Wonembewa na Yohani 14:1-31
14 Mitima yanu osati ishupike. Khulupirirani Mulungu, khulupirirani pomwe ine.
2 M’nyumba ya Ababa wangu muli malo yazinji yokhalamo. Mudakakhala kuti mulibe malo nidakakuuzani, ndawa nikuyenda kukakukonzerani malo.
3 Manje nikayenda kukakukonzerani malo mwayo, nidzabwere pomwe kudzakutengani kuti muyende kwathu, kuti komwe ine nikakhale imwembo mukakhale kumuko.
4 Ndipo komwe ine nikuyenda, njira yake mukuidziwa.”
5 Thomasi adabvunza kuti: “Ambuya, isepano tinkudziwalini komwe mukuyenda. Manje njira yake tingaidziwe tani?”
6 Yesu adamuuza kuti: “Ine ndine njira, chonadi na moyo. Palibe yemwe afika kwa Ababa osapitira mwa ine.
7 Wanthu imwe mudakakhala kuti mukunidziwa, mudakadziwa pomwe Ababa wangu. Kuyambira manje uno muwadziwe ndipo mwawaona kale.”
8 Filipo adamuuza kuti: “Ambuya, tiwoneseni Ababa mwawo ndipo titsimikizire.”
9 Yesu adamuuza kuti: “Ko iwepo Filipo ukanati wanidziwa podiya kuti wanthu imwe nakhala namwe nthawe yose mweyi? Yemwe waona ine waona pomwe Ababa. Manje iwepo ndawa chani ukunena kuti: “Tiwoneseni Ababa’?
10 Ko ukukhulupiriralini kuti Ababa na ine ndise wobverana? Vinthu vomwe nikuuzani niyankhulalini va mumsolo mwangu, koma Ababa yemwe ni wobverana na ine ndiye ankuchita basa zake pophatisa basa ine.
11 Khulupirira vomwe nanena kuti inepano na Ababa ndise wobverana, apo neye, ndokhulupirira ndawa ya basa zokha.
12 Shuwa nikukuuzani, aliyese wokhulupirira ine, nayembo adzachite basa zomwe ine nizichita, ndipo adzachite basa zikuluzikulu kuposha zimwezi ndawa inepano nikuyenda kwa Ababa.
13 Komasoti chirichose chomwe mudzakumbire mu dzina yangu, ine nidzachichite, kuti Ababa alemekezewe pakuphatisira basa Mwana wake.
14 Peno mungakumbire chirichose mu dzina yangu, ine nidzachichite.
15 Peno munikonda, mudzaphatise basa malamulo yangu.
16 Ine nidzakumbire Ababa ndipo adzakupaseni wokuthandizani* munango kuti adzakhale namwe mpakana kalekale.
17 Wokuthandizani muyo ni mzimu wa chonadi womwe dziko ingautambirelini, ndawa iuwonalini panango kuudziwa. Imwepo muudziwa ndawa ukhala pakati panu ndipo uli namwe.
18 Nikusiyenilini ninge wana wamasiye. Nidzabwere kwa imwepo.
19 Kwasala kanthawe kang’onong’ono ndipo dziko idzaniwonelini pomwe. Koma imwepo mudzaniwone, ndawa ninamoyo ndipo imwembo mudzakhale na moyo.
20 Pantsiku mwiyo mudzadziwe kuti ine ndine wobverana na Ababa komasoti imwepo na ine ndise wobverana.
21 Aliyese yemwe anamalamulo yangu ndipo ayatewedza, ndiye yemwe anikonda. Ndipo yemwe anikonda inepano, Ababa wangu adzamukonde. Inembo nidzamukonde ndipo nidzadziwonesere bwinobwino kwa iye.”
22 Yudasi munango osati Sikariyoti, adamubvunza kuti: “Ambuya, ndawa chani mukufuna kudziwonesera bwinobwino kwa ise koma osati kudziko?”
23 Yesu adamudawira kuti: “Peno munthu anikonda, adzaphatise basa mawu yangu ndipo Ababa wangu adzamukonde komasoti tidzayende kwa iwo nkukakhala nawo.
24 Yemwe anikondalini aphatisalini basa mawu yangu, ndipo mawu yomwe munkubva ni yangulini, koma ni ya Ababa omwe adanituma.
25 Nakuuzani vimwevi pomwe nikali namwe pabodzi.
26 Koma wokuthandizani, yemwe ni mzimu uchena womwe Ababa wangu adzatumize mu dzina yangu, adzakupfunziseni na kukukumbusani vinthu vose vomwe nidakuuzani.
27 Ninkukusiirani ntendere ndipo nikupaseni ntendere wangu. Nikuuperekalini kwa imwepo ninge momwe dziko iuperekera. Mitima yanu osati ishupike panango kuchita mantha.
28 Mwanibva ninkukuuzani kuti: “Nikuyenda ndipo nidzabwere pomwe kwa imwepo.’ Peno munikonda, mudakakondwa kuti nikuyenda kwa Ababa wangu, ndawa Ababa ni akulu kuposha ine.
29 Ndipomwapa nakuuzani vikalibe kuchitika, kuti vikachitika mukhulupirire.
30 Niyankhule namwelini vizinji ndawa wolamulira wa dziko akubwera ndipo alibe mphanvu pa ine.
31 Koma kuti dziko idziwe kuti nikonda Ababa, ninkuchita vinthu mobverana na vomwe Ababa mwawo adanilamula. Nyamukani, naboni tichokeko kuno.”
Mawu ya m’nyantsi
^ Panango kuti: “wokulimbikisani.”
