Kalata ya Yakobo 2:1-26
2 Abale wangu, ko munkuganiza kuti mukhulupirira Ambuya wathu Yesu Khrisitu, yemwe ni waulemerero, pomwe munkuchita vinthu mokondera?
2 Munthu yemwe wavala aneli* za golide na vovala vapadzulu akafika pansonkhano wanu, basi nkufikambo munango wosauka yemwe wavala vovala vosakala,
3 ko mukondwa na yemwe wavala vovala vapadzulu ule nkumuuza kuti: “Khalani pamalo yabwino aya” koma wosauka ule nkumuuza kuti: “Iwepo bakaima teno,” panango, nkumuuza kuti: “Khala pasi apa pafupi na chinthu chomwe nipukusirapo dothi yakumapazi yangu”?
4 Manje mukambachita vimwevi, ko ni tsankholini mwiyo yomwe munkuwonesa? Ndipo ko pamwapa mulibe kukhala oweruza omwe ankupereka vigamulo voipa?
5 Bveserani abale wangu wapamoyo. Ko Mulungu alibe kusankhula wanthu omwe dziko iyi iwawona kuti ni osauka kuti akhale olemera mu chikhulupiriro komasoti kuti akhale oyenerera kupasiwa Ufumu womwe Mulungu adapolomisa wanthu omwe amukonda?
6 Koma imwepo munkulemekezalini wanthu osauka. Ko ni olemeralini omwe akuboneresani na kukuyendesani ku tiribunali?
7 Ko ni mwawolini omwe anyoza dzina yabwino maninge yomwe mudapasiwa?
8 Manje peno munkutewedza lamulo yachifumu yakuti: “Umbakonde munzako ninge momwe udzikondera wekha,” ninge momwe lemba inenera, munkuchita bwino maninge.
9 Koma mukapitiriza kumbakondera, munkuchimwa ndipo lamulo inkuwoneseratu* kuti ndimwe wophonya.
10 Aliyese yemwe abvera Chilamulo akaphonyesa mbali ibodzi, ndiye kuti waphonyera Chilamulo chose.
11 Ndawa yemwe adanena kuti: “Ayi kuchita chigololo,” adanena pomwe kuti: “Ayi kupha munthu.” Manje peno iwepo ulibe kuchita chigololo koma wapha munthu, ndiye kuti waphonyera chilamulo.
12 Mumbayankhule na kuchita vinthu ninge wanthu omwe adzaweruziwe na chilamulo cha wanthu omwe ali pa ufulu.
13 Ndawa munthu yemwe awonesalini chifundo adzaweruziwe mosowa chifundo. Chifundo ni chikulu kuposha chiweruzo.
14 Abale wangu, ko pali phindu yanyi peno munango anganene kuti anachikhulupiriro koma achitalini basa zake? Ko chikhulupiriro mwicho chingamupulumuse?
15 Peno m’bale panango mulongo alibe vovala na chakudya chokwana pa ntsiku mwiyo,
16 koma munango pa imwepo nkumuuza kuti: “Uyende bwino, ugumane vovala na vakudya va ntsiku iriyose,” koma osamupasa vomwe iye ankusowa kuti akhale na moyo, ko pali phindu yanyi?
17 Nchibodzibodzimbo chikhulupiriro pachokha, peno chiribe basa zake, ni chakufa.
18 Koma munango anganene kuti: “Iwepo uli na chikhulupiriro, koma inepano niri na basa zake. Uniwonese chikhulupiriro chako palibe basa zake, ndipo inepano nikuwonese chikhulupiriro changu mu basa zangu.”
19 Ukhulupirira kuti kuli Mulungu m’bodzi, ntenolini? Uchita bwino. Koma tsono viwanda vikhulupirirambo ndipo vinjenjemera.
20 Bulutu iwe, ko unkudziwalini kuti chikhulupiriro chiribe basa zake chiribe phindu?
21 Ko Abulahamu ababa wathu alibe kuwonewa kuti ni wolungama ndawa ya basa zake, padapereka mwana wake Isaki ntsembe paguwa?
22 Ni vowonekeratu kuti chikhulupiriro chake chidayendera pabodzi na basa zake, ndipo basa zake mwizo zidachitisa kuti chikhulupiriro chake chikhale changwiro.
23 Pamwapo lemba idakwanirisiwa yomwe inena kuti: “Abulahamu adakhulupirira vomwe Yahova* adamuuza ndipo ambawonewa kuti ni wolungama,” ndipomwapa ambadziwika kuti ni shamwali wa Yahova.*
24 Mwawona manje kuti munthu awonewa kuti ni wolungama ndawa ya basa zake, osati ndawa ya chikhulupiriro chokha.
25 Molingana na vimwevi, ko Rahabi yemwe wenze hule ule, alibe kuwonewambo kuti ni wolungama ndawa ya basa zake, padatambira bwino wanthu omwe ambafuna kudziwa va dziko yawo nkuwathandiza kuti athawe na njira inango?
26 Shuwadi, thupi iribe mzimu* ikhala yakufa, molingana na vimwevi chikhulupiriro chiribe basa zake ni chakufa.
Mawu ya m’nyantsi
^ Anango anena kuti: “ling’i.”
^ Panango kuti: “inkukutsutsani.”
^ Onani vakumapeto A5.
^ Onani vakumapeto A5.
^ Panango kuti: “mphuwe.”
