Wonembewa na Mateyu 23:1-39
23 Pamwapo Yesu adauza gulu ya wanthu na wopfunzira wake kuti:
2 “Alembi na Afalisi adzikhazika pa mpando wa Mose.
3 Ndipomwapa mumbachite na kutewedza vinthu vose vomwe angakuuzeni. Koma ayi kumbachita vomwe iwo anchita, ndawa iwo andonena koma achitalini vomwe alewa ivo.
4 Iwo amanga mitolo yolemera nkusenzesa wanthu pa maphewa yawo, koma iwo anikachiro afunalini kugwinya mitolo mwayo na chala chawo.
5 Vose vomwe achita avichita kuti wanthu awaone. Iwo akulisa tumakasha tokhala na malemba tomwe avala ninge vodzitetezera, ndipo atalimphisa pomwe usalu woposa wa m’mphepete mwa vovala vawo.
6 Akonda malo yolemekezeka maninge pa chakudya cha maulo, na mipando yakutsogolo m’masunagoge.
7 Akonda pomwe kupasiwa moni m’mabazali nakuti wanthu ambawachemere kuti Mpfunzisi.*
8 Koma imwepo ayi kuti mumbachemerewe kuti Mpfunzisi, ndawa Mpfunzisi wanu ni m’bodzi yekha ndipo mose ndimwe abale.
9 Ndipo ayi kuti mumbachemere aliyese kuti ababa wanu padziko yapasi pano, ndawa Ababa wanu ni m’bodzi yekha yemwe akhala kudzulu.
10 Ayi kuti mumbachemerewe pomwe kuti atsogoleri, ndawa Mtsogoleri wanu ni m’bodzi Khrisitu.
11 Koma nkulu maninge pakati panu akhale ntumiki wanu.
12 Aliyese yemwe adzikwiza adzachitisiwe manyazi, koma aliyese yemwe adzichepesa adzalemekezewe.
13 “Tsoka kwa imwepo alembi na Afalisi, wanthu woipa imwe! Ndawa munkufunga Ufumu wakudzulu kuti wanthu osati angenemo. Pakuti imwepo munkungenamolini, munkulambiza omwe ankufuna kungenamo kuti osati angene.
14 * ——
15 “Tsoka kwa imwepo alembi na Afalisi, wanthu woipa imwe! Ndawa muyambuka nyanja na kufamba misenga italiitali kuti mukachinje munthu m’bodzi. Koma mukamuchinja mumuchitisa kuti akhale woyenerera kuthusiwa mu Gehena* kuposha imwepo.
16 “Tsoka kwa imwepo atsogoleri wosawona, womwe mulewa kuti: ‘Peno munthu watomola kachisi polumbira, palibe bvuto, koma peno munthu watomola golide wa mukachisi ankufunika kukwanirisa vawalumbira.’
17 Wanthu wopusa na wosawona imwe! Chofunika maninge nchiponi, golide panango kachisi yemwe achenesa golide muyo?
18 Ndipo mulewa pomwe kuti: ‘Peno munthu watomola guwa ya ntsembe polumbira, palibe bvuto, koma peno watomola mphaso iri pa guwa mwapo pakulumbira akwanirise lumbiro yake.’
19 Wanthu wosawona imwe! Chofunika maninge nchiponi, mphaso panango guwa ya ntsembe yomwe ichenesa mphaso mweyo?
20 Ndipomwapa yemwe watomola guwa ya ntsembe polumbira, walumbilira guwa mweyo na vinthu vose viri mwapo,
21 ndipo yemwe watomola kachisi polumbira, walumbilira kachisi muyo na Mulungu yemwe akhala mumo.
22 Ndipo aliyese yemwe watomola kudzulu polumbira, walumbilira mpando wachifumu wa Mulungu na Mulungu yemwe wakhala pa mpando muyo.
