Wonembewa na Yohani 21:1-25
21 Vimwevi pavidamala, Yesu adawonekera pomwe kwa opfunzira mwawo ku nyanja ya Tiberiyo. Iye adawonekera tene.
2 Simoni Petulo, Thomasi (yemwe ambachemerewa pomwe kuti Didimo), Natanayeli wa ku Kana wa ku Galileya, wana wa Zebedayo na opfunzira wake anango awiri wose mwawa enze pabodzi.
3 Manje Simoni Petulo adati: “Ine ninkuyenda kukapha ntsomba.” Anango walembo adati: “Isembo tiyende nawe.” Iwo adayendadi nkukwera barko koma usiku muyo alibe kuphako olo ntsomba ibodzi.
4 Koma pakumbachena, Yesu adaimirira m’mbali mwa nyanja, koma opfunzira mwawo alibe kuzindikira kuti wenze Yesu.
5 Patsogolo pake Yesu adati: “Wanamwe, ko munachakudya chilichose? Iwo adamudawira kuti: “Neye!”
6 Iye adawauza kuti: “Thusani kombe kumbali ya djanja ya kumakulu kwa barko mwiyo ndipo mukwanise kuphata ntsomba.” Pamwapo iwo adathusadi kombe muyo, koma alibe kukwanisa pomwe kuukwewa kuti auyikhe m’barko ndawa ya kuwanda kwa ntsomba.
7 Pavidateno, wopfunzira yemwe Yesu ambamukonda maninge ule adauza Petulo kuti: “Mwawa ni Ambuya.” Simoni Petulo padabva kuti ni Ambuya, adavala malaya yake yakunja ndawa wenze pezi* ndipo adamogera mu nyanja.
8 Koma opfunzira anango wale adabwera m’barko ankukwewa kombe wodzala na ntsomba ndawa enzelini patali maninge na kuntunthu. Enze pa nsenga wothamingira mametro 90 basi.
9 Padafika kuntunthu, adaona moto wamasimbe ndipo penze ntsomba komasoti adaona nkate.
10 Yesu adawauza kuti: “Bweresankoni ntsomba zinango zomwe mwapha.”
11 Pamwapo Simoni Petulo adangena m’barko mwiyo nkukwewera kuntunthu kombe wodzala na ntsomba zikuluzikulu zokwana 153. Koma podiya kuti mwenze ntsomba zizinji tene, kombe muyo ulibe kung’ambika.
12 Yesu adawauza kuti: “Bwerani mudzadye matabitchu.”* Palibe olo m’bodzi pa opfunzira mwawo yemwe adalimba ntima nkumubvunza kuti: “Ndimwe mbani?” ndawa ambadziwa kuti ni Ambuya.
13 Yesu adayenda kukatenga nkate nkuwagawira ndipo adachita pomwe chibodzibodzi na ntsomba.
14 Kamwaka kenze kachitatu kuti Yesu awonekere kwa opfunzira wake mwawo kuchokera pomwe adamukisiwa kwa wakufa.
15 Padamaliza kudya matabitchu, Yesu adabvunza Simoni Petulo kuti: “Simoni mwana wa Yohani, ko unikonda ine kuposha ntsomba izi?” Iye adamudawira kuti: “Inde Ambuya, imwepo munkudziwa bwinobwino kuti nikukondani maninge.” Iye adamuuza kuti: “Dyesa wana wangu wa nkhosa.”
16 Patsogolo pake adamubvunza pomwe kachiwiri kuti: “Simoni mwana wa Yohani, ko inepano unikonda?” Iye adamudawira kuti: “Inde Ambuya, imwepo munkudziwa kuti nikukondani maninge.” Pamwapo adati: “Busa wana wangu wa nkhosa.”
17 Adamubvunza pomwe kachitatu kuti: “Simoni mwana wa Yohani, ko inepano unikonda maninge?” Petulo adawawiwa muntima kuwona kuti ankumubvunza kachitatu kuti: “Ko inepano unikonda maninge?” Pamwapo iye adati: “Ambuya, imwepo mudziwa vinthu vose. Munkudziwa pomwe bwinobwino kuti inepano nikukondani maninge.” Yesu adamuuza kuti: “Dyesa wana wangu wankhosa.
18 Shuwa ninkukuuza iwe, pewenze mulumbwana, umbavala wekha nkuyenda komwe ukufuna. Koma ukadzakalamba, udzapfuthule manja yako ndipo munthu munango adzakuvazike ndipo adzakutakule nkuyenda nawe komwe iwepo unkufunalini.”
19 Adanena vimwevi pakufuna kuwonesa impfa yomwe adzalemekeze nayo Mulungu. Padanena vimwevi adamuuza kuti: “Pitiriza kunilondola.”
20 Petulo adachungunuka nkuwona wopfunzira yemwe Yesu ambamukonda ule ankuwalondola. Wopfunzira moyu ni ule yemwe pa chakudya cha maulo chile adatsamira pachifuwa cha Yesu nkumubvunza kuti: “Ambuya, ni mbani yemwe ankufuna kukuperekani?”
21 Manje Petulo padawona wopfunzira moyu, adabvunza Yesu kuti: “Ambuya, manje uyu adzachite chani?”
22 Yesu adati: “Inepano nichifuna kuti moyu apitirize kukhala na moyo mpakana inepano nidzabwere, ko iwepo unavo basa yanyi? Iwepo undopitiriza kunilondola.”
23 Manje vidabveka pakati pa abale kuti wopfunzira moyu adzamwalirelini. Koma Yesu alibe kumuuza kuti adzamwalirelini, koma adanena kuti: “Inepano nichifuna kuti iye apitirize kukhala na moyo mpakana inepano nidzabwere, ko iwepo unavo basa yanyi?”
24 Wopfunzira moyu ndiye ankuchitira umboni vinthu vimwevi. Iye ndiye pomwe adanemba vinthu vimwevi ndipo tinkudziwa kuti umboni womwe ankupereka ni chaiwo.
25 Pali vinthu vinango pomwe vizinji vomwe Yesu adachita. Nikuganiza kuti adakati vose vidanembewa, mipukutu yonembewa mwayo yadakakwanalini padziko ino.
Mawu ya m’nyantsi
^ Panango kuti: “na chovala chankati chokha.”
^ Panango kuti: “chakudya cha kumachibese.”
