Wonembewa na Mateyu 25:1-46
25 “Ufumu wa kudzulu, tingaulinganize na anamwali 10 womwe atenga makandyero yawo nkuyenda kukachunguzira mwamuna yemwe ankulowola.
2 Anamwali 5 enze wopusa ndipo 5 enze wochenjera.*
3 Opusa mwawo adatenga makandyero yawo koma alibe kutenga mafuta yapambali.
4 Koma wochenjera wale adatenga mafuta yapambali m’mabotolo yawo pabodzi na makandyero yawo.
5 Pakuti mwamuna yemwe ambalowola ule adachebwa, wose adayamba kuyodzira ndipo adagona.
6 Pakati pa usiku padabveka mawu yokuwa yakuti: ‘Mwamuna ule wafika! Bulani mukamuchunguzire.’
7 Nthawe mweyo anamwali wose wale adamuka nkukonza makandyero yawo.
8 Wopusa wale adauza wochenjera kuti: ‘Tipasenkoni mafuta yanu ndawa makandyero yathu yakhala pang’ono kuthimwa.’
9 Wochenjera wale adadawira kuti: ‘Panango tikakupasani yatikwanirembolini. Yendani kwa wogulisa kuti mukagulembo yanu.’
10 Padachoka kuti akagule mafuta yawo, mwamuna yemwe ambalowola ule adafika. Anamwali womwe enze wokonzeka wale adangena naye pabodzi m’nyumba momwe mwenze phwando ya ukwati ndipo nsuwo udafungiwa.
11 Patsogolo pake anamwali anango wale adafikambo nkulewa kuti: ‘Ambuya, Ambuya tifungulireni!’
12 Iye adawadawira kuti: ‘Nikudziwanilini olo pang’ono.’
13 “Ndipomwapa pitirizani kukhala maso ndawa munkudziwalini ntsiku panango nthawe yake.
14 “Ndawa viri ninge munthu yemwe ambafuna kuyenda ku dziko inango, ndipo adachemeresa akapolo wake nkuwasungisa chuma chake.
15 Woyamba adamupasa kobiri zokwana matalente 5,* wachiwiri adamupasa matalente yawiri ndipo wachitatu adamupasa talente ibodzi. Aliyese adamupasa mobverana na luso yake ndipo iye adayenda kudziko inango.
16 Nthawe mwiyo yemwe adatambira matalente 5 ule adachoka nkukachita bizi ndipo adagumana pomwe matalente yanango 5.
17 N’chibodzibodzi pomwe na yemwe adatambira matalente yawiri ule, adagumana pomwe matalente yanango yawiri.
18 Koma kapolo yemwe adatambira ibodzi ule adayenda kukakumba pasi nkubisa kobiri* ya abwana wake.
19 “Paidapita nthawe ikulu, abwana wa akapolo wale adabwera nkuwerengerana nawo kobiri.
20 Pamwapo yemwe adatambira matalente 5 ule adabwera na matalente yanango 5 yoingizira, nkulewa kuti: ‘Abwana, pale mudanipasa matalente 5, manje onani naphindula pomwe matalente yanango 5.’
21 Bwana wake ule adamudawira kuti: ‘Wachita bwino maninge, ndiwe kapolo wabwino na wokhulupirika. Udakhulupirika pa vinthu vochepa, manje nikuikhe kuti umbanyang’anire vinthu vizinji. Kondwa nane pabodzi ine bwana wako.’
22 Patsogolo pake kudabwera kapolo yemwe adatambira matalente yawiri ule nkulewa kuti: ‘Abwana, pale mudanipasa matalente yawiri, koma onani, naphindula pomwe matalente yanango yawiri.’
23 Bwana wake adamudawira kuti: ‘Wachita bwino maninge, ndiwe kapolo wabwino na wokhulupirika! Udakhulupirika pa vinthu vochepa, nikuikhe kuti umbanyang’anire vinthu vizinji. Kondwa nane pabodzi ine bwana wako.’
24 “Pamapeto pake kudabwera kapolo ule yemwe adatambira talente ibodzi ndipo adati: ‘Abwana, nimbadziwa kuti imwepo ndimwe munthu woshupa. Mukolola pomwe mulibe kubzala, ndipo muunganidza tirigu pomwe mulibe kumwaza.
25 Ndipomwapa inepano nidachita mantha ndipo nidayenda kukabisa talente yanu ire pasi. Aneni kobiri yanu iyi, tambirani.’
