Wonembewa na Yohani 19:1-42
19 Patsogolo pake Pilato adatenga Yesu nkumukwapula.
2 Ndipo masocha yadakonza chisote chachifumu chaminga nkumuvazika ku msolo. Adamuvazika pomwe malaya yakunja yafuwira.
3 Manje angayenda kwa iye nkumbanena kuti: “Muli tani, Mpfumu ya Ayuda?” Komasoti ambamumenya mafaiti kunkhope.
4 Pilato adabula pomwe panja nkuwauza kuti: “Onani! Nimubulise panja pano kwa imwepo, kuti mudziwe kuti niribe kumugumana na mulandu.”
5 Pamwapo Yesu adabula panja ali vale chisote chachifumu chaminga chile na malaya yakunja yafuwira. Manje Pilato adawauza kuti: “Onani! Mwamuna ule ni uyu!”
6 Koma antsembe akulu na magwarda padamuwona, adakuwa kuti: “Amanikiwe muyo! Amanikiwe muyo!”* Pilato adawauza kuti: “Mutengeni mukamumanike* mwekha, ndawa ine ninkumugumanalini na mulandu uliwose.”
7 Ayuda mwawo adamudawira kuti: “Tinachilamulo ise ndipo mobverana na chilamulo mwicho, iye ankufunika kufa ndawa ankudziyesa mwana wa Mulungu.”
8 Pilato padabva vimwivo, adachita mantha maninge.
9 Manje adangena pomwe m’nyumba ya governador mule nkubvunza Yesu kuti: “Ko kwanu nkuponi?” Koma Yesu alibe kumudawira.
10 Pamwapo Pilato adamuuza kuti: “Ko unkufunalini kuyankhula nane? Ko ukudziwalini kuti ninamphanvu zokumasula komasoti zokumanika?”*
11 Yesu adamudawira kuti: “Sembe mulibe kupasiwa kuchokera kudzulu, mudakakhala mulibe mphanvu iriyose pa inepano. Ndawa ya vimwevi, munthu yemwe wanipereka kwa imwepo anachimo ikulu maninge.”
12 Ndawa ya vimwevi, Pilato adayesesa kufagafaga njira yakuti amumasule. Koma Ayuda mwawo adakuwa kuti: “Mukamumasula munthu moyu, ndiye kuti imwepo ndimwelini munzake wa Kaisara. Munthu aliyese yemwe adziyesa mpfumu ni wotsutsana na Kaisara.”
13 Manje Pilato padabva mawu mwaya, adabulisa Yesu panja ndipo iye adakhala pampando wotongera milandu, pamalo yomwe pasi pake padakonzewa na minyala yomwe mu Chiheberi yambachemerewa kuti Gabatá.
14 Ntsiku mweyi yenze Ntsiku Yokonzekera Pasika ndipo nthawe yenze cha m’ma 12 ora. Pamwapo iye adauza Ayuda mwawo kuti: “Onani! Mpfumu yanu iyi!”
15 Koma iwo adakuwa kuti: “Mupheni! Mupheni! Amanikiwe* muyo!” Pilato adawabvunza kuti: “Ko nimanike mpfumu yanu?” Antsembe akulu adadawira kuti: “Tiribe mpfumu inango koma Kaisara.”
16 Patsogolo pake adamupereka iwo kuti akamuphe mwakuchita kumumanika pamuti.
Apa manje Yesu wenze m’manja mwawo.
17 Iye adatakula yekha muti wodzudzikirapo* nkubula nkuyenda kumalo yomwe yambachemerewa kuti Chibade, koma mu Chiheberi yambachemerewa kuti Gologota.
18 Kumuko adamumanika pamuti pabodzi na amuna anango awiri, munango mbali iyi, munango mbali inango, Yesu wenze pakati.
19 Pilato adanemba pomwe dzina yaudindo nkuiikha pamuti muyo wodzudzikirapo.* Adanemba kuti: “Yesu wa ku Nazareti, Mpfumu ya Ayuda.”
20 Ayuda azinji adawerenga dzina yaudindo mwiyo ndawa malo yomwe Yesu adamanikiwa yenze pafupi na thaundi ndipo adainemba mu Chiheberi, mu Chilatini na mu Chigiriki.
21 Koma wantsembe akulu wa Ayuda mwawo adauza Pilato kuti: “Ayi kunemba kuti ‘Mpfumu ya Ayuda,’ koma munembe kuti iye adanena kuti: ‘Ndine Mpfumu ya Ayuda.’”
22 Koma Pilato adawadawira kuti: “Vomwe nanemba, nanemba.”
23 Masocha mwayo payadamukhomerera Yesu pa muti, yadatenga malaya yake yakunja nkuyang’amba vigawo vinayi na cholinga chakuti nsocha aliyese atengeko chigawo chibodzi. Adatenga pomwe malaya yankati. Koma malaya yankati mwayo yenze yalibe nsono, yenze nguwo ibodzi yochokera padzulu mpakana pasi.
