Wonembewa na Mateyu 26:1-75
-
Wantsembe ankukonzekera kupha Yesu (1-5)
-
Yesu ankudzolekewa mafuta yonunkhira (6-13)
-
Phasika womalizira na kuperekewa kwa Yesu (14-25)
-
Kuyambisa mwambo wa Chakudya cha Maulo cha Ambuya (26-30)
-
Ankuleweratu kuti Petulo amulambe (31-35)
-
Yesu ankupemphera m’munda wa Getsemane (36-46)
-
Yesu ankumangiwa (47-56)
-
Kudzudziwa patsogolo pakuti amuchosa ku khoti ikulu ya Ayuda (57-68)
-
Petulo ankulamba Yesu (69-75)
26 Yesu padamaliza kulewa vose vimwevi, adauza wopfunzira wake kuti:
2 “Imwepo munkudziwa kuti Pasika achitike pakandopita ntsiku ziwiri ndipo Mwana wa munthu aperekewe kuti amanikiwe.”
3 Panthawe mweyi, wantsembe akulu komasoti akulu adasonkhana panja pa nyumba ya nkulu wa antsembe dzina yake Kayafa.
4 Iwo adapangana vakuti amuphate* Yesu mochenjera nkumupha.
5 Koma iwo ambanena kuti: “Osati timuphatire pa phwando kuchitira kuti wanthu angachite chipiringu.”
6 Pa nthawe yomwe Yesu wenze ku Betaniya mu nyumba ya Simoni wa khate,
7 kudafika mayi munango na botolo yokonzewa na mwala wa alabasitala muli mafuta yonunkhira yodula maninge ndipo adayamba kuthira mafuta mwayo munsolo mwa Yesu pomwe iye angadya pa meza.
8 Wopfunzira wake padawona vimwevi adakalipa nkulewa kuti: “Ankudzongeranyi mafuta mwaya?
9 Mafuta mwaya yadakagulisiwa kobiri zizinji ndipo kobiri mwezo zidakaperekewa kwa wanthu wosauka.”
10 Yesu adadziwa vimwevi ndipo adawauza kuti: “Ndawa chani munkumushupa mayi moyu? Iye wanichitira vinthu vabwino.
11 Wosauka mwawa munawo nthawe zose, koma inepano mudzakhalelini nane nthawe zose.
12 Vomwe mayi muyu wachita pakuthira mafuta yonunkhira mwaya pa thupi yangu, wavichita pakukonzekera kuikhiwa kwangu m’manda.
13 Shuwa ninkukuuzani, kulikose komwe ntontholo wabwino udzalalikiriwe padziko yose, wanthu ambadzalewe vomwe mayi moyu wachita kuti ambadzamukumbukire.”
14 Pamwapo m’bodzi wa wopfunzira 12 wale, yemwe angadziwika kuti Yudasi Sikariyoti, adayenda kwa wantsembe akulu
15 nkuwabvunza kuti: “Ko mudzanipase chani nikamupereka kwa imwepo?” Iwo adamupolomisa kuti adzamupase kobiri zasiliva zokwana 30.
16 Ndipomwapa, kundoyambira nthawe mweyo, ambafagafaga mpata wabwino kuti amupereke.
17 Pa ntsiku yoyamba ya chikondwerero cha Mikate Yalibe Vofufumisa, wopfunzira adabwera kwa Yesu nkumubvunza kuti: “Ko munkufuna kuti tikakukonzereni kuponi malo yodyerako Pasika?”
18 Iye adati: “Yendani mu thaundi ya munthu watenetene ndipo mukamuuze kuti: ‘Mpfunzisi walewa kuti: “Nthawe yangu yoikhiwiratu yafendera. Nidzachite phwando ya Pasika pabodzi na wopfunzira wangu kumuyi kwako.”’”
19 Pamwapo wopfunzira mwawo adachitadi mobverana na vomwe Yesu adawauza ndipo adakonza vinthu vose vofunika pa Pasika.
20 Nthawe ya maulo, iye na wopfunzira wake 12 wale adakhala pa meza nkumbadya chakudya.
21 Pangadya chakudya chimwecho, iye adanena kuti: “Shuwa ninkukuuzani, m’bodzi wa imwepo anipereke.”
22 Ndawa ya kukwinyirira maninge na vimwevi, aliyese adayamba kumubvunza kuti: “Ambuya, ko ningakhale ine?”
23 Iye adadawira kuti: “Yemwe ankusaiza nane pabodzi mu puleti mweyi ndiye wati anipereke.
24 Shuwadi, Mwana wa munthu achoke, mobverana na vomwe Malemba yafotokoza pakulewa va iye. Koma tsoka kwa munthu yemwe ankupereka Mwana wa munthu! Vidakakhala bwino adakati munthu moyu alibe kubadwa.”
25 Yudasi yemwe wenze adasala pang’ono kumupereka adadawira kuti: “Mpfunzisi, kuti ningakhale ine?” Yesu adamudawira kuti: “Walewa wekha.”