26 Bwana wake ule adamudawira kuti: ‘Kapolo woipa na waulesi iwe! Wati umbadziwa kuti inepano nikukolola pomwe niribe kulima na kuunganiza tirigu pomwe niribe kumwaza?
27 Vidakakhala bwino sembe udasungisa kobiri zangu mwezi kwa wanthu wosunga kobiri ndipo inepano pakubwera nidakazitambira kobiri* zangu mwezi na kalowa.
28 “‘Ndipomwapa mutengereni talente mweyo ndipo muipereke kwa ule yemwe anamatalente 10.
29 Ndawa aliyese yemwe anazo, adzapasiwe zinango zizinji ndipo adzakhale na zizinji. Koma yemwe alibe adzatengerewe olo zomwe anazo.
30 Muponyeni kapolo alibe na basa moyu kunja ku mdima. Kumuko adzalire na kukukuta manu.’
31 “Mwana wa munthu akadzabwera mu ulemerero wake pabodzi na angelo wose, adzakhale pa mpando wake wachifumu waulemerero.
32 Makhaindi yose ya wanthu yadzasonkhanisiwe kwa iye ndipo adzalekanise wanthu ninge momwe nyakabusa akhetera nkhosa na mbuzi.
33 Adzaikhe nkhosa ku djanja yake ya makulu, koma mbuzi adzaziikhe ku djanja yake yamadzere.
34 “Patsogolo pake Mpfumu idzauze womwe ali kudjanja yake yamakulu kuti: ‘Bwerani imwepo womwe mwadalisiwa na Ababa wangu. Ngenani mu Ufumu womwe adakukonzerani kuchokera pa chiyambi cha dziko yapasi.
35 Ndawa nidabva njala koma imwepo mudanipasa chakudya. Nidabva nyota koma imwepo mudanipasa chakumwa. Nenze mulendo koma imwepo mudanitambira bwino.
36 Nenze chadje* koma imwepo mudanivazika. Nidadwala koma imwepo mudanisamalira. Nenze mudjeri koma imwepo mudabwera kudzaniwona.’
37 Pamwapo wolungama mwawo adzamudawire kuti: ‘Ambuya, nilini pomwe tidakuwonani munanjala ise nkukudyesani, panango munanyota ise nkukupasani chakumwa?
38 Nilini pomwe tidakuwonani muli mulendo ise nkukutambirani bwino, panango nilini pomwe tidakuwonani muli chadje ise nkukuvazikani?
39 Nilini pomwe tidakuwonani munkudwala panango tidabwera nthawe zanyi kudzakuwonani mudjeri?’
40 Koma Mpfumu mwiyo pakudawira idzawauze kuti: ‘Shuwa ninkukuuzani, nthawe iriyose yomwe mudachitira vimwevi m’bodzi mwa abale wangu mwawa ang’ono, mudachitira pomwe inepano.’
41 “Patsogolo pake adzauze womwe ali kumadzere kwake kuti: ‘Chokani pamaso pangu wanthu wotembererewa imwe, yendani kumoto wosamala womwe wakonzerewa Ndyerekezi na angelo wake.
42 Ndawa nidabva njala koma imwepo mulibe kunipasa chakudya. Nidabva nyota koma imwepo mulibe kunipasa chakumwa.
43 Nenze mulendo koma imwepo mulibe kunitambira bwino. Nenze chadje koma imwepo mulibe kunivazika. Nidadwala na kukhala mudjeri koma imwepo mulibe kunisamalira.’
44 Iwo adzadawirembo kuti: ‘Ambuya, nilini pomwe tidakuwonani munanjala panango munanyota panango muli mulendo panango muli chadje panango munkudwala panango muli mudjeri ise osakutumikirani?’
45 Pamwapo iye adzawadawire kuti: ‘Shuwa ninkukuuzani, nthawe iriyose yomwe mulibe kuchitira vimwevo m’bodzi mwa ang’ono awa, mulibe kuchitirambo inepano.’
46 Wanthu mwawa adzadzongewe mpakana kalekale, koma wolungama adzapasiwe moyo wosapera.’’
Mawu ya m’nyantsi
^ Panango kuti: “wanzeru.”
^ Talente ibodzi ya Chigiriki imbalemera 20,4 kg. Onani vakumapeto B14.
^ Kobiri mweyi yenze ya siliva.
^ Kobiri mwezi zenze za siliva.
^ Panango kuti: “na chovala chankati chokha.”
