Kalata ya Yakobo 4:1-17
4 Ko nkhondo na ndewo zomwe zinkuchitika pakati panu zinkuchokera kuponi? Ko vinkuchokeralini mu vilakolako va thupi yanu vomwe vinkulimbana kuti vimbalamulire mathupi yanu?*
2 Mufunisisa, koma mutambiralini vomwe munkufuna. Mukupitiriza kupha wanthu ndipo mukhumbira mwantsanje koma mugumanalini chinthu. Mukupitiriza kugegedzana na kuchita nkhondo. Mulibe kutambira ndawa yakuti mulibe kukumbira.
3 Mukakumbira, mutambiralini ndawa mukumbira na cholinga choipa, kuti mundochita vomwe mathupi yanu yankufuna.
4 Wachigololo* imwe, ko munkudziwalini kuti kuchita ushamwali na dziko ni kudziikha pa chizondo na Mulungu? Ndipomwapa aliyese yemwe ankufuna kukhala shamwali wa dziko ankudzichitisa kuti ambazondewe na Mulungu.
5 Panango ko mukuganiza kuti lemba indonenambo palibe chifukwa kuti: “Mzimu womwe wakhazikika mwa isepano ufunisisa mwantsanje vinthu vosiyanasiyana”?
6 Koma olo nteno, kukoma ntima kukulu komwe Mulungu apereka kuposha khalidwe mweyi. Ndipomwapa lemba inena kuti: “Mulungu atsutsa odzikwiza, koma odzichepesa awawonesa kukoma ntima kwake kukulu.”
7 Ndipomwapa bverani Mulungu, koma tsutsani Ndyerekezi ndipo adzakuthaweni.
8 Fendererani Mulungu ndipo iyembo adzakufenderereni. Chenesani manja yanu imwepo ochimwa, ndipo chenesani mitima yanu imwepo okaikirakaikira.
9 Kwinyirirani ndipo lirani. Kuseka kwanu kukhale kulira ndipo kukondwa kwanu kukhale kukwinyirira.
10 Dzichepeseni pamaso pa Yahova* ndipo iye adzakukwizeni.
11 Abale, muleke kunenerana voipa. Aliyese yemwe ankunenera voipa m’bale wake panango kumuweruza, ankunenera voipa komasoti kuweruza lamulo. Manje peno unkuweruza lamulo, unkuchitalini vomwe lamulo inena koma ndiwe woweruza.
12 Koma Wopereka Malamulo na Woweruza alipo m’bodzi yekha, yemwe angakwanise pomwe kupulumusa na kudzonga. Manje iwepo ndiwe mbani kuti umbaweruze munzako?
13 Bvani imwepo omwe munena kuti: “Lero panango mangwana tiyende ku thaundi yakutiyakuti ndipo tikamale gole kumuko. Tifuna tikagulise vinthu kumuko nkukagumana phindu.”
14 Munena vimwevi koma munkudziwalini kuti moyo wanu udzakhale tani mangwana. Ndawa muli ninge pfulere yomwe indowoneka mukanthawe kang’onong’ono patsogolo pake nkusowa.
15 Koma mumbanene kuti: “Yahova* akabvuma, tikhale na moyo ndipo tichite vakutivakuti.”
16 Koma imwepo mukonda kumeka na kudzikwiza. Kudzikwiza kwatene ni koipa.
17 Ndipomwapa peno munthu ankudziwa kuchita chabwino koma neye kuchichita, ankuchimwa.
Mawu ya m’nyantsi
^ Mawu yake chaiyo ni yakuti: “vidzo vanu.”
^ Panango kuti: “osakhulupirika.”
^ Onani vakumapeto A5.
^ Onani vakumapeto A5.
