Wonembewa na Mateyu 21:1-46
21 Padasala pang’ono kufika ku Yerusalemu kuti afike ku Betefage pa Phiri ya Maolivi, Yesu adatuma wopfunzira wake awiri.
2 Iye adawauza kuti: “Yendani m’muyi womwe munkuuwona ule. Kumuko mukagumane bulu ali mangirire pabodzi na mwana wake mwamuna. Mukawamasule nkuwabweresa kwa ine.
3 Peno munthu angakubvunzeni, mukanene kuti: ‘Ambuya ankuwafuna.’ Ndipo nthawe mweyo akakupaseni kuti mukawabwerese kuno.”
4 Vimwevi vidachitikadi kuti vomwe Mulungu adanena pakuphatisa basa aneneri vikwanirisike, vakuti:
5 “Uzani mwana nkazi wa Ziyoni kuti: ‘Ona! Mpfumu yako inkubwera kuna iwepo. Ni yopfatsa ndipo yapakira bulu, yapakira mwana wa bulu mwamuna, mwana wa nyama yotakula mitolo.’”
6 Pamwapo wopfunzira wale adanyamuka nkukachita vomwe Yesu adawauza.
7 Iwo adabweresa bulu ule pabodzi na mwana wake mwamuna. Patsogolo pake adayanza malaya yawo yakunja pa abulu mwawo ndipo iye adakwera pa mwana wa bulu uyo.
8 Wanthu azinji omwe enze pamwapo adayanza malaya yawo yakunja munsewu ndipo anango ambagwata nthawi za miti nkuziyanza munsewu.
9 Ndipo gulu ya wanthu yomwe yenze patsogolo pake na m’mambuyo mwake imbakuwa kuti: “M’pulumuseni Mwana wa Davide! Wodalisiwa ni yemwe ankubwera mu dzina ya Yahova!* M’pulumuseni m’dzulum’dzulu umo!”
10 Padangena mu Yerusalemu, thaundi yose idagunduzika ndipo anango ambabvunza kuti: “Ko moyu ni mbani?”
11 Gulu ya wanthu mwawo idadawira kuti: “Moyu ni mneneri Yesu wochokera ku Nazareti ku Galileya!”
12 Pamwapo Yesu adangena mu kachisi nkuthamangisa wanthu wose womwe angagula na kugulisa vinthu mu kachisi mumo, ndipo adagwesa mameza ya wanthu womwe angachinja kobiri na kugwesa pomwe mipando ya wanthu womwe angagulisa nkhangaiwa.
13 Iye adawauza kuti: “Malemba yanena kuti: ‘Nyumba yangu idzachemerewe nyumba yopemphereramo,’ koma imwepo mwaisandusa mphako ya vigananga.”
14 Ndipo wanthu omwe enze na bvuto yosawona na wanthu wopunduka adabwera kwa iye nkachisi mumo ndipo adawapolesa.
15 Wantsembe akulu na alembi padawona vodabwisa vomwe iye ambachita na alumbwana womwe ambakuwa nkachisi mumo kuti: “M’pulumuseni Mwana wa Davide!,” adakalipa maninge
16 ndipo adamubvunza kuti: “Ko unkubva vomwe awa ankunena?” Yesu adadawira kuti: “Inde. Ko mulibe kuwerenga vimwevi kuti: ‘Mwachitisa kuti nkamwa mwa wana na mwa akacheche muchoke mawu yotamanda’?”
17 Patsogolo pake iye adawasiya nkuchoka muthaundi mumule nkuyenda ku Betaniya ndipo adagona kumuko.
18 Pangabwerera muthaundi mweire machibese maninge, adabva njala.
19 Patsogolo pake adawona muti wa nkuyu m’mbali mwa msewu ndipo padayenda mwapo alibe kugumana chirichose, koma masamba yokhayokha. Pamwapo adauza muti ule kuti: “Kuyambira lero udzaberekelini pomwe chipaso chirichose.” Ndipo nkuyu muyo udafoteratu nthawe mweyo.
20 Wopfunzira wake padawona vimwevi adadabwa nkulewa kuti: “Vakwanisika tani kuti nkuyu moyu ufote nthawe mweyi?”
21 Podawira, Yesu adawauza kuti: “Shuwa ninkukuuzani, peno mungakhale na chikhulupiriro ne kukaikira, mudzakwanise kuchita vomwe nachitira nkuyu moyu. Ndipo kuposha pamwapa, mudzakwanise kuuza phiri iyi kuti: ‘Choka pano udziponye mu nyanja,’ ndipo vidzachitikedi.
22 Vinthu vose vomwe mudzakumbire m’mapemphero yanu, mudzavitambire peno muna chikhulupiriro.”
23 Yesu padangena mu kachisi nkumbapfunzisa, wantsembe akulu komasoti akulu adabwera kwa iye nkumubvunza kuti: “Ko munaulamuliro wochitira vinthu vimwevi? Ndipo ni mbani yemwe adakupasani ulamuliro moyu?”
