Wonembewa na Yohani 4:1-54
4 Ambuya padazindikira kuti Afalisi adabva kuti iye ankupfunzisa wanthu azinji kuti akhale wopfunzira wake komasoti kuwabatiza kuposha Yohani,
2 podiya kuti wenzelini Yesu chaiye yemwe angawabatiza koma wopfunzira wake,
3 adachoka ku Yudeya nkuyenda soti ku Galileya.
4 Koma ambafunika kuti apite na ku Samariya.
5 Pamwapo adafika ku thaundi ya Samariya yochemerewa kuti Sukari, pafupi na munda womwe Yakobo adapasa mwana wake Yosefe.
6 Ndipo kumuko kwenze nchera wa Yakobo. Manje Yesu padaneta na ulendo muyo, adakhala pasi pa nchera mwapo. Nthawe yenze cha m’ma 12 ora.
7 Manje mayi munango wa ku Samariya adafika kudzatapa madzi. Yesu adakumbira mayi muyo kuti: “Nipasenkoni madzi yakumwa mayi.”
8 (Wopfunzira wake enze adangena mu thaundi kukagula chakudya.)
9 Manje mayi wa ku Samariya muyo adabvunza Yesu kuti: “Pakuti imwepo ndimwe wa ku Yuda, vakhala tani kukumbira madzi yakumwa kwa inepano, mayi wa ku Samariya?” (Ndawa wanthu wa ku Yuda na wa ku Samariya abveranalini.)
10 Yesu pakudawira adauza mayi muyo kuti: “Mudakadziwa va mphaso ya fovolo ya Mulungu komasoti yemwe ankukuuzani kuti, nipasenkoni madzi yakumwa,’ mudakamukumbira iye ndipo adakakupasani madzi ya moyo.”
11 Mayi muyo adamuuza kuti: “Amuna imwe mulibe na chotapira madzi ndipo nchera uyu ni wonoka. Manje madzi ya moyo mwayo mwayatenga kuponi?
12 Ko ndimwe nkulu kuposha m’bereki wathu Yakobo, yemwe adatipasa nchera muyu yemwe iye, wana wake na ng’ombe zake angamwa?”
13 Yesu pakudawira, adamuuza kuti: “Aliyese yemwe wamwa madzi mwaya adzabve pomwe nyota.
14 Koma yemwe adzamwe madzi yomwe inepano nidzamupase adzabvelini pomwe nyota. Madzi mwayo yomwe nidzamupase yadzasanduke nyenje ya madzi yomwe yankubula mwa iye nkumupasa moyo wosapera.”
15 Mayi muyo adauza Yesu kuti: “Nipaseni madzi mwayo, kuti osati nidzabve pomwe nyota komasoti kuti osati nidzabwere pomwe kuno kudzatapa madzi.”
16 Iye adauza mayi muyo kuti: “Yendani, mukachemere mwamuna wanu abwere kuno.”
17 Mayi muyo adadawira kuti: “Nilibe mwamuna.” Yesu adamuuza kuti: “Mwadawira bwino pakufotokoza kuti: ‘Nilibe mwamuna.’
18 Ndawa mwalowodwapo na amuna 5, ndipo mwamuna yemwe munaye manjeuno ni mwamuna wanulini. Pamwapa mwanenadi chaivo.”
19 Mayi muyo adamuuza kuti: “Nazindikira kuti ndimwe mneneri.
20 Azibereki wathu angapemphera mu phiri iyi, koma wanthu imwe munena kuti malo yomwe wanthu afunika kutumikirirako Mulungu yali ku Yerusalemu.”
21 Yesu adauza mayi muyo kuti: “Shuwa ninkukuuzani mayi, nthawe idzafike pomwe imwepo mudzatumikirelini Ababa mu phiri mwiyi panango mu Yerusalemu.”
22 Imwepo mutumikira chomwe muchidziwalini. Ise titumikira chomwe tichidziwa, ndawa chipulumuso chikuyambira kwa Ayuda.
23 Koma nthawe idzafike, ndipo ni mwainoletu, pomwe atumiki chaiwo adzatumikire Ababa motsogolerewa na mzimu na choonadi, ndawa Ababa akufuna wanthu ninge mwawo ambamutumikire.
