Wonembewa na Yohani 12:1-50
12 Pazidandosala ntsiku 6 kuti Pasika ayambe, Yesu adafika ku Betaniya komwe kwenze Lazaro, yemwe Yesu adamumukisa kwa wakufa.
2 Pamwapo adamukonzera chakudya chamaulo kumuko ndipo Malita angawatumikira. Lazaro wenzembo pagulu ya wanthu omwe ambadya* naye pabodzi.
3 Manje Mariya adatenga mafuta yonunkhira. Mafuta mwayo yenze nado chaiye, yodula maninge yokwana magalama 327. Mariya adathira mafuta mwayo pa mapazi ya Yesu nkumbapukuta kumapazi mwayo na tsitsi yake. M’nyumba mose mumo mudandoti phuum kapfungo kabwino ka mafuta mwayo.
4 Koma Yudasi Sikariyoti m’bodzi wa wopfunzira wake yemwe wenze adasala pang’ono kumupereka adati:
5 “Ndawa chani mafuta yonunkhira mwaya yalibe kugulisiwa madinari 300 nkupereka kobiri mwizo kwa wanthu wosauka?”
6 Sikuti adanena vimwevi ndawa yoganizira wosauka, koma ndawa yakuti wenze mbava. Iye angasunga bokosi ya kobiri ndipo angaba kobiri zomwe zingathusiwa m’bokosi mwiyo.
7 Manje Yesu adawauza kuti: “Musiyeni achite mwambo moyu, pakukonzekera ntsiku yomwe nidzaikhiwe m’manda.
8 Wosauka mwawa munawo nthawe zose, koma inepano mudzakhalelini nane nthawe zose.”
9 Patsogolo pake gulu ikulu ya Ayuda idadziwa kuti Yesu ali kumuko. Pamwapo iyo idafika, osati ndawa ya Yesu yekha komasoti kuti idzaone Lazaro, yemwe iye adamumukisa kwa wakufa.
10 Manje wantsembe akulu adapangana vakuti aphe pomwe Lazaro,
11 ndawa Ayuda azinji ambayenda kumuko na kukhulupirira Yesu ndawa ya Lazaro muyo.
12 Mangwana yake, gulu ikulu ya wanthu yomwe ingayenda ku chikondwerero muko idabva kuti Yesu ankubwera ku Yerusalemu.
13 Pamwapo adatenga nthawi za kanjedza nkubula kukamuchunguzira. Ndipo adayamba kukuwa kuti: “M’pulumuseni! Wodalisiwa ni yemwe ankubwera mu dzina ya Yahova,* yemwe ni Mpfumu ya Izirayeli!”
14 Yesu padagumana bulu mng’ono, adapakira pa bulu muyo mobverana na vomwe Malemba yomwe yanena kuti:
15 “Ayi kugopa, mwana nkazi wa Ziyoni. Ona! Mpfumu yako inkubwera ilipakire mwana mwamuna wa bulu.”
16 Pakuyamba wopfunzira wake mwawo alibe kukwanisa kubvesa vimwevi. Koma Yesu padapasiwa ulemerero, iwo adakumbukira kuti vomwe wanthu mwawa adamuchitira venze volingana ndendende na vomwe vidanembewa pa nkhani ya iye.
17 Manje wanthu azinji womwe enzepo pomwe iye adachemera Lazaro kuti abule m’manda* nkumumukisa, adapitiriza kumuchitira umboni.
18 Ndipomwapa, wanthu azinji adayenda kukamuchunguzira ndawa adabva kuti adachita chizindikiro chimwechi.
19 Pamwapo Afalisi adayamba kukambirana kuti: “Pamwapa munkuchita kuwona mwekha kuti palibe chomwe tinkuphindulapo. Onani! Wanthu wose akumulondola.”
20 Pa gulu ya wanthu womwe enze adabwera kudzatumikira ku chikondwerero muko, penze pomwe Agiriki.
21 Iwo adayenda kwa Filipo yemwe kwawo kwenze ku Betsaida wa ku Galileya, ndipo adayamba kumukumbira kuti: “Isepano tinkufuna kuwona Yesu.”
22 Filipo adayenda kukauza Andireya vimwevo ndipo Filipo na Andireya adayenda kukauza Yesu.
23 Koma Yesu adawadawira kuti: “Nthawe yakuti Mwana wa munthu alemekezewe yafika.
24 Shuwa nikukuuzani, kambewu ka tirigu kakaleka kugwera padongo nkufa, kapitiriza kukhala kabodzi mwako basi. Koma kakafa kabereka vipaso vizinji.
25 Aliyese yemwe akonda moyo wake ankuudzonga, koma aliyese yemwe azonda moyo wake mu dziko ino ankuuteteza kuti adzagumane moyo wosapera.
