Kalata ya Yakobo 5:1-20
5 Bvani imwepo wanthu wachuma. Lirani mokuwa ndawa ya mabvuto yomwe yankubwera kwa imwepo.
2 Chuma chanu chawola ndipo vovala vanu vadyewa na nchenje.
3 Golide na siliva wanu vadzongeka na fuluju. Fuluju mwiyo idzakhale umboni wokutsutsani ndipo idzadye mnyompfu wanu. Vomwe mwasunga vidzakhale ninge moto mu ntsiku zomalizira.
4 Bvani! Malipiro yomwe mulibe kupereka kwa wanthu omwe adaphata basa yokolola m’maminda yanu yankukuwa ndipo Yahova* wa magulu yankhondo yakudzulu wabva kukuwa kokumbira thandizo kwa wanthu mwawo okolola.
5 Mwakhala na vinthu vizinji maninge pamoyo wanu ndipo dziko yapasi mwaidyerera. Mwadya ndipo mwanenepa ninge nyama pa ntsiku yomwe inkuyenda kukaphewa.
6 Mwaweruza na kupha munthu wolungama. Iye ankukutsutsani.
7 Manje dekhani abale, mpakana pa nthawe ya kukhalapo kwa Ambuya. Ganizirani momwe mulimi achitira. Iye apitiriza kudikhira vipaso vabwino maninge vochokera mudothi. Adikhira modekha mpakana nvula yoyamba na nvula yomalizira igwe.
8 Imwembo khalani odekha. Limbisani mitima yanu, ndawa kukhalapo kwa Ambuya kwafendera.
9 Abale ayi kuti mumbadandaule ndawa ya vochita va anango, kuti osati muweruziwe. Onani, Woweruza waima pansuwo.
10 Abale, pa nkhani yakubva vowawa na kudekha, tengerani chitsanzo cha aneneri omwe adayankhula mu dzina ya Yahova.*
11 Ninge momwe munkudziwira, wanthu omwe adapirira tiwawona kuti ni okondwa. Mudabva va kupirira kwa Yobu ndipo munkudziwa madaliso yomwe Yahova* adamupasa. Mukuwona mwekha kuti Yahova* ni wachikondi chikulu komasoti wachifundo.
12 Koma koposha vose abale wangu, lekani kulumbira, pakutomola kudzulu panango dziko yapasi panango kuchita lumbiro iriyose. Koma mukati “Inde,” ambakhaledi inde ndipo mukati “Ayi,” ambakhaledi ayi kuti osati mukhale oyenerera kuweruziwa.
13 Ko pali aliyese yemwe ankugumana na mabvuto pagulu yanu? Apitirize kupemphera. Ko pali aliyese yemwe ankukondwa? Aimbe nyimbo zotamanda Mulungu.
14 Ko pali aliyese yemwe ankudwala pagulu yanu? Achemere akulu wa mpingo, ndipo iwo amupempherere na kumudzoleka mafuta mu dzina ya Yahova.*
15 Pemphero yachikhulupiriro idzapolese munthu muyo yemwe ankudwala ndipo Yahova* adzamulimbise. Komasoti peno adachita machimo, adzakhululukiriwe.
16 Ndipomwapa muululirane machimo yanu pachena na kupemphererana, kuti mupolesewe. Pemphero yogwigwirira ya munthu wolungama iphata basa mwamphanvu maninge.
17 Eliya wenze ninge munthu ninge isepano, koma padapemphera kuchokera pasi pamoyo kuti nvula osati igwe, nvula iribedi kugwa mu dziko mwiyo kwa magole yatatu na minyezi 6.
18 Patsogolo pake adapemphera pomwe ndipo nvula idagwa kuchokera kudzulu mpakana dothi idabulisa vipaso vake.
19 Abale wangu, peno munango pagulu yanu wasiya chonadi ndawa yosokeresewa, manje munthu munango nkumubweza,
20 dziwani kuti yemwe wabweza munthu wochimwa muyo panjira yake yoipa, wamupulumusa ku impfa ndipo Mulungu adzakhululukire wochimwa muyo machimo yazinji.
Mawu ya m’nyantsi
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
^ Onani vakumapeto A5.
