Kwa Tito 3:1-15
3 Pitiriza kuwakumbusa kuti ambabvere maboma na olamulira. Akhale pomwe okonzeka kuphata basa iriyose yabwino.
2 Ayi kuti ambanene voipa va munthu aliyese ndipo ayi kuti ambakonde kugegedzana. Koma akhale wanthu osangingimira maganizo yawo ndipo ambakhale opfatsa kwa wanthu wose.
3 Isembo pakuyamba pale tenze tiribe nzeru, timbabveralini, tenze osokeresewa, tenze akapolo wa vilakolako vosiyanasiyana komasoti akapolo wa vinthu vokondweresa, ochita voipa, wanjiru, onyantsa ndipo timbazondana.
4 Koma Mulungu Mpulumusi wathu padawonesa kukoma ntima na kukonda wanthu,
5 (osati ndawa ya basa zachilungamo zomwe tidachita, koma ndawa ya chifundo chake), adatipulumusa pakutisambika kuti tifike kumoyo unyowani. Komasoti adatipulumusa pakutithandiza na mzimu uchena kuti tikhale anyowani.
6 Iye adatikhutulira mzimu moyu kupitira mwa Yesu Khrisitu Mpulumusi wathu,
7 kuti tikawonewa olungama ndawa ya kukoma ntima kwake kukulu, tingakhale wanthu omwe tidzatambire vomwe tidapolomisiwa mobverana na chidikhiro cha moyo wosapera.
8 Mawu mwaya ni yazedi, ndipo nikufuna kuti upitirize kutsindika vinthu vimwevi, kuti omwe akhulupirire Mulungu ambaganizire maninge momwe angapitirizire kuchita basa zabwino. Vimwevi ni vabwino na vothandiza kwa wanthu.
9 Koma iwepo umbapewe kutsutsana pa vinthu vopusa komasoti pa nkhani ya mibadwo ya azibereki. Umbapewe pomwe kugegedzana na kulimbana na wanthu pa nkhani yofotokoza va Chilamulo, ndawa vimwevi vithandizalini ndipo viribe na basa.
10 Munthu wolimbikisa mpatuko, ukamutsuula ulendo woyamba na wachiwiri, ayi kubverana naye pomwe
11 pakudziwa kuti munthu wateno wasokera, akuchimwa ndipo akudzilinga.
12 Nikadzatuma Atema panango Tukiko kwa iwepo, udzayesese kuti udzanigumane ku Nikopoli, ndawa naganiza vokakhala kumoku nthawe mweyi yamphepo.
13 Zena, ule yemwe adziwa Chilamulo, na Apolo, uwapase vinthu vokwana vofunika pa ulendo, kuti osati asowe chinthu.
14 Koma abale wathu apfunzire kuphata basa zabwino kuti ambakwanise kuthandiza pakafunika kuteno, kuti osati akhale wanthu alibe phindu.
15 Wose omwe niri nawo kuno, akupereka moni. Uniperekere moni kwa wanthu omwe atikonda ndawa tiri na chikhulupiriro cholingana.
Kukoma ntima kukulu kukhale na mose imwepo.
