Wonembewa na Mateyu 28:1-20
28 Ntsiku ya Satade paidamala, kumadandakucha kwa ntsiku yoyamba ya sondo mweyo, Mariya wa ku Magadala na Mariya munango ule adabwera kudzawona pomwe Yesu adaikhiwa.
2 Padafika pafupi, adazindikira kuti pachitika chivomezi champhanvu ndawa mngelo wa Yahova* adabwera kuchoka kudzulu ndipo adafika nkukunkhuliza chimwala chile nkukhala pachimwala mwapo.
3 Mngelo muyo ambawoneka ninge kaphaliwali ndipo vovala vake venze vochena maninge.
4 Masocha yomwe yangadikhirira pa manda yale, yadachita mantha na mngelo muyo ndipo yadanjenjemera nkuuma gwa ninge yafa.
5 Koma mngelo muyo adauza azimayi wale kuti: “Imwepo ayi kuti muchite mantha, ndawa ninkudziwa kuti munkufaga Yesu yemwe adaphewa mwa kuchita kumanikiwa pa muti.
6 M’manda muno mulibe ndawa wamukisiwa ninge momwe iye adalewera. Bwerani muwone pewenze adaikhiwa.
7 Ndipo yendani mwakankulumize kukauza wopfunzira wake kuti wamukisiwa kwa wakufa ndipo patinkulewa pano watsogola kuyenda ku Galileya. Kumuko mukamugumane. Moyu ni ntontholo wangu kwa imwepo.”
8 Pamwapo iwo adachoka mwakankulumize pa manda mwapo anamantha komasoti ali wokondwa maninge ndipo adathamanga kukauza wopfunzira wake.
9 Mwadzidzidzi Yesu adagumana nawo nkulewa kuti: “Mulitani azimayi!” Pamwapo iwo adafendera pafupi nkumuphata minyendo yake ndipo adamujolimira mpakana nkhope zawo pasi.
10 Pamwapo Yesu adawauza kuti: “Ayi kugopa! Yendani mukauze abale wangu kuti ayende ku Galileya ndipo akaniwone kumuko.”
11 Pomwe ambayenda, anango mwa magwarda yale adayenda mu thaundi ndipo adakauza wantsembe akulu vose vomwe vidachitika.
12 Wantsembe akulu mwawo padagumana na akulu nkukambirana, adapangana vochita ndipo adapereka kobiri zizinji za siliva kwa masocha mwayo
13 nkuyauza kuti: ‘Mumbalewe kuti: ‘Wopfunzira wake enze abwera usiku kudzamuba isepano petenze gone.’
14 Peno governador abve vimwevi, imwepo ayi kukhala na nkhawa timufotokozere nkhani yose.”
15 Pamwapo adatenga kobiri za siliva zire nkuchita mobverana na vomwe adawauza ndipo nkhani mweyi ni yodziwika maninge pakati pa Ayuda mpakana lero.
16 Koma wopfunzira 11 adayenda ku Galileya, kuphiri komwe Yesu adawauza kuti akagumane nawo.
17 Padamuwona adamugwadira* koma anango ambatsimikizalini kuti wenzedi Yesu.
18 Pamwapo Yesu adawafenderera nkuwauza kuti: “Ulamuliro wose waperekewa kwa inepano kudzulu na padziko yapasi.
19 Ndipomwapa, yendani mukapfunzise wanthu wa makhaindi yose kuti akhale wopfunzira wangu. Mumbawabatize mudzina ya Ababa, ya Mwana na ya mzimu uchena,
20 ndipo mumbawapfunzise kuti ambaphatise basa vinthu vose vomwe nidakulamulani. Ndipo dziwani kuti inepano nilinamwe pabodzi ntsiku zose mpakana mapeto ya nthawe ino.”
