Wonembewa na Mateyu 9:1-38
-
Yesu ankupolesa wozizira vidzo (1-8)
-
Yesu ankuchemera Mateyu (9-13)
-
Akubvunziwa pa nkhani ya kudzimana kudya (14-17)
-
Mwana nkazi wa Yairo; nkazi ankuphata m’mphepete mwa chovala cha Yesu (18-26)
-
Yesu ankupolesa munthu wosaona na wosayankhula (27-34)
-
Basa yokolola ni ikulu koma anyabasa ni ang’onong’ono (35-38)
9 Pamwapo Yesu adapakira barko nkuyambukira tsidya inango, ndipo adayenda ku thaundi yomwe angakhala.
2 Kumuko wanthu adamubweresera munthu wozizira vidzo aligone pamachira. Yesu padawona chikhulupiriro chawo, adauza munthu wozizira vidzo ule kuti: “Limba ntima mwana wangu! Machimo yako yakhululukiriwa.”
3 Padateno, alembi anango ambalewa chamuntima kuti: “Munthu moyu ankunyoza Mulungu.”
4 Koma Yesu adadziwa vomwe iwo angaganiza ndipo adawabvunza kuti: “Ndawa chani munkuganiza vinthu voipa m’mitima mwanu?
5 Mwakulinganiza, chosashupa nchiponi, kulewa kuti: ‘Machimo yako yakhululukiriwa,’ panango kulewa kuti: ‘Nyamuka umbayende’?
6 Lekani nikuwoneseni kuti Mwana wa munthu anamphanvu padziko yapasi zokhululukira machimo.” Pamwapo iye adauza munthu wozizira vidzo ule kuti: “Nyamuka, tenga machira yako mwaya ndipo umbayende kwanu.”
7 Ndipo adanyamuka nkuyenda kwawo.
8 Gulu ya wanthu ire pidawona vimwevi, idachita mantha ndipo idatamanda Mulungu yemwe adapereka mphanvu zimwezi kwa wanthu.
9 Padachoka pamwapo, Yesu adawona munthu munango dzina yake Mateyu, alikhale mu ofesi yotsonkhesera mtsonkho. Ndipo adamuuza kuti: “Ukhale nteweri wangu.” Nthawe mweyo adanyamuka nkumutewera.
10 Nthawe inango pangadya chakudya m’nyumba inango, kudabwera wanthu azinji wotsonkhesa mtsonkho na wochimwa ndipo adayamba kudya na Yesu na wopfunzira wake.
11 Koma Afalisi padawona vimwevi adabvunza wopfunzira wake kuti: “Ndawa chani mpfunzisi wanu akudya pabodzi na wotsonkhesa mtsonkho na wochimwa?”
12 Iye padabva vimwevo adawadawira kuti: “Wanthu wodwala ndiwo afunika mfulumero, osati wanthu wolimba.
13 Ndipomwapa yendani mukapfunzire tanthauzo ya mawu yakuti: ‘Ninkufuna chifundo, osati ntsembe.’ Ndawa inepano nilibe kubwera kudzachemera wanthu wolungama, koma wochimwa.”
14 Pamwapo wopfunzira wa Yohani adabwera kwa iye nkumubvunza kuti: “Ndawa chani isepano na Afalisi tidzimana kudya, koma wopfunzira wanu adzimanalini?”
15 Yesu adawadawira kuti: “Azishamwali wa mwamuna yemwe walowola manjemanje akwinyiriralini peno adakali naye pabodzi, ntenolini? Koma nthawe ikubwera yomwe mwamuna muyo yemwe ankulowola adzachosewe pakati pawo ndipo panthawe mweyo adzadzimane kudya.
16 Palibe munthu yemwe asonerera chigamba cha nguwo inyowani pa malaya yakunja yakalekale. Chigamba mwicho chingakwekwete malaya nkuing’amba ndipo kung’ambika muko kungakule maninge.
