Kwa Tito 2:1-15
2 Koma iwepo pitiriza kuyankhula vinthu vobverana na mpfundo chaizo.*
2 Amuna achikulire osati ambachite vinthu mopitirira malire, akhale alibe masenzeka, oganiza bwino, achikhulupiriro cholimba, achikondi chikulu na opirira maninge.
3 Nawombo akazi achikulire akhale na khalidwe yomwe wanthu omwe atumikira Mulungu afunika kukhala nayo. Osati akhale akhokolo, panango akapolo wa vinyu uzinji, koma akhale apfunzisi wa vinthu vabwino,
4 na cholinga chakuti ambalangize* akazi wachitsikana kuti ambakonde amuna wawo, ambakonde wana wawo,
5 ambakhale oganiza bwino, ochena, ophata basa zapamuyi, wabwino komasoti ambabvere amuna wawo, kuti mawu ya Mulungu osati yanyozewe.
6 Komasoti upitirize kulimbikisa alumbwana kuti akhale oganiza bwino.
7 Ukhale chitsanzo pa basa zabwino mu njira iriyose. Umbapfunzise chaivo ndipo uwonese kuti ulibe masenzeka.
8 Mawu yako yambakhale yabwino,* yomwe yangatsutsiwelini, kuti otsutsa achite manyazi ndipo aleke kugumana chifukwa chotinenera voipa.
9 Akapolo ambabvere abwana wawo pa vinthu vose ndipo ambawakondwerese. Ayi kuti ambatsutsane nawo
10 panango kuwabera, koma okhulupirika pa chirichose kuti ambakomesere vomwe Mpulumusi wathu Mulungu atipfunzisa.
11 Mulungu wawonesa kukoma ntima kwake kukulu komwe kuchitisa kuti wanthu peno akhale wakhaindi yanyi, apulumuke.
12 Vimwevi vitipfunzisa kulamba moyo wosagopa Mulungu. Vitipfunzisa pomwe kuti osati timbafune kuchita vinthu voipa vamudziko iyi, koma kuti tikhale oganiza bwino, wachilungamo na odzipereka kwa Mulungu mudziko iyi
13 pomwe tinkudikhira vinthu vokondweresa na kuwonekera kwaulemerero kwa Mulungu nkulu komasoti kwa Mpulumusi wathu, Yesu Khrisitu,
14 yemwe adadzipereka m’malo mwa isepano kuti atipulumuse* ku moyo wochita vinthu vosabvera malamulo va khaindi iriyose nakuti atichenese, kuti tikhale wanthu wake wapadera, odzipereka pa basa zabwino.
15 Pitiriza kuyankhula vimwevi, kulimbikisa na kutsuula wanthu pophatisira basa ulamuliro wose womwe wapasiwa. Ayi kubvuma kuti munthu aliyese akuderere.
Mawu ya m’nyantsi
^ Panango kuti: “zothandiza.”
^ Panango kuti: “ambapfunzise.”
^ Panango kuti: “yothandiza.”
^ Panango kuti: “atimasule.”
