Wonembewa na Mateyu 5:1-48
-
ULALIKI WA PAPHIRI (1-48)
-
Yesu ankuyamba kupfunzisa paphiri (1, 2)
-
Vinthu 9 vobweresa chimwemwe (3-12)
-
Munyu na luju (13-16)
-
Yesu adabwera kudzakwanirisa Chilamulo (17-20)
-
Ankupereka malangizo pa nkhani ya kuyambana (21-26), chigololo (27-30), kumalisa banja (31, 32), malumbiro (33-37), kubwezera (38-42), kukonda azondi (43-48)
-
5 Yesu padawona gulu ya wanthu, adakwira m’phiri ndipo padakhala pasi, wopfunzira wake adabwera kwa iye.
2 Patsogolo pake adayamba kuwapfunzisa kuti:
3 “Wokondwa ni wanthu womwe azindikira kuti afunika kutsogolerewa na Mulungu, ndawa Ufumu wakudzulu ni wawo.
4 “Wokondwa ni wanthu wale womwe ni wokwinyirira ndawa yakuti adzalimbikisiwe.
5 “Wokondwa ni wanthu wale womwe ni wodzichepesa ndawa yakuti adzatambire dziko yapasi.
6 “Wokondwa ni wanthu womwe ankubva njala na nyota ya chilungamo ndawa yakuti adzakhute.
7 “Wokondwa ni wanthu wachifundo ndawa yakuti adzachitiriwembo chifundo.
8 “Wokondwa ni wanthu wabwino ntima* ndawa yakuti adzawone Mulungu.
9 “Wokondwa ni wanthu womwe abweresa ntendere ndawa adzachemerewe wana wa Mulungu.
10 “Wokondwa ni wanthu womwe adzudziwa ndawa ya chilungamo ndawa yakuti Ufumu wakudzulu ni wawo.
11 “Ndimwe wokondwa, pomwe wanthu ankukudzudzani, kukunyozani na kukunamizirani voipa vilivose ndawa ya inepano.
12 Kondwani ndipo sekererani maninge ndawa mphoto yomwe Mulungu adzakupaseni kudzulu ni ikulu, ndipo momu ndimo mwadadzudzira aneneri womwe enzeko imwepo mukanati kukhalako.
13 “Imwepo ndimwe munyu wa dziko yapasi. Manje peno munyu wamala mphanvu, ko mphanvu yake iyo ingabwezeresewe tani? Ungaphatelini pomwe basa ndipo ungafunike kundoutaya kunja kuti wanthu ambakaupondeponde.
14 “Imwepo ndimwe luju ya dziko. Thaundi ikakhala paphiri ibisikalini.
15 Wanthu akagasa kandyero amugwanankhiralini na dengu, koma auyikha pamalo yowonekera kuti uvunikire wose m’nyumba mumo.
16 Molingana na vimwevi, imwepo wonesanimbo kugaka kwanu pamaso pa wanthu, kuti awone basa zanu zabwino nkulemekeza Ababa wanu wakudzulu.
17 “Ayi kuganiza kuti nidabwera kudzadzonga Chilamulo panango vonemba va aneneri neye. Niribe kubwera kudzavidzonga, koma kudzavikwanirisa.
18 Shuwa ninkukuuzani kuti kudzulu na dziko yapasi vingachoke mosashupa, kusiyana nakuti kabiyi kabodzi kang’ono maninge panango kachigawo ka letra ing’ono maninge ya nchilamulo kachoke vinthu vose vikanati kuchitika.
19 Ndipomwapa aliyese yemwe ankubveralini malamulo yaliyose pa malamulo yang’ono mwaya, nkumbapfunzisa pomwe anango kuti osati ambabverembo, adzakhale wosayenerera kungena mu Ufumu wa kudzulu. Koma aliyese wotewedza na kupfunzisa malamulo mwaya adzakhale woyenerera kungena mu Ufumu wakudzulu.
20 Shuwa ninkukuuzani kuti peno chilungamo chanu chiposhalini cha alembi na Afalisi, ndiye kuti mudzangenelini mu Ufumu wakudzulu.
21 “Imwepo mudabva kuti wanthu wakalekale adauziwa kuti: ‘Ayi kupha munthu. Aliyese yemwe wapha munthu wapalamula mulandu wa ku tiribunali.’
22 Koma ine ninkukuuzani kuti aliyese wopitiriza kukhala wokalipa ndawa ya m’bale wake wapalamula mulandu wa ku tiribunali. Ndipo aliyese woyankhulira m’bale wake mawu yoipa, wapalamula mulandu wa ku Tiribunali Ikulu. Ndipo aliyese wolewa mwanzake kuti: ‘Ndiwe chizende!’ adzayende ku Gehena* wamoto.
23 “Manje peno wabweresa mphaso yako pa guwa ya ntsembe ndipo uli mwapo wakumbukira kuti udayambana na m’bale wako,
24 siya mphaso yako patsogolo pa guwa ya ntsembe mwapo. Yamba wayenda ukakhazikise ntendere na m’bale wako. Ukabwererako ungadzapereke ntsembe yako.
