Kalata ya Yakobo 3:1-18
3 Abale wangu, osati pakhale apfunzisi azinji pagulu yanu, pakudziwa kuti tidzatambire chiweruzo chikulu.
2 Pale tose tiphonyesa nthawe zizinji. Ndipo peno munthu aphonyesalini poyankhula ndiye kuti ni wangwiro ndipo angakwanise kulamulira pomwe thupi yake yose.
3 Tikamangirira vingwe pakamwa pa akavalo kuti ambatibvere, tikwanisa pomwe kulamulira mathupi yawo yose.
4 Ganizirani pomwe va mabarko. Podiya kuti ni yakulu maninge ndipo yafamba mochita kugwinyiwa na mphepo yamphanvu, munthu yemwe ankuyafambisa ayakhonesa na ng’ombo ing’ono maninge kuti yayende komwe iye ankufuna.
5 Nayombo lilimi ni kachidzo kang’ono, koma idzikwiza maninge. Ganizirani momwe kamoto kang’ono kashokera thengo ikulu.
6 Lilimimbo ni moto. Pa vidzo vose va thupi yathu, lilimi ni yodzala na vinthu viribe chilungamo ndawa ipsyipiza thupi yose na kugasa moyo wose wa munthu* ndipo iri na moto wa Gehena.*
7 Wanthu angakwanise kuweta khaindi iriyose ya nyama zakuthengo, mbalani, nyama zokwawa na vamoyo vam’nyanja ndipo akhala ankuchita vimwevi.
8 Koma palibe munthu yemwe angakwanise kuweta lilimi. Lilimi ilamulirikalini ndipo idzonga komasoti ni yodzala na logo yakupha.
9 Lilimi tiiphatisa basa pakutamanda Yahova,* yemwe ni Ababa, komasoti na lilimi ibodzibodzi mwiyo titemberera wanthu omwe adalengewa “mu chifaniziro cha Mulungu.”
10 Pakamwa pabodzi pamwapo pabula mawu yotamanda na yotembererera.
Abale wangu, vifunikalini kuti vinthu vimbachitike mwanjira mweyi.
11 Ko pa nchera ubodzi pangabule madzi yabwino na madzi yowawa?
12 Abale wangu, ko muti wa nkuyu ungabereke maolivi, panango ko muti wa uva ungabereke nkhuyu? Olo nchera wa madzi ya munyu ungabuliselini madzi yabwino.
13 Ko pakati panu pali aliyese wanzeru na wobvesa vinthu? Peno alipo awonese vimwevi pakuchita vinthu vabwino pamoyo wake. Ambachite vinthu vose mopfatsa, yomwe ni khalidwe yomwe ibwera ndawa ya nzeru.
14 Koma peno m’mitima yanu muli ntsanje ikulu na kukonda kugegedzana,* ayi kumbadzikwiza ndawa kuchita vimwevo nkunamizira chonadi.
15 Imweyi ni nzerulini yochokera kudzulu, koma ni yapadziko yapasi, yauchinyama na yauchiwanda.
16 Ndawa, pomwe pali ntsanje na ntima wokonda kugegedzana,* pakhala pomwe chipiringu* na voipa vakhaindi iriyose.
17 Koma nzeru yochokera kudzulu, choyamba ni yochena patsogolo pake yantendere, yakubvako maganizo ya anango, yokonzeka kubvera, yodzala na chifundo na vipaso vabwino, iribe tsankho, ndipo ichitalini vinthu viribe chilungamo.
18 Ndipo chilungamo ni chipaso chomwe wanthu obweresa ntendere abzala mu ntendere.
Mawu ya m’nyantsi
^ Panango kuti: “kugasa chirichose chomwe ankuchita pamoyo wake.”
^ Onani matanthauzo ya mawu yanango.
^ Onani vakumapeto A5.
^ Mabaibolo yanango yanena kuti: “ntima wodzikonda.”
^ Mabaibolo yanango yanena kuti: “ntima wodzikonda.”
^ Panango kuti: “chisokonezo.”
