Wonembewa na Mateyu 3:1-17
3 Mu ntsiku mwazire, Yohani M’batizi adayenda mu chipululu cha Yudeya nkuyamba kulalikira.
2 Iye ambalalikira kuti: “Lapani, ndawa Ufumu wa kudzulu wafendera.”
3 Mneneri Yesaya adafotokozeratu va iye m’mawu yakuti: “Munthu munango ankukuwa mu chipululu kuti: ‘Konzani njira ya Yahova!* Muthamule misewu yake.’”
4 Yohani ambavala chovala cha ukuse wa ngamila na bande ya chikumba nchiuno mwake ndipo ambadya abombo* na uchi.
5 Wanthu wochokera ku Yerusalemu na madera yose ku Yudeya pabodzi na wochokera m’mamiyi yose yapafupi na Yorodano angayenda kwa iye.
6 Iye ambawabatiza mu kamadzi ka Yorodano ndipo wanthu mwawo ambaulula machimo yawo pachena.
7 Yohani padawona Afalisi na Asaduki azinji ankubwera ku ubatizo moyu, adawauza kuti: “Wana wa nyoka imwe, mbani wakuchenjezani kuti muthawe ukali womwe unkubwera uyu?
8 Peno nteno, balani vipaso vowonesa kuti mwalapadi.
9 Ayi kumbadzinamiza kuti: ‘Ise ababa wathu ni Abulahamu.’ Ndawa ninkukuuzani kuti Mulungu angakwanise kukonzera Abulahamu wana kuchokera kuminyala yamunkuwona aya.
10 Mbadzo yaikhiwa kale pa mizu ya miti. Ndipomwapa, muti uliwose womwe ubalalini vipaso vabwino, ugwatiwa nkuthusiwa pa moto.
11 Ine ninkukubatizani m’madzi ndawa yakuti mwalapa, koma yemwe ankubwera m’mambuyo mwangu anamphanvu maninge kuposha inepano, ndipo ndinelini woyenerera kuvula ntsapato zake. Iye adzakubatizeni na mzimu uchena komasoti na moto.
12 Fosholo* yake youluzira mungu iri m’manja mwake, ndipo malo yake yopulirapo mbewu adzayachenese kuti mbee! Tirigu adzamututire mu nkhokwe, koma mungu udzashokewe na moto womwe ungadzimwiwelini.”
13 Patsogolo pake Yesu adayenda kwa Yohani ku Yorodano kuchokera ku Galileya kuti iye akamubatize.
14 Koma Yohani adayesa kumulambiza nkulewa kuti: “Inepano ndine ninfunika kubatiziwa na imwepo, ndawa chani munkubwera kwa inepano?”
15 Yesu adamudawira kuti: “Panthawe ino yokha bvuma kuti vikhale teno, ndawa tinkufunika kuchita vimwevi kuti tikwanirise chilungamo chose.” Padandomuuza vimwevi, iye adaleka kumulambiza.
16 Padabatizika, nthawe mweyo Yesu adavuuluka m’madzi. Pamwapo kudzulu kudafunguka ndipo Yohani adawona mzimu wa Mulungu unkubuluka ninge nkhangaiwa nkudzamutera.
17 Padabveka pomwe mawu yochokera kudzulu yolewa kuti: “Uyu ni Mwana wangu wapamoyo ndipo anikondweresa maninge.”
Mawu ya m’nyantsi
^ Onani vakumapeto A5.
^ Panango kuti: “dzombe.”
^ Vinkuoneka kuti fosholo mweyi imbakonzewa na matabwa ndipo ambaiphatisira basa pakuuluzira mungu wa mbewu mu nthawe yakale.
