Wonembewa na Yohani 15:1-27
15 “Ine ndine muti wa uva chaiwo ndipo Ababa wangu ni mulimi.
2 Iwo agwata nthawi iliyose mwa ine yomwe ibalalini vipaso ndipo iriyose yomwe ibala vipaso aithephulira kuti ibereke vipaso vizinji.
3 Imwepo ndimwe wochena kale ndawa ya mawu yomwe ine nakuuzani.
4 Mukhale wobverana na inepano ndipo inembo nikhale wobverana na imwepo. Molingana na nthawi yomwe ingaberekelini vipaso payokha, pokhapokha peno ingakhale yolumatidzika kumuti wa uva muyo, imwembo mungaberekelini vipaso pokhapokha peno ndimwe wolumatidzika kwa inepano.
5 Inepano ndine muti wa uva, imwepo ndimwe nthawi zake. Aliyese yemwe ali wolumatidzika kwa ine, inembo nkukhala wolumatidzika kwa iye, abala vipaso vizinji, ndawa mungakwaniselini kuchita chirichose palibe inepano.
6 Peno munthu akupitirizalini kukhala wolumatidzika kwa inepano, athusiwa kunja ninge nthawi ndipo auma. Wanthu aunganidza nthawi zateno nkuzithusa pamoto ndipo zikupsa.
7 Mukapitiriza kukhala wobverana na inepano na kumbaphatisa basa mawu yangu, mungakwanise kukumbira chirichose chomwe mukufuna ndipo chidzakuchitikireni.
8 Ababa alemekezeka mukapitiriza kubereka vipaso vizinji komasoti mukambawonesa kuti ndimwe wopfunzira wangu.
9 Molingana na Ababa womwe anikonda, inembo nikukondani. Ndipomwapa pitirizani kuchita vinthu vomwe vingachitise kuti nipitirize kukukondani.
10 Mukambaphatisa basa malamulo yangu mudzachitise kuti nthawe zose nimbakukondeni, ninge momwe inepano nisungira malamulo ya Ababa vomwe vichitisa kuti nthawe zose ambanikonde.
11 Nakuuzani vinthu vimwevi kuti mukhale na chimwemwe chomwe ine ninacho komasoti kuti chimwemwe chanu chidzale maninge.
12 Nikukulamulani kuti mumbakondane ninge momwe inepano nikukonderani.
13 Palibe yemwe anachikondi chikulu kuposha cha munthu yemwe wapereka moyo wake ndawa ya anzake.
14 Mukambachita vomwe nikukulamulani mukhale anzangu.
15 Ninkukuchemeranilini pomwe kuti akapolo ndawa kapolo adziwalini vomwe abwana wake ankuchita. Koma nakuchemerani kuti anzangu, ndawa nakudziwisani vinthu vose vomwe nabva kwa Ababa wangu.
16 Mulibe kunisankhula ndimwepo, koma inepano nidakusankhulani kuti mupitirize kubereka vipaso vizinji nakuti vipaso vanu vileke kumala, kuti chirichose chomwe mungakumbire Ababa mu dzina yangu akupaseni.
17 Nikukulamulani vinthu vimwevi na cholinga chakuti mumbakondane.
18 Peno dziko inkuzondana namwe, mumbakumbukire kuti idayamba kuzondana na ine ikanati kuzondana na imwepo.
19 Mudakakhala mbali ya dziko, dziko idakakukondani ninge mbali yake. Pakuti mulilini mbali ya dziko, koma ine nidakusankhulani kuchokera ku dziko, ndipomwapa dziko ikukuzondani.
20 Mumbakumbukire mawu yomwe nidakuuzani yale yakuti: Kapolo angakhalelini nkulu kuposha bwana wake. Peno adadzudza inepano, imwembo adzakudzudzeni. Peno aphatisa basa mawu yangu, adzaphatisembo basa mawu yanu.
21 Koma adzakuchitireni vose vimwevi ndawa ya dzina yangu, ndawa yemwe adanituma inepano akumudziwalini.
22 Nidakaleka kubwera kudzayankhula nawo, adakakhala alibe chimo. Koma manje angalambelini chimo yawo.
23 Aliyese yemwe azonda ine azonda pomwe Ababa wangu.
24 Nidakati niribe kuchita basa pamaso pawo zomwe palibe munango adachitako, adakakhala alibe chimo. Koma manje aniwona ndipo azondana nane komasoti azondana na Ababa wangu.
25 Vimwevi vachitika kuti mawu yomwe yadanembewa mu Chilamulo yakwanirisiwe. Mawu yake ni yakuti: ‘Adanizonda palibe chifukwa.’
26 Akadzafika wokuthandizani yemwe nidzakutumizireni kuchokera kwa Ababa, yemwe ni mzimu wa chonadi wochokera kwa Ababa, muyo adzanichitire umboni,
27 ndipo imwembo mudzanichitire umboni, ndawa mwakhala na ine kundochokera pakuyambirira.”