17 Ndipo wanthu aikhalini vinyu unyowani mtumachola twa chikumba twa kalekale. Akachita vimwevo, tumachola twa chikumba tule tuphulika, vinyu nkutaika ndipo tumachola muto tudzongekeratu. Koma wanthu aikha vinyu unyowani m’machola ya chikumba yanyowani, ndipo vose viwiri visungika bwino.”
18 Pangawauza vimwevi, wolamulira munango adamufenderera. Patsogolo pake adamugwadira nkulewa kuti: “Panikulewa pano, panango mwana wangu nkazi wafa kale. Koma naboni mukamugumirire na djanja yanu ndipo akakhale na moyo.”
19 Patsogolo pake Yesu adanyamuka na wopfunzira wake nkumulondola.
20 Manje mayi munango yemwe angadwala matenda yotaya magazi kwa magole 12, adafika kumbuyo kwake nkuphata usalu woposa mphepete mwa malaya yake ya kunja,
21 ndawa muntima mwake ambalewa kuti: “Ninkutsimikiza kuti nikandophata malaya yake ya kunja, nipole.”
22 Yesu adachungunuka ndipo adawona mayi ule nkulewa kuti: “Mwana wangu limba ntima, chikhulupiriro chako chakupolesa.” Nthawe mweyoletu mayi ule adapola.
23 Manje padangena m’nyumba ya wolamulira ule, adawona wanthu ankuliza vinonje na gulu ya wanthu yomwe inkulira mokuwa.
24 Yesu adawauza kuti: “Bulani muno ndawa mtsikana muyu alibe kumwalira, koma ankugona.” Padalewa vimwevi, wanthu wale adayamba kumuseka monyoza.
25 Wanthu wale padawabulisa panja, Yesu adangena nkuphata djanja ya mtsikana ule, ndipo iye adamuka.
26 Wanthu wose wamudera mweyo adabva nkhani mweyi.
27 Yesu pangachoka kumuko, amuna awiri omwe enze na bvuto yosawona ambamutewera achimbakuwa kuti: “Mutichitire chifundo Mwana wa Davide.”
28 Yesu padangena m’nyumba, amuna womwe enze na bvuto yosaona adabwera kwa iye ndipo adawabvunza kuti: “Ko munkukhulupirira kuti ningachite vimwevi?” Iwo adamudawira kuti: “Inde Ambuya.”
29 Pamwapo adawaphata m’maso nkulewa kuti: “Mobverana na chikhulupiriro chanu, vomwe munkufuna vichitike kwa imwepo.”
30 Maso yawo yadafunguka ndipo Yesu adawachenjeza mwamphanvu kuti: “Ayi kuuza munthu nkhani mweyi.”
31 Koma iwo padabula kunja, ambandokhalira kuuza wanthu vomwe Yesu adawachitira.
32 Pomwe amuna awiri wale ambachoka, wanthu adamubweresera munthu wosayankhula yemwe wenze na chiwanda.
33 Padabulisa chiwanda chile, munthu wosayankhula ule adayankhula, mpakana gulu ya wanthu wale idadabwa ndipo idalewa kuti: “Vimwevi venze vikanati vawonekako mu Izirayeli kundochokera kalekale.”
34 Koma Afalisi ambalewa kuti: “Moyu ankuchosa viwanda na mphanvu ya nkulu wa viwanda.”
35 Pamwapo Yesu adayamba ulendo woyenda m’mathaundi na m’miyi yose. Iye angapfunzisa m’masunagoge yawo na kulalikira ntontholo wabwino wa Ufumu ndipo ambapolesa matenda ya khaindi iliyose yomwe wanthu angadwala.
36 Padawona chigulu cha wanthu, iye adawabvera ntsisi, ndawa enze wokuluzikakuluzika ndipo enze alibe owasamalira ninge nkhosa zilibe nyakabusa.
37 Pamwapo adauza wopfunzira wake kuti: “Shuwadi, pali vinthu vizinji vofunika kukolola, koma anyabasa ni ang’onong’ono.
38 Ndipomwapa, kumbirani Munichiro munda kuti atumize anyabasa kuti akakolole.”
