Wonembewa na Yohani 16:1-33
16 Nakuuzani vinthu vimwevi kuti chikhulupiriro chanu osati chimale.
2 Wanthu adzakuchoseni mu sunagoge. Ndipo nthawe ikubwera pomwe aliyese yemwe adzakupheni adzaganize kuti wachita utumiki wabwino kwa Mulungu.
3 Koma adzachite vimwevi ndawa akunidziwalini ndipo akuwadziwalini Ababa.
4 Koma nakuuzani vinthu vimwevi, kuti nthawe yakuti vichitike ikadzafika, mudzakumbukire kuti nidakuuzani.
Vinthu vimwevi niribe kukuuzani pakuyambirira ndawa nenze namwe pabodzi.
5 Manje nikuyenda kwa yemwe adanituma, koma palibe aliyese wa imwepo yemwe akunibvunza kuti: ‘Mukuyenda kuponi?’
6 Koma ndawa nakuuzani vinthu vimwevi, ndimwe wokwinyirira maninge.
7 Kunena shuwa, nikuyenda kuti imwepo muphindule. Ndawa nikaleka kuyenda ndiye kuti wokuthandizani ule abwerelini kwa imwepo. Koma nikayenda nidzamutumize kwa imwepo.
8 Ndipo akadzabwera adzapereke umboni wotsimikizika kudziko wonena va chimo, vachilungamo komasoti va chiweruzo.
9 Chakuyamba adzapereke umboni wonena va chimo, ndawa iwo ankunikhulupiriralini.
10 Patsogolo pake adzapereke umboni wonena va chilungamo, ndawa ine ninkuyenda kwa Ababa ndipo imwepo mudzaniwonelini pomwe.
11 Pakumalizira adzapereke umboni wonena va chiweruzo, ndawa wolamulira wa dziko ino waweruziwa.
12 Nidakali na vinthu vizinji vakuti nikuuzeni, koma padakali pano mungakwaniselini kuvibvesa vose.
13 Koma wokuthandizani muyo akadzabwera yemwe ni mzimu wa chonadi, adzakutsogolereni mu chonadi chose. Ndawa adzayankhulelini vomwe wandoganiza payekha, koma adzayankhule vomwe wabva ndipo adzalengeze kwa imwepo vinthu vomwe vikubwera.
14 Iye adzanilemekeze, ndawa adzalengeze kwa imwepo vinthu vomwe watambira kuchokera kwa ine.
15 Vinthu vose vomwe Ababa ali navo ni vangu. Ndipomwapa nafotokoza kuti wokuthandizani muyo adzalengeze kwa imwe vinthu vomwe watambira kuchokera kwa ine.
16 Kwa kanthawe mudzaniwonelini pomwe, ndipo kwakanthawe mudzaniwone.”
17 Padanena vimwevi, anango mwa wopfunzira wake mwawo adayamba kubvunzana kuti: “Ko akutanthauza chani pomwe akutiuza kuti: ‘Kwakanthawe mudzaniwonelini pomwe, ndipo kwakanthawe mudzaniwone,’ komasoti kuti, ‘ndawa nikuyenda kwa Ababa’?”
18 Iwo ambanena kuti: “Ko akutanthauza chani pomwe akuti, ‘kwakanthawe’? Tinkudziwalini vomwe akunena.”
19 Yesu adadziwa kuti akufuna kumubvunza, ndipomwapa adawabvunza kuti: “Ko mukubvunzana vimwevi ndawa nanena kuti: “Kwakanthawe mudzaniwonelini, komasoti kuti kwakanthawe mudzaniwone’?
20 Shuwa ninkukuuzani, mudzagwese misozi na kulira mokuwa, koma dziko iyi idzakondwe. Mudzakwinyirire, koma kukwinyirira kwanu adzakusanduse chimwemwe.
21 Nkazi akambabereka adzudzika maninge ndawa nthawe yake yafika. Koma mwana akabadwa akumbukiralini pomwe ululu wose ule ndawa yokondwa kuti munthu wabadwa padziko.
22 Nchibodzibodzimbo imwepo, manjeuno ndimwe wokwinyirira. Koma nidzakuwoneni pomwe ndipo mitima yanu yadzakondwe. Palibe pomwe yemwe adzachitise kuti muleke kukondwa.
23 Pantsiku mwiyo mudzanibvunzelini pomwe. Shuwa ninkukuuzani, peno mungakumbire chirichose kwa Ababa mu dzina yangu adzakupaseni.
24 Namanje mukanati kukumbira chirichose mu dzina yangu. Kumbirani ndipo mudzatambire, kuti chimwemwe chanu chidzale maninge.
25 Nayankhula vimwevi kwa imwepo pophatisa basa vitsanzo. Nthawe ikubwera yomwe nidzayankhulenamwelini pomwe pakuphatisa basa vitsanzo, koma nidzakuuzeni va Ababa mobveka bwino.
26 Pantsiku mwiyo mudzakumbire kanthu kwa Ababa mu dzina yangu. Nikutanthauzalini kuti inepano nidzakukumbilireni neye.
27 Ababa mwawo akukondani ndawa mudanikonda ndipo mwakhulupirira kuti nidabwera ndawa yochita kutumiwa na Mulungu.
28 Kuti nibwere mudziko ino nidachita kutumiwa na Ababa. Manje nikuchoka mudziko ndipo nikuyenda kwa Ababa.”
29 Wopfunzira wake mwawo adanena kuti: “Ambuya, manje tinkubvesa vomwe mukunena ndawa mukuphatisalini basa vitsanzo.
30 Tadziwa manje kuti imwepo mukudziwa vinthu vose ndipo pafunikalini pomwe kuti munthu achite kukubvunzani. Ndipomwapa tinkukhulupirira kuti mudachokeradi kwa Mulungu.”
31 Yesu adawadawira kuti: “Ko munkukhulupirira manje?
32 Shuwa ninkukuuzani, nthawe inkubwera ndipo yafika kale, yomwe mose mumwazike, aliyese kuyenda kumuyi kwake ndipo munisiye nekha. Koma nikhalelini nekha, ndawa Ababa ali nane.
33 Ine nakuuzani vimwevi kuti mukhale pantendere ndawa ya ine. Mudziko umu mugumane na mabvuto yakuluyakulu ndawa ya ine, koma limbani ntima. Ine nayigonjesa dziko.”
