Wonembewa na Mateyu 6:1-34
6 “Ayi kumbachita chilungamo pamaso pa wanthu na cholinga chakuti akuwoneni. Mukambachita vimwevi, mudzatambirelini mphoto kwa Ababa wanu womwe ali kudzulu.
2 Ndipomwapa, mukambapasa vinthu munthu wosauka, ayi kumbaliza lupenga ninge momwe anchitira wanthu wachinyengo m’masunagoge na m’misewu na cholinga chakuti wanthu awatamande. Shuwa ninkukuuzani, wanthu mwawo ankutambiriratu mphoto yawo yose.
3 Koma iwepo ukapasa chinthu munthu wosauka, djanja yako yamadzere osati idziwe vomwe djanja yako yamakulu inkuchita,
4 kuti vinthu vomwe wapasa munthu wosauka vikhale vachintsintsi. Ukachita teno, Ababa wako omwe ankuwona vomwe vinkuchitika podiya kuti iwepo ungakwaniselini kuwawona, adzakubwezere.
5 “Ndipo mukambapemphera, ayi kumbachita vinthu vomwe wanthu wachinyengo anchita. Ndawa iwo akonda kuima m’masunagoge na mu mphambano za misewu yakuluyakulu kuti wanthu ambawawone. Shuwa ninkukuuzani, wanthu mwawo ankutambiriratu mphoto yawo yose.
6 Koma iwepo ukambapemphera, umbangene muchipinda chako nkufunga nsuwo ndipo umbapemphere kwa Ababa wako womwe ungakwaniselini kuwawona. Ukachita teno, Ababa wako omwe ankudziwa vomwe vinkuchitika podiya kuti iwepo ungakwaniselini kuwawona, adzakubwezere.
7 Ukambapemphera, ayi kumbandobwerezera mawu yabodzi na yabodzi ninge momwe wanthu wa makhaindi yanango anchitira. Iwo aganiza kuti Mulungu awabvere akalewa mawu yazinji.
8 Koma imwepo ayi kumbachita ninge iwo, ndawa Ababa wanu adziwa vomwe munkufunikira mukanati mwawakumbira.
9 “Koma imwepo mumbapemphere tene:
“‘Ababa wathu wakudzulu, dzina yanu ichenesewe.
10 Ufumu wanu ubwere. Vomwe munkufuna vichitike padziko yapasi pano ninge mwaviriri kudzulu.
11 Mutipase chakudya kuti tidye ntsiku ya lero.
12 Mutikhululukire vophonya vathu ndawa isembo takhululukira womwe atiphonyera.
13 Tithandizeni kuti osati tigonje tikambayesewa, koma mutiteteze* kwa Ndyerekezi.’
14 “Mukambakhululukira wanthu machimo yawo, Ababa wanu wakudzulu adzakukhululukirenimbo.
15 Koma peno mukhululukiralini wanthu machimo yawo, Ababa wanu adzakukhululukirenilini machimo yanu.
16 “Mukambadzimana kudya, ayi kumbakhala na nkhope yokwinyirira ninge momwe wanthu wachinyengo wale anchitira. Iwo asamaliralini nkhope zawo kuti wanthu anango adziwe kuti ankudzimana kudya. Shuwa ninkukuuzani kuti wanthu mwawo ankutambiriratu mphoto yawo yose.
17 Koma iwepo ukambadzimana kudya, umbasambe kunkhope kwako na kudzola mafuta mumsolo mwako,
18 kuti wanthu anango osati adziwe kuti unkudzimana kudya, koma Ababa wako wokha womwe ungakwaniselini kuwawona. Ukachita teno, Ababa wako womwe ankuwona vomwe vinkuchitika podiya kuti iwepo ungakwaniselini kuwawona, adzakubwezere.
19 “Lekani kudziunjikira chuma padziko yapasi, pomwe nchenje na fuluju vidzonga ndipo mbava zithyola nkuba.
20 Koma unjikani chuma chanu kudzulu, komwe nchenje panango fuluju vingadzongelini ndipo mbava zingathyolelini nkuba.
21 Ndawa komwe kuna chuma chako, ntima wako udzakhale pomwe kumuko.
22 “Luju ya thupi ni diso. Peno diso yako inkunyang’ana pa chinthu chibodzi, thupi yako yose idzakhale yogaka maninge.
23 Koma peno diso yako ni yadyera,* thupi yako yose idzachite mdima. Ndipomwapa peno kugaka kuli mwa iwepo ni mdima, ndiye kuti mdima muyo ni ukulu maninge!
24 “Munthu angakwaniselini kutumikira mabwana yawiri, ndawa angazondane na m’bodzi nkukonda munango, panango angakhale wokhulupirika kwa m’bodzi nkunyoza munango. Mungakwaniselini kutumikira Mulungu na chuma nthawe ibodzi.
25 “Ndipomwapa ninkukuuzani kuti: Lekani kukhala na nkhawa va moyo wanu, kuti mudzadye chani panango mudzamwe chani, panango kukhala na nkhawa na thupi yanu kuti mudzavale chani. Ko moyo wanu ni wofunikalini maninge kuposha chakudya, ndipo thupi yanu ni yofunikalini maninge kuposha chovala?
26 Nyang’anisisani mbalani za munlengalenga, pale zibzalalini mbewu, panango kukolola panango kusunga chakudya munkhokwe. Koma Ababa wanu wakudzulu azidyesa. Ko imwepo ndimwelini wofunika maninge kuposha mbalani?
27 Ko ni mbani wa imwepo yemwe angatalimphiseko moyo wake pang’ono basi ndawa yokhala na nkhawa?
28 Komasoti ndawa chani munkukhala na nkhawa pankhani ya vovala? Pfunzirani momwe mafololi ya kuthengo yankulira. Iyo yaphatalini basa ndipo yakonzalini vovala.
29 Koma ninkukuuzani kuti olo Solomo chaiye mu ulemerero wake, alibe kuvalako vokhuza ninge ibodzi pa mafololi mwaya.
30 Manje peno Mulungu avazika teno vomera va kuthengo vomwe vindokhalako lero chabe mangwana nkuvisonkhera pamoto, ko iye adzakuvazikenilini kuposha pamwapa wachikhulupiriro chochepa imwe?
31 Ndipomwapa, ayi kumbakhala na nkhawa nkumbalewa kuti ‘tidye chani?’ Panango ‘timwe chani?’ Panango ‘tivale chani?’
32 Ndawa wanthu wa makhaindi yanango ankufagafaga mwakhama vinthu vimwevi. Koma Ababa wanu wakudzulu ankudziwa kuti imwepo munkufunika vinthu vose vimwevi.
33 “Ndipomwapa, nthawe zose mumbaikhe Ufumu na mpfundo zolungama za mawu ya Mulungu pa malo yakuyamba pa moyo wanu, ndipo iye adzakupaseni vinthu vinango vose vimwevi.
34 Ayi kumbakhala na nkhawa na vinthu vamangwana, ndawa ntsiku ya mangwana idzakhale na vinthu vake vochitisa nkhawa. Mabvuto ya ntsiku iliyose ni yokwanira pa ntsiku mweyo.
