Wonembewa na Yohani 18:1-40
-
Yudasi ankupereka Yesu (1-9)
-
Petulo ankuphatisa basa chibemba (10, 11)
-
Yesu wayendesewa kwa Anasi (12-14)
-
Petulo wayamba kulamba Yesu (15-18)
-
Yesu waimirira pamaso pa Anasi (19-24)
-
Petulo ankulamba Yesu kachiwiri na kachitatu (25-27)
-
Yesu waima pamaso pa Pilato (28-40)
-
“Ufumu wangu ulilini saidi ya dziko ino” (36)
-
18 Padamaliza kunena vimwevi, Yesu adabula pabodzi na wopfunzira wake nkuyambuka chigwa cha Khidironi nkuyenda komwe kwenze munda. Iye na wopfunzira wake mwawo adangena m’munda mumo.
2 Yudasi yemwe adamupereka ule, ambayadziwambo malo mwayo, ndawa nthawe zizinji Yesu ambagumana na wopfunzira wake kumuko.
3 Pamwapo Yudasi adatenga magulu ya masocha komasoti magwarda yochokera kwa antsembe akulu na kwa Afalisi. Iwo adafika kumuko ali takule vounikira, na vitsulo va nkhondo.
4 Pakuti Yesu angadziwa vose vomwe vimuchitikire, adawafenderera nkuwabvunza kuti: “Munkufuna mbani?”
5 Iwo adamudawira kuti: “Yesu wa ku Nazareti.” Iye adati: “Ndinepano.” Yudasi yemwe adamupereka ule, wenzembo pamwapo.
6 Koma padawauza kuti: “Ndinepano,” iwo adabwerera m’mambuyo nkugwa pasi.
7 Patsogolo pake adawabvunza pomwe kuti: “Munkufuna mbani?” Iwo adati: “Yesu wa ku Nazareti.”
8 Yesu adati: “Nakuuzani kuti ndinepano. Manje peno mukufuna inepano, asiyeni awa ambayende.”
9 Vimwevi vidachitika kuti mawu yomwe iye adanena yakwanirisiwe, yakuti: “Pa wanthu wose womwe mudanipasa niribe kutayako olo m’bodzi.”
10 Patsogolo pake Petulo yemwe wenze na chibemba, adachisolola nkutema nacho kapolo nkulu wa antsembe mpakana kugwatiratu dzitu yake ya kumakulu. Kapolo muyo dzina yake ni Makasi.
11 Koma Yesu adauza Petulo kuti: “Bwezera chibemba mwicho pa malo yake. Ko nifunikalini kumwa va mkhapu yomwe Ababa anipasa?”
12 Patsogolo pake masocha yale, nkulu wa masocha na magwarda ya Ayuda adaphata Yesu nkumumanga.
13 Pakuyamba adayenda naye kwa Anasi, ndawa wenze mpongozi wa Kayafa, yemwe wenze nkulu wa antsembe gole mwiyo.
14 Kayafa moyu ni ule yemwe adauza Ayuda kuti venze vothandiza kwa iwo kuti munthu m’bodzi afere wanthu wose.
15 Manje Simoni Petulo komasoti wopfunzira anango ambalondola Yesu. Wopfunzira munango muyo ambadziwana na nkulu wa antsembe, ndipomwapa adangena pabodzi na Yesu mu mpanda wa nyumba ya nkulu wa antsembe.
16 Koma Petulo adaimirira kunja pansuwo.* Pamwapo wopfunzira yemwe angadziwana na nkulu wa antsembe ule, adayenda kukayankhula na gwarda wa pansuwo nkumungenesa Petulo.
17 Nyabasa wachitsikana yemwe wenze gwarda wa pansuwo mwapo adabvunza Petulo kuti: “Ko imwepo ndimwembolini wopfunzira wa munthu moyu?” Iye adati: “Neye ndinelini.”
18 Manje anyabasa na magwarda enze adaima pafupi na moto wamasimbe womwe adagasa, ndawa kumbazizira ndipo ambawotha moto muyo. Nayembo Petulo adaima nawo pabodzi nkumbawotha nawo moto muyo.
19 Manje wantsembe nkulu adabvunza Yesu va wopfunzira wake komasoti vomwe angapfunzisa.
20 Yesu adamudawira kuti: “Nayankhula powonekera kudziko iyi. Nthawe zose nimbapfunzisa mu sunagoge na mukachisi, komwe Ayuda wose ambasonkhana, ndipo niribe kuyankhula chirichose kumbali.