25 “Peno unkuyenda ku tiribunali na munthu waunaye mulandu, kambirana naye mwakankulumize kuti osati akakupereke kwa woweruza. Komasoti kuti woweruza moyu osati akupereke kwa munthu yemwe aikha wanthu mudjeri.
26 Shuwa ninkukuuza, udzabulemolini mpakana ulipire kakobiri komalizira kochepa mphanvu maninge*.
27 “Imwepo mudabva kuti adati: ‘Ayi kuchita chigololo.’
28 Koma ine ninkukuuzani kuti aliyese wonyang’anisisa nkazi mpakana kumukhumbira, wachita naye kale chigololo mu ntima mwake.
29 Manje peno diso yako yakumakulu ikuchimwisa, uikolowole nkuitaya. Ndawa vilibwino kuti ukhale ulibe chidzo chibodzi kusiyana nakuti thupi yako yose idzathusiwe mu Gehena.
30 Ndipo peno djanja yako yamakulu ikuchimwisa, uigwate nkuitaya. Ndawa viribwino kuti ukhale ulibe chidzo chibodzi kusiyana nakuti thupi yako yose idzathusiwe mu Gehena.*
31 “Pale adalewa pomwe kuti: ‘Aliyese yemwe ankumalisa ukwati na nkazi wake, ambamupase nkazi muyo kalata yomalisira ukwati.’
32 Koma ine ninkukuuzani kuti aliyese yemwe wamalisa ukwati na nkazi wake, osati ndawa ya uhule,* amuchitisa chigololo nkazi muyo akalowodwa pomwe. Ndipo aliyese yemwe walowola nkazi wosiyiwa muyo, nayembo wachita chigololo.
33 “Komasoti mudabva kuti wanthu wakalekale adauziwa kuti: ‘Ayi kumbalumbira koma ne kukwanirisa, koma mumbakwanirise vomwe mwapolomisa Yahova.’*
34 Koma ine ninkukuuzani kuti: Ayi kumbalumbira, kutomola kudzulu, ndawa ndiko komwe kuna mpando wachifumu wa Mulungu,
35 panango kutomola dziko yapasi ndawa ni chopondapo mapazi yake, panangosoti kutomola Yerusalemu ndawa ni thaundi ya Mpfumu yamphanvu.
36 Ayi kumbalumbira nkumbatomola msolo wanu ndawa yakuti mungakwaniselini kuchinja tsitsi yanu olo ibodzi, kuti ikhale ichena panango ipsyipa.
37 Tsimikizirani kuti mukati ‘Inde’ akhaledi inde, ndipo mukati ‘Ayi’ akhaledi ayi, ndawa mawu yoingizira pamwapa ni yochokera kwa Ndyerekezi.
38 “Imwepo mudabva kuti adati: ‘Diso kulipira diso, na dzinu kulipira dzinu.’
39 Koma ine ninkukuuzani kuti: Ayi kumbalimbana na munthu woipa, koma munthu akakukwantsa mbama kuphutu iyi, umbaperekere pomwe phutu inango.
40 Peno munthu ankufuna kuti akuyendese ku tiribunali kuti akakutengere malaya yako ya nkati, umbamupase pomwe yakunja.
41 Peno munthu waudindo wakupasa ntolo kuti umutakulire pa nsenga wa kilometro ibodzi, umbamutakulire kwa nsenga wa makilometro yawiri.
42 Munthu akakukumbira kanthu umbamupase, ndipo peno munthu ankufuna kuti akukwerete kanthu, ayi kumbalamba.
43 “Imwepo mudabva padati: ‘Umbakonde munzako ndipo umbaipidwe na mzondi wako.’
44 Koma ine ninkukuuzani kuti: Pitirizani kukonda azondi wanu na kupempherera omwe ankukudzudzani,
45 kuti muwonese kuti ndimwe wana wa Ababa wanu wakudzulu. Ndawa iye agakisira dzuwa wanthu wabwino na woipa ndipo agwesera nvula wanthu wolungama na wosalungama.
46 Manje mukambandokonda wanthu wale wokha omwe akukondani, ko mudzaphindule chani? Ko wanthu wochitisa mtsonkho achitambolini vimwevo?
47 Peno mundomonisa azibale wanu wokha, ko nchani chachilendo chomwe munkuchita? Ko wanthu wa khaindi inango nawombo achitalini vimwevo?
48 Ndipomwapa mumbawonese chikondi changwiro ninge cha Ababa wanu wakudzulu.
Mawu ya m’nyantsi
^ Panango kuti: “wochena ntima.”
^ Yamwaya yenze malo yomwe ambashokerako vinthu kunja kwa Yerusalemu. Onani matanthauzo ya mawu yanango.
^ Onani vakumapeto B14.
^ Onani matanthauzo ya mawu yanango.
^ Onani matanthauzo ya mawu yanango.
^ Onani vakumapeto A5.