24 Yesu adawadawira kuti: “Inembo nikubvunzeni chinthu chibodzi. Mukanidawira chinthu chimwicho, inembo nikuuzeni yemwe adanipasa ulamuliro womwe nichitira vinthu vimwevi:
25 Ko ubatizo womwe Yohani ambachita udachokera kuponi? Kudzulu panango kwa wanthu?” Koma iwo adayamba kukambirana kuti: “Tikanena kuti: ‘Udachokera kudzulu,’ iye atibvunze kuti: ‘Manje ndawa chani mulibe kumukhulupirira?’
26 Ndipo tinganenelini kuti: ‘Udachokera kwa wanthu,’ ndawa tinkugopa gulu ya wanthu iyi, pakuti wose mwawa akhulupirira kuti Yohani wenze mneneri.”
27 Ndipomwapa adamudawira Yesu kuti: “Tinkudziwalini.” Nayembo adawauza kuti: “Inembo nikuuzenilini yemwe adanipasa ulamuliro womwe nichitira vinthu vimwevi.
28 “Ko munkuganiza tani? Munthu munango wenze na wana wake awiri. Ndipo adayenda kwa mwana wake woyamba nkumuuza kuti: ‘Mwanangu, lero uyende ukaphate basa kumunda wa uva.’
29 Iye adadawira kuti: ‘Niyendelini ine,’ koma patsogolo pake adachinja nzeru ndipo adayenda.
30 Patsogolo pake adayenda kwa mwana wachiwiri ule nkumuuza pomwe chibodzibodzi. Iye adadawira kuti: ‘Niyende ababa,’ koma alibe kuyenda.
31 Manje pa wana awiri mwawa, ni mbani yemwe adachita vomwe ababa wake ambafuna?” Iwo adadawira kuti: “Woyamba ule.” Yesu adawauza kuti: “Shuwa ninkukuuzani kuti wotsonkhesa mtsonkho na mahule ankukusiyani m’mambuyo nkukangena mu Ufumu wa Mulungu.
32 Ndawa Yohani adabwera kwa imwepo kudzakupfunzisani njira yachilungamo, koma imwepo mulibe kumukhulupirira. Koma wotsonkhesa mtsonkho na mahule adamukhulupirira. Podiya kuti imwepo mudawona vimwevi, mulibe kuchinja maganizo yanu nkuyamba kumukhulupirira.
33 “Tetekerani chitsanzo chinango: Penze munthu munango yemwe adalima munda wa uva nkumanga mpanda kuzungulira munda muyo. Koma adakumba pomwe chidindi choponderamo uva nkumanga gota.* Padateno adausiya m’manja mwa alimi nkuyenda kudziko inango.
34 Nthawe ya vipaso paidafika, adatumiza akapolo wake kwa alimi mwawo kuti akatenge vipaso vake.
35 Koma alimi mwawo adaphata akapolo wale ndipo m’bodzi adamumenya, munango adamupha ndipo munango adamuphwanya na minyala.
36 Adatumiza pomwe akapolo anango azinji kuposha woyamba wale, koma mwawa pomwe adawachita vibodzibodzi.
37 Pamapeto pake adawatumizira mwana wake nkunena kuti: ‘Mwana wangu yekha uyu akamulemekeze.’
38 Alimi mwawo padawona mwana uyo adayamba kukambirana kuti: ‘Yaa! Uyu ni ule yemwe adzatambire chuma cha m’banja. Naboni timuphe kuti chuma mwechi chikhale chathu!’
39 Pamwapo adamuphata nkumubulisa m’munda wa uva ule nkumupha.
40 Manje munikachiro wa munda wa uva ule akadzabwera adzachite nawo chani alimi wale?”
41 Iwo adadawira kuti: “Pakuti alimi mwawo ni woipa, iye adzawadzonge maninge ndipo munda wa uva muyo adzaupereke kwa alimi anango, omwe angamupase vipaso pa nthawe yake.”
42 Pamwapo Yesu adawauza kuti: “Pale Malemba yanena kuti: ‘Mwala womwe womanga nyumba adaulamba wakhala mwala wapakhona* wofunika maninge. Mwala moyu wachokera kwa Yahova* ndipo ni wodabwisa m’maso mwathu. Ko mulibe kuwerenga vimwevi’?
43 Ndipomwapa ninkukuuzani kuti Ufumu wa Mulungu udzachosewe kwa imwepo nkuperekewa ku ntundu wobereka vipaso.
44 Munthu yemwe adzagwere pa mwala muyo adzaphwanyike. Ndipo aliyese yemwe adzagwerewe na mwala muyo, adzachenekeke.”
45 Wantsembe akulu na Afalisi padabva vitsanzo vake vimwevi, adazindikira kuti ambanena iwo.
46 Koma olo kuti ambafuna kumuphata,* angagopa gulu ya wanthu ndawa yakuti wanthu mwawo ambakhulupirira kuti iye ni mneneri.
Mawu ya m’nyantsi
^ Onani vakumapeto A5.
^ Panango kuti: “dala.”
^ Onani matanthauzo ya mawu yanango.
^ Onani vakumapeto A5.
^ Panango kuti: “kumumanga.”