21 Ndawa chani munkubvunza inepano? Bvunzani womwe adabva vomwe nimbawauza. Onani! Wose awa akudziwa vomwe nidanena.”
22 Padanena vimwevi, gwarda yemwe wenze adaima pafupi adakwantsa Yesu mbama nkunena kuti: “Ungamudawire tene wantsembe nkulu?”
23 Yesu adamudawira kuti: “Peno naphonyesa mawu, niuze* chomwe naphonya. Koma peno palibe chanaphonyesa, ndawa chani wanimenya?”
24 Patsogolo pake Anasi adatumiza Yesu ali womanga kwa Kayafa nkulu wa antsembe.
25 Panthawe mwiyi Simoni Petulo wenze adaima pamwapo nkumbawotha moto. Manje iwo adamubvunza kuti: “Ko iwembo ndiwelini wopfunzira wake?” Iye adalamba nkunena kuti: “Neye ndinelini.”
26 Kapolo m’bodzi wa nkulu wa antsembe, yemwe wenze pomwe m’bale wa munthu ule yemwe Petulo adamugwata dzitu ule, adati: “Nakuwona m’munda mule iwe uli naye pabodzi, ko ninkukunamizira?”
27 Koma Petulo adalamba pomwe ndipo nthawe mwiyoletu tambala adalira.
28 Manje iwo adatenga Yesu kuchoka kwa Kayafa nkuyenda naye kunyumba ya governador. Nthawe mweyi yenze machibese maninge. Koma iwo alibe kungena mu nyumba ya governador muyo pakugopa kupsyipiziwa. Iwo ambafuna kuti akakwanise kudya Pasika.
29 Pamwapo Pilato adabula nkuwabvunza kuti: “Ko munthu moyu anamulandu wanyi?”
30 Iwo adamudawira kuti: “Munthu moyu adakakhala kuti achitalini voipa, tidakabweranayelini kwa imwepo.”
31 Pamwapo Pilato adawauza kuti: “Mutengeni mukamuweruze mwekha mobverana na chilamulo chanu.” Ayuda mwawo adamuuza kuti: “Tiribe ulamuliro wakupha munthu aliyese.”
32 Vimwevi vidachitika kuti mawu yomwe Yesu adanena yowonesa momwe adzafere, yakwanirisiwe.
33 Pamwapo Pilato adangena pomwe m’nyumba mwa governador nkuchemera Yesu ndipo adamubvunza kuti: “Ko ndiwe Mpfumu ya Ayuda?”
34 Yesu adadawira kuti: “Ko munkubvunza vimwevi ndawa yofuna kudziwadi, panango ndawa yakuti anango akuuzani va inepano?”
35 Pilato adadawira kuti: “Ko inepano ndine Muyuda? Ayuda anzako na antsembe akulu ndiwo omwe akupereka kwa inepano. Ko udaphonya chani?”
36 Yesu adadawira kuti: “Ufumu wangu ulilini saidi ya dziko. Ufumu wangu udakakhala saidi ya dziko, atumiki wangu adakamenya nkhondo kuti osati niperekewe kwa Ayuda. Koma Ufumu wangu ulilini saidi ya dziko iyi.”
37 Pilato adamubvunza kuti: “Okhe* nabva, koma ko ndiwe mpfumu?” Yesu adadawira kuti: “Munkunena mwekha kuti ndine mpfumu. Nidabadwa komasoti nidabwera mudziko kuti nidzachitire umboni chonadi. Aliyese yemwe ali kumbali ya chonadi abvesera mawu yangu.”
38 Pilato adamubvunza kuti: “Chonadi nchani?”
Padandomaliza kumubvunza mbvunzo muyu adabula nkuyenda komwe kwenze Ayuda kule, ndipo adawauza kuti: “Inepano nikugumanalini mulandu uliwose womwe munthu muyu wapalamula.
39 Pale imwepo munamwambo wakuti nimbakumasulireni munthu m’bodzi pa Pasika. Manje ko munkufuna kuti nikumasulireni Mpfumu ya Ayuda?”
40 Wanthu mwawo adakuwa pomwe kuti: “Umuyo neye, koma Baraba!” Koma Baraba muyo wenze chigananga.
Mawu ya m’nyantsi
^ Panango kuti: “pongenera.”
^ Panango kuti: “perekera umboni.”
^ Panango kuti: “chabwino.”