24 Pamwapo iwo adakambirana kuti: “Malaya mwaya osati tiyang’ambe, koma naboni tichite maere kuti tidziwe yemwe angatenge malaya mwaya. Vimwevi vidachitika kuti lemba ikwanirisiwe yomwe inena kuti: “Iwo adagawana vovala vangu ndipo adachita maere pa vovala vangu.” Pamwapo masocha mwayo yadachitadi vimwevo.
25 Koma pafupi na muti wodzudzikirapo* wa Yesu, padaima amayi wake na abale wawo wa amayi wake mwawo, Mariya nkazi wa Kulopa, komasoti Mariya wa ku Magadala.
26 Manje Yesu padawona amayi wake mwawo na wopfunzira yemwe angamukonda ule aliime pafupi, adauza amayi wake mwawo kuti: “Amayi, kuyambira lero uyu akhale mwana wanu.”
27 Patsogolo pake adauza wopfunzira muyo kuti: “Kuyambira lero awa akhale amayi wako.” Kuyambira nthawe mwiyo wopfunzira muyo adatenga amayi wale nkuyenda nawo kumuyi kwake.
28 Patsogolo pake, Yesu padadziwa kuti manje vose vachitika kuti malemba yakwanirisiwe, adanena kuti: “Ninkubva nyota.”
29 Pamalo mwapo penze mtsuko wodzala na vinyu wowawasha. Pamwapo adatenga siponja* nkuivuwika mu vinyu wowawasha muyo ndipo adaitsomeka ku kamuti ka hisope nkuifikisa pakamwa pake.
30 Padatambira vinyu wowawasha muyo, Yesu adati: “Nakwanirisa chifuniro chanu!” Ndipo adajolimisa msolo nkumalizika.*
31 Pakuti yenze Ntsiku Yokonzekera, Ayuda alibe kufuna kuti wanthu wakufa apitirize kukhala pamiti yodzudzikirapo ntsiku ya Satade, (ndawa Satade ya ntsiku mweyi yenze ikulu ndipo iwo adakumbira Pilato kuti awabvumize kuti athyole minyendo ya wanthu omwe adamanikiwa wale nkubulusa mathupi yawo.
32 Pamwapo masocha yale yadabwera nkuthyola minyendo ya munthu woyamba komasoti ya munango ule yemwe adamanikiwa naye pabodzi.
33 Koma padafika pa Yesu, adagumana kuti wafa kale ndipo alibe kumuthyola minyendo.
34 Koma m’bodzi wa masocha mwayo adamulasa na nkondo kumbabvu ndipo nthawe mwiyo padabula magazi na madzi.
35 Munthu yemwe adawona vimwevi, ndiye yemwe wapereka umboni moyu ndipo umboni wake moyu ni chaiwo. Iye ankudziwa kuti anena chaivo, kuti imwembo mukhulupirire.
36 Koma vimwevi vidachitika kuti lemba ikwanirisiwe yomwe inena kuti: “Adzathyolelini* bonzo yake olo ibodzi.”
37 Ndipo lemba inango inena kuti: “Iwo adzanyang’ane kwa munthu yemwe adamulasa.”
38 Pavidachitika vimwevi, Yosefe wa ku Arimateya, yemwe wenze wopfunzira wa Yesu wosadziwonesera ndawa ambagopa Ayuda, adakumbira Pilato kuti akachose thupi ya Yesu ndipo Pilato adamubvumiza. Pamwapo adafika nkuchosa thupi mwiyo.
39 Nikodemo yemwe adabwera kwa iye usiku pakuyamba pale, adabwerambo ali takule mafuta yosanganisa na aloye yopitirira 32 kilogalama.
40 Pamwapo iwo adatenga thupi ya Yesu nkuikulungira na nguwo za maliro zonunkhira mobverana na mwambo womwe Ayuda angachita poikha maliro.
41 Manje kumalo yomwe adamumanikira* kwenze munda ndipo m’munda mumo mwenze manda* yanyowani. Manda mwayo yenze yakanati kuikhiwako munthu.
42 Pakuti yenze ntsiku Yokonzekera Chikondwerero cha Ayuda, ndipo manda mwayo yenze pafupi, iwo adaikha Yesu mumo.
Mawu ya m’nyantsi
^ Panango kuti: “Akhomererewe pa muti! Akhomererewe pa muti!”
^ Panango kuti: “mukamukhomerere.”
^ Panango kuti: “zokukhomerera?”
^ Panango kuti: “akhomererewe.”
^ Onani matanthauzo ya mawu yanango.
^ Onani matanthauzo ya mawu yanango.
^ Onani matanthauzo ya mawu yanango.
^ Panango kuti: “guntchalina.”
^ Panango kuti: “nkupereka moyo wake.”
^ Panango kuti: “adzaphwanyelini.”
^ Panango kuti: “adamukhomerera.”
^ Panango kuti: “manda yachikumbuso.”
