Wonembewa na Mateyu 2:1-23
2 Yesu padabadwa ku Betelehemu wa ku Yudeya panthawe yangatonga Mpfumu Herode,* wokhulupirira nyenyezi wochokera Kumachibese adabwera ku Yerusalemu.
2 Iwo adalewa kuti: “Ko mpfumu ya Ayuda yomwe yabadwa manjemanjepa iri kuponi? Ndawa petenze Kumachibese, tidawona nyenyezi yake ndipo tabwera kudzamugwadira.”
3 Mpfumu Herode na wanthu wose wokhala mu Yerusalemu padabva vimwevi, adakhala na nkhawa maninge.
4 Pamwapo Herode adachemeresa antsembe akulu na alembi wose wa wanthu, ndipo adawabvunza komwe Khrisitu* adzabadwire.
5 Iwo adamudawira kuti: “Adzabadwire ku Betelehemu wa ku Yudeya, ndawa mneneri adanemba vimwevi kuti:
6 ‘Iwe Betelehemu wa mudziko ya Yuda, ndiwe kathaundi kang’ono maninge pa mathaundi yose ya mu Yuda. Koma olo ni teno, mwa iwepo mudzabule ntongi yemwe adzabuse wanthu wangu Aizirayeli.’”
7 Pamwapo Herode adachemeresa mwachintsintsi wokhulupirira nyenyezi wale, ndipo adawabvunza mochenjera mpakana adadziwa nthawe chaiyo yomwe nyenyezi ire idawonekera.
8 Ndipo pakuwatumiza ku Betelehemu iye adawauza kuti: “Yendani mukamufagefage mwana muyo mosamala. Mukakamugumana mubwere mudzanidziwise kuti inembo niyende kukamugwadira.”
9 Padabva vomwe mpfumu idanena, adapitiriza ulendo wawo. Ndipo nyenyezi yomwe adaiwona ali Kumachibese ire, idawatsogolera mpakana nkukaima padzulu pa nyumba yomwe mwenze mwana muyo.
10 Padawona kuti nyenyezi ire yaima, adakondwa maninge.
11 Padangena mu nyumba mumo, adawona mwana ule na amayi wake Mariya, ndipo adagwada mpakana kumujolimira. Pamwapo adatenga chuma chawo nkuchipereka kwa mwana uyo, golide, lubani na mule ninge mphaso.
12 Koma pakuti Mulungu adawachenjeza m’maloto kuti ayi kuti ayende pomwe kwa Herode, iwo adabwerera kudziko ya kwawo na njira inango.
13 Wokhulupirira nyenyezi wale padachoka, mngelo wa Yahova* adawonekera kwa Yosefe m’maloto nkumuuza kuti: “Nyamuka, tenga mwana uyu na amayi wake ndipo uthawire ku Iguputo. Ukakhale kumuko kufikira nthawe yomwe nidzakuuze, ndawa Herode ankufuna kuyamba kufagafaga mwana moyu kuti amuphe.”
14 Pamwapo Yosefe adamuka usiku muyo, nkutenga mwana ule na amayi wake ndipo adachoka kumuko nkuyenda ku Iguputo.
15 Iye adakhala kumuko mpakana pomwe Herode adamwalira. Vimwevi vidakwanirisa vomwe Yahova* adanena pakuphatisa basa mneneri kuti: “Nidachemera mwana wangu kuti achokemo mu Iguputo.”
16 Pomwe Herode adawona kuti wokhulupirira nyenyezi wale amunamiza, adakalipa maninge. Pamwapo adatumiza wanthu kuti akaphe wana wose amuna m’Betelehemu na madera yake yose, kuyambira wa magole yawiri kubwera m’phompho. Adasalula kupha wana wa magole mwaya, mobverana na vomwe wokhulupirira nyenyezi wale adamuuza.
17 Mwevi vidakwanirisa mawu yomwe Mulungu adanena pakuphatisa basa mneneri Yeremiya kuti:
18 “Mawu yadabveka ku Rama. Kudabveka mawu yolira mokuwa na yopasa ntsisi. Wenze Rakele yemwe ambalilira wana wake ndipo ambafunalini kunyamalisiwa, ndawa yakuti wana wake enze kulibe.”
19 Herode padafa, mngelo wa Yahova* adawonekera kwa Yosefe ku Iguputo
20 ndipo adamuuza kuti: “Nyamuka, tenga mwana uyu na amayi wake ndipo uyende mu dziko ya Izirayeli, ndawa yemwe ambafuna kupha mwana moyu adafa.”
21 Pamwapo Yosefe adanyamuka nkutenga mwana ule na amayi wake nkukangena mudziko ya Izirayeli.
22 Koma padabva kuti Arikelao ndiye yemwe ankutonga m’malo mwa ababa wake Herode ku Yudeya, adachita mantha kuyenda kumuko. Ndipo pakuti Mulungu adamuchenjeza m’maloto, iye adayenda mudera ya Galileya.
23 Padafika kumuko, adakhala muthaundi yochemerewa kuti Nazareti kuti akwanirise mawu yomwe Mulungu adanena pakuphatisa basa mneneri wake kuti: “Iye adzachemerewe kuti Mnazareti.”
Mawu ya m’nyantsi
^ Onani matanthauzo ya mawu yanango.
^ Panango kuti: “Mesiya, Wodzodzewa.”
^ Onani vakumapeto A5.
^ Onani vakumapeto A5.
^ Onani vakumapeto A5.
