Kalata ya Yakobo 1:1-27
1 Ine Yakobo, kapolo wa Mulungu na wa Ambuya Yesu Khrisitu, ninkunembera madzinza 12 yomwe yadamwazikana m’madera yosiyanasiyana.
Tambirani moni!
2 Abale wangu, mumbakondwe maninge pomwe munkugumana na viyeso vosiyanasiyana,
3 ndawa ninge momwe munkudziwira, chikhulupiriro chanu chikapitiriza kukhala cholimba pomwe munkuyesewa, mupfunzira kukhala opirira.
4 Koma bvumani kuti kupirira muko kumalize basa yake, kuti mukhale okwana na osaphonya pa mbali iriyose, panango kuti mukhale na makhalidwe yose yabwino.
5 Peno munango ankusowa nzeru, ambakumbire kwa Mulungu ndipo adzamupase, ndawa iye apereka mosaumira kwa wose ndipo atombodzeralini.*
6 Koma pakupemphera ambakhale na chikhulupiriro, osati ambakaikire olo pang’ono, ndawa yemwe ankukaikira ali ninge bimbi yapanyanja yomwe itengekatengeka na mphepo nkumbawindukawinduka.
7 Munthu watene osati ambadikhire kuti angatambire chinthu chochokera kwa Yahova.*
8 Iye ni wokaikirakaikira ndipo vochita vake vose vichinjachinja.
9 M’bale wonyozeka akondwe ndawa walemekezewa na Mulungu,
10 ndipo wachuma akondwe ndawa wapfunzira kukhala wodzichepesa, ndawa molingana na fololi ya kuthengo, iye adzafote.
11 Ndawa dzuwa ikabula ikupsa maninge nkufotesa vomera ndipo mafololi ya vomera mwivo yathodoka mwakuti kukhuza kwake kumala. Molingana na vimwevi, munthu wachuma muyo adzafe ali nkati mofagafaga chuma.
12 Wokondwa ni munthu yemwe ankupirira viyeso, ndawa akadzabvumiziwa, adzatambire malipiro ya moyo, yomwe Yahova* adapolomisa wose omwe akupitiriza kumukonda.
13 Munthu akambagumana na mayesero osati ambanene kuti: “Mulungu ankuniyesa.” Ndawa Mulungu angayesewelini na vinthu voipa ndipo iye ayesalini munthu na vinthu voipa.
14 Koma munthu aliyese ayesewa na chilakolako chake chomwe chimupumpsa na kumukasha.
15 Manje chilakolako chikakhala na mimba, chibereka chimo. Ndipo chimo ikachitika, ibweresa impfa.
16 Abale wangu wapamoyo, ayi kusokeresewa.
17 Mphaso iriyose yabwino na yangwiro ichokera kudzulu. Ibwera kuchokera kwa Ababa wa vovunikira vakudedza, yemwe achinjalini ninge mthunzi womwe uchinjachinja.
18 Mwakufuna kwake, iye adatibala pomwe tidakhulupirira mawu yake yomwe ni chonadi. Adachita vimwevi kuti tikhale vipaso voyambirira pa volengewa vake.
19 Abale wangu wapamoyo, dziwani ivi: Munthu aliyese ambakhale wokonzeka kubvesera, ambayambe waganiza akanati wayankhula ndipo osati ambafulumize kukalipa,
20 ndawa munthu yemwe wakalipa achitalini vinthu mobverana na chilungamo cha Mulungu.
21 Ndipomwapa, siyani khalidwe iriyose yonyantsa ndipo chosani voipa vilivose vomwe mukali navo. Modzichepesa bvumani kuti mawu yomwe yangakwanise kukupulumusani yabzaliwe mwa imwepo.
22 Olo viriteno mumbachite vomwe mawu yanena, osati kundobva chabe, nkumbadzipumpsa na maganizo yabodza.
23 Ndawa peno munthu andobva mawu koma neye kuchita, alingana na munthu yemwe ankudziwona nkhope yake pa girazi.
24 Iye adzinyang’ana nkuchokapo ndipo nthawe mwiyo ayebwa kuti ankuwoneka tani.
25 Koma yemwe anyang’anisisa mu lamulo yangwiro yomwe ibweresa ufulu ndipo apitiriza kuinyang’anisisa, adzakhale wokondwa na vomwe ankuchita ndawa yakuti ni munthulini yemwe andobva nkuyebwa, koma yemwe achita vomwe wabva.
26 Peno munthu ankuganiza kuti atumikira Mulungu, koma akwanisalini kulamulira lilimi yake, ankudzinamiza ndipo kutumikira kwake kulibe phindu.
27 Kutumikira komwe Mulungu Ababa wathu akuwona kuti ni kochena na kosapsyipiziwa ni uku: Kusamalira wana wamasiye na akazi wamasiye omwe ankugumana na mabvuto na kupewa kuti dziko iyi ikupsyipizeni.
Mawu ya m’nyantsi
^ Panango kuti: “apereka mosagumanira aliyese vifukwa.”
^ Onani vakumapeto A5.
^ Onani vakumapeto A5.