23 “Tsoka kwa imwepo alembi na Afalisi, wanthu woipa imwe! Ndawa mupereka chakhumi cha tumbewu twa minti, dilili na chitowe, koma munyalanyaza vinthu vofunika va nchilamulo vomwe ni chilungamo, chifundo na kukhulupirika. Nishuwadi kuti kupereka vinthu vimwevi ni kwabwino, koma ayi kumbanyalanyaza vinthu vinango.
24 Atsogoleri wosawona imwe, womwe mususa vakumwa vanu kuti muchosemo kanyerere koma mumeza ngamila.
25 “Tsoka kwa imwepo alembi na Afalisi, wanthu woipa imwe! Ndawa muli ninge khapu na mbale zomwe ni zotsuka kunja kokha koma nkati mwake ni mopsyipa. Nkati mwa mitima yanu mwadzala na dyera na kusadziletsa.
26 Mfalisi wosawona iwe, yamba wachenesa nkati mwa khapu na puleti, kuti kunja kwakembo kukhale kochena.
27 “Tsoka kwa imwepo alembi na Afalisi, wanthu woipa imwe! Ndawa mulingana na manda yopintali yomwe kunja kwake kuwoneka kukhuza, koma nkati mwake muli mabonzo* ya wanthu wakufa na vonyantsa va khaindi iriyose.
28 Molingana na vimwevi, imwepo pamaso pa wanthu muwonekambo ninge ndimwe wolungama, koma nkati mwanu ndimwe woipa ndipo mubveralini malamulo.
29 “Tsoka kwa imwepo alembi na Afalisi, wanthu woipa imwe! Ndawa mumanga manda ya aneneri na kukhuzisa manda* ya wanthu wolungama,
30 ndipo mulewa kuti: ‘Adakati tenzeko muntsiku za azibereki wathu sembe tilibe kudziimba mulandu wawo wakupha aneneri.’
31 Ndipomwapa, munkudzichitira mwekha umboni kuti ndimwe wana wa wanthu womwe adapha aneneri.
32 Manje malizisani basa yomwe azibereki wanu adaiyamba.
33 “Nyoka za wanthu, wana wa vipiri. Mudzakwanise tani kuthawa chiweruzo cha Gehena?*
34 Ndipomwapa ninkukutumizirani aneneri, wanthu wanzeru na apfunzisi. Anango wa iwo mudzawaphe nkuwamanika pa muti ndipo anango mudzawakwapule m’masunagoge mwanu na kuwadzudza m’mathaundi,
35 kuti magazi yose ya wanthu wolungama womwe adaphewa padziko yapasi yabwerere kwa imwepo. Kuchokera magazi ya Abele wolungama, mpakana magazi ya Zekariya mwana wa Barakiya, yemwe imwepo mudamupha pakati pa nyumba yopatulika na guwa ya ntsembe.
36 Shuwa ninkukuuzani kuti m’badwo moyu udzadawire mulandu wa vinthu vose vimwevi.
37 “Yerusalemu, Yerusalemu wakupha aneneri iwe na wophwanya wanthu na minyala wotumiziwa kwa iwepo. Mobwerezabwereza nimbafuna kuunganidza wana wako pabodzi, ninge momwe nkhuku iunganidzira wana wake m’maphaphiro. Koma wanthu imwe mulibe kufuna kuchita vimwevo.
38 Manje bvani! Mulungu wachoka nkukusiirani nyumba yanu mweyi.*
39 Shuwa ninkukuuzani, kuyambira manjeuno mudzaniwonelini pomwe mpaka pomwe mudzalewe kuti: ‘Wodalisiwa ni yemwe ankubwera mudzina ya Yahova!’”*
Mawu ya m’nyantsi
^ Panango kuti: “Rabi.”
^ Onani vakumapeto A3.
^ Onani matanthauzo ya mawu yanango.
^ Panango kuti: “mapfupa.”
^ Panango kuti: “manda ya chikumbuso.”
^ Onani matanthauzo ya mawu yanango.
^ Panango kuti: “iri matongwe.”
^ Onani vakumapeto A5.
