Wonembewa na Yohani 2:1-25
2 Pa ntsiku yachitatu, ku Kana wa ku Galileya kwenze phwando ya ukwati ndipo amayi wake wa Yesu enzembo kumuko.
2 Yesu na wopfunzira wake adachemerewambo ku phwando ya ukwati muyo.
3 Vinyu paudamala, amayi wake wa Yesu adamuuza kuti: “Vinyu wawamalira.”
4 Koma Yesu adauza amayi wake mwawo kuti: “Ko imwepo na inepano tinavo basa yanyi vimwevi? Nthawe yangu ikanati kufika.”
5 Amayi wake mwawo adauza wanthu womwe ambagawa chakudya kuti: “Muchite chirichose chomwe angakuuzeni.”
6 Pamalo mwapo penze mitsuko 6 yokonzewa na minyala mobverana na malamulo ya Ayuda ya kudzichenesa. Mtsuko uliwose umbakwana malitro pafupifupi 44 mpakana 66.
7 Pamwapo Yesu adawauza kuti: “Dzadzani mitsuko mwaya na madzi.” Iwo adadzadzadi mpakana pakamwa.
8 Pamwapo adawauza kuti: “Manje tunganimo pang’ono mukapereke kwa wonyang’anira phwando mweyi.” Iwo adakaperekadi.
9 Wonyang’anira phwando ule adalawa madzi mwayo yomwe yadasandusiwa vinyu. Pakuti alibe kudziwa kuti wachokera kuponi (olo kuti wogawa chakudya womwe adatunga madzi mwayo angadziwa), wonyang’anira phwando muyo adachemera mkwati
10 nkumuuza kuti: “Munthu aliyese ayamba wabweresa vinyu wabwino ndipo wanthu akaledzera, abweresa wosakoma. Koma iwepo wasunga vinyu wabwino mpakana nthawe ino.”
11 Yesu adachita vimwevi ku Kana wa ku Galileya ninge chiyambi cha vizindikiro vake. Iye adawonesa ulemerero wake ndipo wopfunzira wake adayamba kumukhulupirira.
12 Pavidachitika vimwevi, Yesu, amayi wake, azibale wake na wopfunzira wake adayenda ku Kaperenao, koma alibe kukhalisako ntsiku zizinji.
13 Manje Pasika wa Ayuda wenze udasala pang’ono kuchitika, pamwapo Yesu adanyamuka nkuyenda ku Yerusalemu.
14 Kumuko adagumana wogulisa ng’ombe, nkhosa na nkhangaiwa komasoti wochinja kobiri ali khale mu kachisi m’mipando yawo.
15 Pamwapo adakonza nshamu wa vingwe,* nkuthamangisa wose womwe enze na nkhosa komasoti ng’ombe mukachisi mumo. Adakhuthula kobiri za wanthu wochinja kobiri nkugadabula mameza yawo.
16 Patsogolo pake adauza wogulisa nkhangaiwa wale kuti: “Chosani ivi muno! Musiyiretu kusandusa nyumba ya Ababa wangu kukhala nyumba ya malonda!”
17 Wopfunzira wake adakumbukira vomwe Malemba yanena kuti: “Kudzipereka kwangu pa nyumba yanu kudzakhale ninge moto yemwe unkugaka mu ntima mwangu.”
18 Koma Ayuda mwawo adanena kuti: “Utiwonese chizindikiro chiponi chowonesa kuti unaulamuliro wochitira vinthu vimwevi?”
19 Yesu adawadawira kuti: “Gwesani kachisi uyu, ndipo inepano nidzaumange mu ntsiku zitatu.”
20 Manje Ayuda mwawo adanena kuti: “Kachisi muyu udamangiwa kwa magole 46, manje iwepo udzaumange kwa ntsiku zitatu?”
21 Koma iye anganena va kachisi wa thupi yake.
22 Iye padamuka kwa akufa, wopfunzira wake adakumbukira kuti anganena vimwevi, ndipo adakhulupirira malemba komasoti mawu yomwe Yesu adanena.
23 Manje ali mu Yerusalemu pa chikondwerero cha Pasika, wanthu azinji adamukhulupirira padawona vizindikiro vomwe angachita.
24 Koma Yesu angawakhulupiriralini maninge ndawa angawadziwa wose mwawo,
25 ndipo ambafunikalini munango kuti amuuze vochitika va munthu, ndawa iye ambadziwa vomwe viri mu ntima mwa munthu.
Mawu ya m’nyantsi
^ Panango kuti: “swepu.”