26 Ankupitiriza kudya, Yesu adatenga nkate ndipo padapemphera kwa Mulungu adaunyemanyema nkuupereka kwa wopfunzira wake. Iye adalewa kuti: “Aneni dyani. Nkate moyu unkuimira thupi yangu.”
27 Patsogolo pake adatenga khapu ya vinyu ndipo padapemphera, adaipereka kwa iwo nkulewa kuti: “Mwani mose.
28 Vinyu moyu unkuimira ‘magazi yangu ya pangano,’ yomwe yadzakhesewe ndawa ya wanthu azinji kuti machimo yakhululukiriwe.
29 Koma ninkukuuzani kuti: Nidzamwelini pomwe chakumwa chilichose chochokera ku muti wa uva ninge chimwechi mpakana ntsiku yomwe nidzamwe chinyowani pabodzi na imwepo mu Ufumu wa Ababa wangu.”
30 Pamapeto pake, padamaliza kuimba nyimbo zotamanda Mulungu, adabula nkuyenda kuphiri ya Maolivi.
31 Patsogolo pake Yesu adawauza kuti: “Mose imwepo muthawe nkunisiya nekha usiku uno, ndawa Malemba yalewa kuti: ‘Nidzaphe nyakabusa ndipo nkhosa za mugulu mwiyo zidzamwazikane.’
32 Koma nikadzamuka kwa wakufa, nidzatsogole kukafika ku Galileya imwepo mukanati mwafikako.”
33 Koma Petulo adamudawira kuti: “Podiya anango wose awa athawe nkukusiyani, ine nekha ningathawelini!”
34 Yesu adamuuza kuti: “Shuwa ninkukuuza iwe, usiku mouno tambala akanati kulira, unilambe katatu.”
35 Petulo adadawira kuti: “Peno nkufa, inepano nife namwe pabodzi, ningakulambenilini.” Wopfunzira anango wose adalewambo chibodzibodzi.
36 Patsogolo pake Yesu adafika nawo pa malo yochemerewa kuti Getsemane, ndipo adauza wopfunzira mwawo kuti: “Khazikikani pano, inepano ninkuyenda uko kukapemphera.”
37 Pakuyenda kumuko, adatenga Petulo na wana awiri wa Zebedayo. Ndipo adayamba kukwinyirira na kuwawiwa maninge mu ntima mwake.
38 Patsogolo pake adawauza kuti: “Inepano ndine wokwinyirira maninge mpakana kufuna kufa. Khalani pampano ndipo mupitirize kukhala maso pabodzi na inepano.”
39 Padayenda patsogolo pang’ono, adagwada mpakana nkhope yake pasi ndipo adapemphera kuti: “Ababa wangu, peno ni vokwanisika bvumani kuti khapu mweyi inipitirire. Koma osati mwakufuna kwangu, koma mwakufuna kwanu.”
40 Padateno, adabwerera pamalo penze wopfunzira wake wale ndipo adawagumana ankugona. Pamwapo adabvunza Petulo kuti: “Shuwa munkukangira kupitiriza kukhala nane maso kwa ora ibodzi basi?
41 Khalani maso ndipo mupitilize kupemphera kuti osati mugonje pa mayesero. Shuwadi, mzimu ni wofunisisa, koma thupi ni yofoka.”
42 Adachoka pomwe kachiwiri nkuyenda kukapemphera kuti: “Ababa wangu, peno vingakwanisikelini kuti khapu mweyi inipitirire mpakana nimwe, vomwe imwepo munkufuna vichitike.”
43 Padabwerera adawagumana pomwe ankugona, ndawa vikope vawo venze vidalemera.
44 Pamwapo adawasiya nkuyenda kukapemphera pomwe kachitatu ndipo adabwerezera mawu mwayale basi.
45 Patsogolo pake adabwerera kwa wopfunzira wale nkuwauza kuti: “Shuwa nthawe ninge ino munkugona na kupumula? Onani! Nthawe yakuti Mwana wa munthu aperekewe m’manja mwa wanthu wochimwa yafendera.
46 Nyamukani, naboni timbayende. Onani! Wonipereka ule ali pafupi.”
47 Akalibe nakumaliza kuyankhula, Yudasi m’bodzi mwa wopfunzira 12 wale adafika pabodzi na gulu ikulu ya wanthu kuchokera kwa wantsembe akulu komasoti akulu, ali takule vibemba na vimibonga.
48 Panthawe mweyi nkuti womupereka muyo wenze adawapasa chizindikiro chakuti: “Yemwe wati nikamubejali, ni muyoletu mukamuphate.”
49 Padafika, Yudasi adandoti sitiriti pana Yesu nkulewa kuti: “Mwachoma tani Mpfunzisi?” Ndipo adamubejali.
50 Koma Yesu adamubvunza kuti: “Ko wabwera kudzachita chani kuno?” Nthawe mwiyoletu iwo adafendera nkuphata Yesu achimumangiratu.
51 Koma m’bodzi pa wanthu womwe enze na Yesu adasolola chibemba chake nkutema nacho kapolo wa nkulu wa wantsembe mpakana kugwatiratu dzitu yake.
