Kwa Tito 1:1-16
1 Inepano Paulo, kapolo wa Mulungu na ntumi wa Yesu Khrisitu, niri na chikhulupiriro cholingana na cha wanthu osankhuliwa na Mulungu. Komasoti ninkudziwa bwinobwino chonadi chofotokoza va kudzipereka kwathu kwa Mulungu.
2 Vinthu vimwevi tikhala navo ndawa ya chidikhiro cha moyo wosapera, chomwe Mulungu yemwe anganamelini adapolomisa kalekale.
3 Koma panthawe yake adachitisa kuti mawu yake yadziwike kupitira mu basa yolalikira yomwe nidapasiwa mobverana na Mulungu Mpulumusi wathu.
4 Ninkukunembera iwepo Tito, mwana wangu chaiye yemwe uli na chikhulupiriro cholingana na changu kuti:
Kukoma ntima kukulu na ntendere vochokera kwa Mulungu Ababa wathu na Yesu Khrisitu Mpulumusi wathu vikhale nawe.
5 Nidakusiya ku Kerete kuti ukonze vinthu vophonyeka nakuti uikhe akulu mu mpingo mu thaundi iliyose mobverana na malangizo yomwe nidakupasa.
6 Nkulu afunika kukhala munthu yemwe alibe chifukwa chomunenera voipa, mwamuna yemwe anankazi m’bodzi yemwe anawana omwe atumikirambo Mulungu komasoti omwe alibe mbiri yakuti achita makhalidwe yoipa panango osalamulirika.
7 Pakuti ni ntumiki wa Mulungu, wonyang’anira afunika kukhala alibe chifukwa chomunenera voipa. Osati akhale wongingimira maganizo yake, wokulumiza kukalipa, wakumwa mowa mwauchidakwa, wankhanza* panango wokonda kugumana phindu munjira iribe chilungamo.
8 Koma akhale wotambira bwino alendo, wokonda vabwino, woganiza bwino, wachilungamo, wokhulupirika komasoti wodziletsa.
9 Akhale pomwe wophata mwamphanvu mawu yokhulupirika pomwe ankupfunzisa mwabuya, kuti akwanise kulimbikisa wanthu na mpfundo chaizo* na kutsuula otsutsa.
10 Ndawa pali wanthu azinji omwe alamulirikalini, oyankhula vosathandiza komasoti opusisa anango, ndipo pagulu ya wanthu mwawa pali pomwe omwe ankupitiriza kulimbikisa mdulidwe.
11 Wanthu mwawa afunika kuwafunga pakamwa, ndawa pofuna kugumana phindu munjira iribe chilungamo, ankupitiriza kudzonga mabanja pakupfunzisa vinthu vomwe afunikalini kupfunzisa.
12 M’bodzi pa wanthu mwawa yemwe pomwe ni mneneri wawo, adanena kuti: “Wanthu wa ku Kerete ni wabodza nthawe zose, ni vilombo vakuthengo vopasa mantha komasoti ni waulesi na olungwa.”
13 Umboni moyu ni wazedi. Ndipomwapa pitiriza kuwatsuula mwamphanvu kuti akhale na chikhulupiriro cholimba.
14 Ayi kuti ambabvesere nkhani zopeka za wanthu wa ku Yuda na kutewedza malamulo ya wanthu omwe asiya chonadi.
15 Vinthu vose ni vochena kwa wanthu ochena. Koma kwa wanthu oipisiwa na omwe alibe chikhulupiriro kulibe chochena, ndawa maganizo yawo na chikumbuntima chawo ni voipisiwa.
16 Afotokoza pagulu ya wanthu kuti adziwa Mulungu, koma amulamba na vochita vawo ndawa ni onyantsa, osabvera ndipo ni osayenerera basa iriyose yabwino.
