Wonembewa na Mateyu 7:1-29
7 “Lekani kuweruza anango kuti imwepo osati muweruziwembo,
2 ndawa momwe muweruzira anango, iwo adzakuweruzenimbo teno. Ndipo mpimo womwe munkupimira anango, iwombo adzakupimireni mpimo muyo.
3 Manje ndawa chani unyang’ana kachitsotso m’diso ya m’bale wako, koma osakwanisa kuwona ntanda wa denga ya nyumba womwe uli m’diso yako?
4 Ko ungauze tani m’bale wako kuti: ‘Imirira nikuchose kachitsotso m’diso mwako,’ pomwe m’diso mwako munantanda wa denga ya nyumba?
5 Munthu woipa iwe! Yamba wachosa ntanda wa denga ya nyumba womwe uli m’diso yako iyo, ukateno ndipo pati ukwanise kuwona bwino kachitsotso m’diso ya m’bale wako.
6 “Ayi kumbapasa mbwaya vinthu vopatulika, panango kuponyera nkhumba minyala yanu yofunika, kugopera kuti zingapondeponde minyala mwayo nkuzungunuka zichikulumani.
7 “Pitirizani kukumbira ndipo adzakupaseni. Pitirizani kufagafaga ndipo mudzagumane. Pitirizani kugogodza ndipo adzakufungulireni.
8 Ndawa aliyese wokumbira atambira, aliyese wofagafaga agumana ndipo aliyese wogogodza adzamufungulire.
9 Inde, nimbani wa imwepo yemwe mwana wake achimukumbira nkate angamupase mwala?
10 Panango achimukumbira ntsomba angamupase nyoka?
11 Manje peno imwepo mudziwa kupasa wana wanu vinthu vabwino podiya kuti ndimwe woipa, kuli tani Ababa wanu wakudzulu? Shuwadi, iye adzapereke mosaumira vinthu vabwino kwa wanthu womwe ankumukumbira.
12 “Ndipomwapa, vinthu vose vomwe munkufuna kuti wanthu akuchitireni, imwembo muwachitire vimwivo. Chilamulo chifuna vimwevi ndipo ndivo vomwe anenerimbo adanemba.
13 “Ngenani pa nsuwo ung’ono, ndawa nsewu womwe unkutsogolera wanthu kukachenekewa ni wophanyuka ndipo nsuwo wake ni ukulu maninge ndipo wanthu azinji ankupita na pamwapo.
14 Koma nsuwo woyenda kumoyo ni ung’ono ndipo nsewu wake ni wopanikiza ndipo womwe ankuugumana ni ang’onong’ono.
15 “Chenjerani na aneneri wonama womwe abwera kwa imwepo alivale ninge nkhosa, koma nkati mwa mitima yawo ali ninge mphumphi zokalipa.
16 Mudzawazindikire na vipaso vawo. Wanthu athyolalini uva panango nkhuyu pa muti wa minga.
17 Molingana na vimwevi, muti uliwose wabwino ubala vipaso vabwino, koma muti uliwose woipa ubala vikolakola.
18 Muti wabwino ungabalelini vikolakola ndipo muti woipa ungabalelini vipaso vabwino.
19 Muti uliwose womwe ubalalini vipaso vabwino augwata nkuuikha pamoto.
20 Ndipomwapa, wanthu mwawa mudzawazindikire ndawa ya vipaso vawo.
21 “Sikuti aliyese wonitomola kuti ‘Ambuya, Ambuya,’ adzangene mu Ufumu wakudzulu, koma ule yekha yemwe ankuchita vomwe Ababa wangu wakudzulu ankufuna.
22 Pantsiku mweyo azinji adzaniuze kuti: ‘Ambuya, Ambuya, ko isepano tilibe kuleweratu va kutsogolo mudzina yanu, kubulisa viwanda mudzina yanu na kuphata basa zizinji zamphanvu mudzina yanu?’
23 Koma inepano nidzawauze kuti: ‘Nikudziwanilini olo pang’ono! Chokani pamaso pangu, imwepo wanthu wosabvera malamulo.’
24 “Ndipomwapa, aliyese yemwe wabva mawu yangu mwaya na kuchita vomwe wabva ivo, ali ninge munthu wanzeru yemwe adamanga nyumba yake pachidwale.
25 Manje kudagwa chinvula champhanvu ndipo madzi yadadzala. Patsogolo pake kudabwera chimphepo champhanvu, koma nyumba mwiyo ilibe kugwa ndawa yenze yolimba bwino pamwala mwapo.
26 Aliyese yemwe wabva mawu yangu mwaya koma osachita vomwe wabva, adzalingane na munthu wopusa yemwe adamanga nyumba yake panchenga.
27 Pamwapo kudagwa chinvula champhanvu ndipo madzi yadadzala. Patsogolo pake kudabwera chimphepo champhanvu ndipo nyumba mweyo idagwa ichidzongekeratu yose.”
28 Yesu padamaliza kuyankhula mawu mwaya, gulu ya wanthu idafikiwa pamoyo ndipo idadabwa na kapfunzisidwe kake,
29 ndawa ambawapfunzisa ninge munthu waulamuliro, osati ninge alembi wawo.
