe angakwanise kuchita vimwevi achite.”
13 Patsogolo pake wanthu adamubweresera wana ang’onoang’ono kuti awadalise* na kuwapempherera, koma wopfunzira wake adawakalipira.
14 Koma Yesu adawauza kuti: “Alekeni wana mwawo, ayi kuwalambiza kubwera kwa ine, ndawa Ufumu wa kudzulu ni wa wanthu ninge mwawa.”
15 Pamwapo adaikha manja yake pa wana mwawo ndipo adachoka kumuko.
16 Manje munthu munango adabwera kwa iye nkumubvunza kuti: “Mpfunzisi, ko ni vinthu vabwino viponi vaningafunike kuchita kuti nikagumane moyo wosapera?”
17 Iye adamudawira kuti: “Ndawa chani unkunibvunza pankhani ya vinthu vabwino? Pali m’bodzi yekha yemwe ni wabwino. Ndipomwapa, peno unkufuna kudzagumana moyo umbatewedze malamulo nthawe zose.”
18 Iye adabvunza kuti: “Malamulo yake yaponi?” Yesu adadawira kuti: “Ayi kupha munthu, ayi kuchita chigololo, ayi kumbaba, ayi kumbapereka umboni wabodza.
19 Mumbalemekeze ababa wanu na amayi wanu na yakuti umbakonde munzako ninge momwe udzikondera wekha.”
20 Mulumbwana ule adadawira Yesu kuti: “Nakhala ninkutewedza vose vimwevi, nchani pomwe chinango chomwe ninkufunika kuchita?”
21 Yesu adamuuza kuti: “Peno unkufuna kukhala wangwiro, yenda ukagulise katundu wako wose ndipo kobiri zake ukapase wosauka. Ukateno udzakhale na chuma kudzulu, basi ubwere manje umbadzanitewere.”
22 Mulumbwana ule padabva vimwevi, adachoka ali wokwinyirira ndawa wenze na chuma chizinji.
23 Pamwapo Yesu adauza wopfunzira wake kuti: “Shuwa ninkukuuzani, vidzakhale voshupa maninge kuti munthu wolemera akangene mu Ufumu wakudzulu.
24 Ndipo ninkukuuzani kuti, nivosashupa kuti ngamila ingene pakamubo ka ntsingano kusiyana nakuti munthu wolemera angene mu Ufumu wa Mulungu.”
25 Wopfunzira mwawo padabva vimwevi, adadabwa maninge ndipo adabvunza kuti: “Manje ni mbani angapulumuke?”
26 Yesu adawanyang’anisisa nkuwauza kuti: “Kwa wanthu vimwevi ni vosakwanisika, koma vinthu vose ni vokwanisika kwa Mulungu.”
27 Patsogolo pake Petulo adalewa kuti: “Onani! Isepano tasiya vinthu vose nkukulondolani, manje tidzagumane chani?”
28 Yesu adawauza kuti: “Shuwa ninkukuuzani, pa nthawe ya kulenga pomwe vinthu, Mwana wa munthu adzakhale pa mpando wake wachifumu waulemerero. Imwepo womwe mwakhala munkunilondola, mudzakhalembo m’mipando yachifumu 12 nkumbaweruza madzinza 12 ya Izirayeli.
29 Aliyese yemwe wasiya nyumba, azibale, azilongosi, ababa, amayi, wana panango minda ndawa ya dzina yangu, adzatambire vizinji kuingizira maulendo 100 kuposha vewenze navo ndipo adzagumane moyo wosapera.
30 “Koma azinji omwe enze woyamba adzakhale womalizira ndipo omalizira adzakhale woyamba.
Mawu ya m’nyantsi
^ Mu Chigiriki ni porneía. Onani matanthauzo ya mawu yanango.
^ Panango kuti: “awaikhe manja.”
