Wonembewa na Mateyu 4:1-25
4 Patsogolo pake mzimu udatsogolera Yesu ku chipululu ndipo kumuko adayesewa na Ndyerekezi.
2 Iye adamala ntsiku 40 usiku na masikati osadya kanthu ndipo adabva njala.
3 Pamwapo Woyesa ule adabwera ndipo adamuuza kuti: “Peno ndimwedi mwana wa Mulungu, uzani minyala aya kuti yasanduke mikate.”
4 Koma iye adamudawira kuti: “Malemba yanena kuti: ‘Munthu angakhalelini na moyo na chakudya chokha, koma na mawu yaliyose yochokera nkamwa mwa Yahova.’”*
5 Patsogolo pake Ndyerekezi adamutenga nkuyenda naye muthaundi ichena, ndipo adamukwiza padzulu pa chipupa cha mpanda wa kachisi
6 nkumuuza kuti: “Peno ndimwedi mwana wa Mulungu, mudzithuse pasi ndawa Malemba yanena kuti: ‘Iye adzalamule angelo wake va imwepo,’ ndipo yalewa pomwe kuti: ‘Adzakutakuleni na manja yawo kuti phazi yanu osati imenye mwala.’”
7 Koma Yesu adamudawira kuti: “Malemba yanena pomwe kuti: ‘Ayi kumbamuyesa Yahova* Mulungu wanu.’”
8 Patsogolo pake Ndyerekezi adamutenga pomwe nkuyenda naye paphiri itali maninge ndipo adamuwonesa maufumu yose yapadziko yapasi na ulemerero wawo.
9 Pamwapo adamuuza kuti: “Nikupaseni vinthu vose vimwevi peno munganigwadireko kabodzi basi nkunitumikira.”
10 Koma Yesu adamuuza kuti: “Choka Satana! Ndawa Malemba yanena kuti: ‘Yahova* Mulungu wako ndiye yemwe ufunika kumupempherera ndipo ufunika kutumikira iye yekha basi.’”
11 Pamwapo Ndyerekezi ule adamusiya ndipo kudabwera angelo nkuyamba kumutumikira.
12 Manje pomwe Yesu adabva kuti Yohani amufungira mudjeri, adachoka kumuko nkuyenda ku Galileya.
13 Patsogolo pake padachoka ku Nazareti, adafika ku Kaperenao nkugumana malo yokhala m’mbalim’mbali mwa nyanja m’madera ya Zebuloni na Nafitali,
14 kuti mawu yomwe Mulungu adanena pakuphatisira basa mneneri Yesaya yakwanirisiwe. Iye adati:
15 “Wanthu womwe ankukhala mudziko ya Zebuloni na dziko ya Nafitali, m’mphepete mwa nsewu wa kunyanja kutsidya inango ya Yorodano, ku Galileya komwe kungakhala wanthu wa khaindi inango,
16 wanthu womwe angakhala mumdima adawona kugwerewera maninge, ndipo wanthu womwe angakhala mudera ya mthunzi wa impfa adawona kugwerewera.”
17 Kuyambira nthawe mwiyo, Yesu adayamba kulalikira kuti: “Lapani ndawa Ufumu wakudzulu wafendera.”
18 Pambafamba m’mphepete mwa nyanja ya Galileya, Yesu adawona amuna awiri wapachibale ankuthusa kombe wophera ntsomba munyanja. Basa yawo yenze yakupha ntsomba ndipo madzina yawo yenze Simoni wochemerewa Petulo na Andireya.
19 Iye adawauza kuti: “Nitewereni ndipo nikuchinjeni kuti mukhale wosodza wanthu.”
20 Nthawe mwiyo iwo adasiya akombe wawo nkumutewera.
21 Padajula pamwapo, adawona amuna awiri wapachibale, Yakobo mwana Zebedayo na m’bale wake Yohani. Iwo enze mu barko pabodzi na ababa wawo a Zebedayo ndipo adawachemera panthawe yomwe ambasona akombe wawo.
22 Nthawe mwiyo adasiya ababa wawo na barko nkumutewera.
23 Padateno, adafambafamba mu Galileya mose ndipo angapfunzisa m’masunagoge mwawo, ambalalikira ntontholo wabwino wa Ufumu na kupolesa matenda ya khaindi iliyose yomwe wanthu angadwala.
24 Wanthu wose wa mu Siriya adabva vomwe iye angachita. Iwo ambamubweresera wose womwe angadwala matenda ya khaindi na khaindi na womwe angabva kuwawiwa m’thupi, womwe enze na viwanda, wampfai na wanthu wozizira vidzo ndipo iye ambawapolesa.
25 Ndipomwapa, wanthu azinji wochokera ku Galileya, ku Dekapole,* ku Yerusalemu, ku Yudeya na ku tsidya inango ya Yorodano adamutewera.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Panango kuti: “dera yomwe yenze na mathaundi 10.”