26 Peno munthu ankufuna kunitumikira anilondole, ndipo komwe ine nidzakhale, ntumiki wangu adzakhalembo kumuko. Aliyese wonitumikira, Ababa adzamulemekeze.
27 Moyo wangu unkushupika manjeuno, ko ninene chani? Ababa nipulumuseni ku nthawe yoshupa iyi. Koma nthawe mweyi ikufunika kunifikira pakuti ndivo vomwe nidabwerera.
28 Ababa lemekezani dzina yanu.” Padateno mawu yadabveka kuchokera kudzulu kuti: “Nailemekeza, ndipo nidzailemekeze pomwe.”
29 Gulu ya wanthu yomwe yenze imirire pamwapo idabva vimwevi ndipo adayamba kunena kuti kwagunda dedza. Anango ambanena kuti: “Mngelo wayankhula naye.”
30 Yesu adawauza kuti: ‘Mawu mwaya yalibe kubveka ndawa ya ine, koma ndawa ya imwepo.
31 Manje dziko iyi inkuweruziwa, wolamulira wa dziko iyi aponyewe kunja.
32 Koma ine nikadzakwiziwa m’dzulu padziko yapasi, nidzachitise wanthu wosiyanasiyana kubwera kwa ine.”
33 Ambanena vimwevi pakufuna kuwonesa momwe adzafere pakandopita nthawe ing’ono.
34 Manje gulu ya wanthu mwiyo idamudawira kuti: “Ise tidabva mu Chilamulo kuti Khrisitu adzakhale mpakana kalekale. Manje imwepo munkunena tani kuti Mwana wa munthu afunika kukwiziwa m’dzulu? Ko Mwana muyo nimbani?”
35 Yesu adawauza kuti: “Kugwerewera kupitirize kukhala pakati panu kanthawe pang’ono. Fambani pomwe kugwerewera muko mudakali nako, kuti mdima uleke kukuphatani. Aliyese yemwe akuyenda mu mdima adziwalini komwe ankuyenda.
36 Pomwe kugwerewera mudakali nako, wonesani kuti mukhulupirira kugwerewera uko kuti mukhale wana wake wa kugwerewera.”
Yesu padanena vimwevi, adachoka nkukabishala.
37 Podiya kuti adachita vizindikiro vizinji pamaso pawo, iwo angamukhulupiriralini,
38 mwakuti mawu ya mneneri Yesaya yadakwanirisiwa. Iye adati: “Yahova,* ko nimbani yemwe wakhulupirira vinthu vomwe adabva kwa ise? Ndipo ko djanja ya Yahova* yawonesewa kwa mbani?”
39 Ndawa chomwe chidachitisa kuti aleke kukhulupirira ndicho chomwe Yesaya adanenambo kuti:
40 “Wachitisa kuti aleke kuwona na maso yawo, ndipo waumisa mitima yawo kuti aleke kuwona na maso yawo mwayo kuti mitima ayi kuti yabvese vinthu nkuchungunuka kuti ine niwapolese.”
41 Yesaya adanena vimwevi ndawa adawona ulemerero wa Khrisitu ndipo adanena va iye.
42 Koma olo nteno, penze wanthu anango womwe adamukhulupirira, komasoti wolamulira azinji. Koma alibe kudawikiza powonekera ndawa ambagopa kuti Afalisi angawachose musunagoge.
43 Iwo angakonda maninge ulemerero wa wanthu kuposha ulemerero wa Mulungu.
44 Koma Yesu adakuwa kuti: “Aliyese yemwe akukhulupirira ine ankukhulupiriralini ine nekha, koma ankukhulupirira pomwe yemwe adanituma.
45 Aliyese yemwe waona ine, waona pomwe yemwe adanituma.
46 Nabwera ninge kugwerewera mu dziko, kuti aliyese wokhulupirira ine ayi kuti apitirize kukhala mumdima.
47 Peno wabva mawu yangu koma osayasunga, ine ningamuweruzelini ndawa niribe kubwera kudzaweruza dziko, koma kudzaipulumusa.
48 Aliyese woninyalanyaza komasoti yemwe atambiralini mawu yangu, ali naye m’bodzi womuweruza. Mawu yomwe ine nayankhula ni yomwe yadzamuweruze pa ntsiku yomalizira.
49 Ndawa niribe kuyankhulako va mumsolo mwangu, koma Ababa mwawo womwe adanituma adanipasa lamulo pa vomwe nifunika kunena na vomwe nifunika kuyankhula.
50 Ndipo nikudziwa kuti lamulo yake niyothandiza wanthu kudzagumana moyo wosapera. Ndipomwapa, vomwe niyankhula, niviyankhula mobverana na vomwe Ababa aniuza.”
Mawu ya m’nyantsi
^ Adakhala mozungulira meza.
^ Onani vakumapeto A5.
^ Panango kuti: “manda yachikumbuso.”
^ Onani vakumapeto A5.
^ Onani vakumapeto A5.