52 Pamwapo Yesu adamuuza kuti: “Bwezera chibemba chako muchimake, ndawa wose wophata chibemba adzafe na chibemba.
53 Panango ukuganiza kuti ningakumbirelini Ababa wangu kuti anitumizire magulu yankhondo yoposha 12 ya angelo manje so?
54 Koma ko nikachita vimwevi, manje Malemba yomwe yalewa kuti vimwevi vifunika kuchitika yadzakwanirisiwe tani?”
55 Nthawe mweyoletu Yesu adabvunza gulu ya wanthu ile kuti: “Ndawa chani mwabwera kudzaniphata munavibemba na vimibonga ninge kuti mukuyenda kukalimbana na chigananga? Ntsiku iliyose nimbakhala pasi mu kachisi nkumbapfunzisa, koma mulibe kuniphata.
56 Koma vose vimwevi vachitika kuti vomwe aneneri adanemba vikwanirisike.” Patsogolo pake, wopfunzira wake wose adamuthawa nkumusiya yekha.
57 Wanthu womwe adaphata Yesu wale adayenda naye kwa Kayafa nkulu wa wantsembe, komwe kwenze kudasonkhana alembi na akulu.
58 Koma Petulo adapitiriza kumutewera chapatali, mpakana adafikambo pa nyumba pa nkulu wa wantsembe ule. Padangena nkati mumo, adakhala pasi pabodzi na anyabasa wa pamuyi mwapo kuti awone vati vichitike.
59 Pamwapo wantsembe akulu na wa mu Tiribunali yose ikulu ya Ayuda* angafagafaga umboni wabodza kuti anamizire Yesu mulandu na cholinga chakuti amuphe.
60 Koma alibe kugumana umboni uliwose podiya kuti kudabwera mboni zizinji zonama. Patsogolo pake kudabwera mboni zinango ziwiri
61 nkulewa kuti: “Munthu moyu adalewa kuti: ‘Ningakwanise kugwesa kachisi wa Mulungu nkumumanga pomwe mu ntsiku zitatu.’”
62 Padabva vimwevo, nkulu wa wantsembe adaimirira nkumubvunza kuti: “Ko udawirelini? Ko unkubvalini vomwe wanthu mwawa ankukunamizira?”
63 Koma Yesu adandokhala chete. Pamwapo nkulu wa wantsembe adamuuza kuti: “Ninkukulumbirisa pali Mulungu wamoyo, utiuze peno ndiwedi Khrisitu Mwana wa Mulungu!”
64 Yesu adamudawira kuti: “Mwalewa mwekha. Koma ninkukuuzani kuti: Kuyambira manjeuno mpakana mtsogolo mudzawone Mwana wa munthu alikhale ku djanja ya makulu yamphanvu. Mudzamuwone pomwe ankubwera pa mitambo yakudzulu.”
65 Pamwapo nkulu wa wantsembe adang’amba malaya yake yakunja nkulewa kuti: “Wanyoza Mulungu! Ko tingafune pomwe mboni zinango pamwapa? Mwachita kudzibvera mwekha momwe ankunyozera Mulungu.
66 Manje imwepo munkuwona tani pamwapa?” Iwo adadawira kuti: “Ankufunikana kufa basi.”
67 Pamwapo adayamba kumulavulira mata kunkhope kwake nkumumenya mafaiti. Anango ambamukwantsa mbama
68 nkulewa kuti: “Lota tiwone peno ndiwe Khrisitu. Nimbani wakumenya?”
69 Manje Petulo wenze adakhala pasi pamuyi mwapo ndipo mtsikana munango yemwe wenze nyabasa adabwera kwa iye nkulewa kuti: “Imwepo mwenzembo na Yesu wa ku Galileya moyu!”
70 Koma iye adalamba pamaso pa wose kuti: “Ninkudziwalini vomwe unkulewa.”
71 Padabula nkuyenda pa kanyumba ka pa nsuwo wa mpanda, mtsikana munango adamuzindikira nkuuza anango womwe enze pafupi kuti: “Akulu awa enzembo pabodzi na Yesu wa ku Nazareti uyu.”
72 Pamwapa Petulo adalamba pomwe mochita kulumbira ndipo adanena kuti: “Shuwadi ine, munthu moyu nimudziwalini ne pang’ono!”
73 Pakadapita kanthawe pang’ono, yemwe wenze imilire pafupi adabwera nkumuuza Petulo kuti: “Shuwa, iwepo ulimbo mu gulu ya wopfunzira wake, ndipo kayankhulidwe kako kakuphatisa.”
74 Pamwapo iye adayamba kutemberera na kulumbira kuti: “Munthu moyu inepano ninkumudziwalini!” Pa nthawe mweyo tambala adalira.
75 Pamwapo Petulo adakumbukira mawu ya Yesu yale yakuti: “Tambala akanati walira, udzanilambe katatu.” Ndipo adabula panja nkuyamba kulira mowawiwa ntima maninge.