24 Mulungu ni Mzimu, ndipo omwe ankumutumikira afunika kumutumikira motsogolerewa na mzimu komasoti choonadi.”
25 Mayi muyo adanena kuti: “Ninkudziwa kuti Mesiya ankubwera, yemwe adziwika pomwe kuti Khrisitu. Muyo akadzabwera, adzatifotokozere vose pachena.”
26 Yesu adamuuza kuti: “Munthu muyo ndinepanoletu, yemwe ninkuyankhula namwe.”
27 Pa nthawe mwiyo wopfunzira wake adafika, ndipo adadabwa ndawa ambayankhula na munthu wachikazi. Koma palibe yemwe adanena kuti: “Mukufuna chani kwa iye?” Panango kuti: “Ndawa chani munkuyankhula na mayi muyu?”
28 Pamwapo mayi ule adasiya mtsuko wake wa madzi nkukangena mu thaundi ndipo adauza wanthu kuti:
29 “Naboni mukaone munthu yemwe waniuza vose vomwe nakhala ninkuchita. Ko moyu ni Khrisitulini ule?”
30 Iwo adabula mu thaundi mwiyo nkuyenda komwe kwenze Yesu.
31 Panthawe mwiyi nkuti wopfunzira wake ankumukumbira kuti: “Mpfunzisi,* dyani.”
32 Koma iye adawauza kuti: “Niri na chakudya chomwe imwepo mukuchidziwalini.”
33 Pamwapo wopfunzira mwawo adayamba kubvunzana kuti: “Ko panango alipo yemwe wamubweresera chakudya?”
34 Yesu adawauza kuti: “Chakudya changu ni kuchita vofuna va yemwe adanituma na kumaliza basa yake.
35 Ko imwepo munenalini kuti kwasala minyezi 4 kuti tiyambe kukolola? Koma ine ninkukuuzani kuti: Kwizani maso yanu muwone m’maminda. Muwone kuti mbewu zakhuma kale ndipo ni mofunika kukolola. Mwakuti manje
36 wokolola akutambira malipiro ndipo akuunganiza vipaso ku moyo wosapera, kuti wobzala mbewu na wokolola akondwere pabodzi.
37 Ndipomwapa mawu yakuti: Munango ni wobzala ndipo munango ni wokolola, ni yazedi.
38 Ine nakutumizani kukakolola vomwe mulibe kuchosera kaluma. Anango adaphata basa mwakhama ndipo imwepo munkuphindula na basa yomwe iwo adaphata.”
39 Asamariya azinji wochokera mu thaundi mwiyo adamukhulupirira ndawa ya mawu ya mayi ule. Mayi muyo adachitira umboni kuti: “Moyu waniuza vinthu vose vomwe nakhala ninkuchita.”
40 Manje Asamariya mwawo padafika kwa iye, adamukumbira kuti apitirize kukhala nawo, ndipo adakhala kumuko ntsiku ziwiri.
41 Vimwevi, vidachitisa kuti wanthu azinji amukhulupirire ndawa ya vomwe iye adanena,
42 ndipo adauza mayi ule kuti: “Sikuti tinkukhulupirira ndawa ya mawu yako yokha yale neye, ndawa tadzibvera tekha ndipo tinkudziwa kuti munthu moyu ni mpulumusidi wadziko.”
43 Ntsiku ziwiri mwizo pazidamala, iye adachoka kumuko nkuyenda ku Galileya.
44 Yesu munikachiro adachitira umboni kuti mneneri alemekezewalini kwawo.
45 Manje padafika ku Galileya, wanthu wa ku Galileya muko adamutambira, ndawa enze adaona vose vomwe adachita pa chikondwerero ku Yerusalemu, pakuti nawombo adayenda ku chikondwerero muko.
46 Patsogolo pake adafika pomwe ku Kana wa ku Galileya, kule komwe adasandusa madzi kukhala vinyu. Manje kumuku kwenze munthu munango yemwe ambatumikira mpfumu, yemwe mwana wake mwamuna angadwala ku Kaperenao.
47 Munthu muyu padabva kuti Yesu wafika ku Galileya kuchokera ku Yudeya, adayenda kwa iye kukamukumbira kuti ayende ku Kaperenao nkukamupolesera mwana wake ndawa wenze adasala pang’ono kumwalira.
48 Koma Yesu adamuuza kuti: “Wanthu imwe mungakhulupirilelini olo pang’ono pokhapokha muchiti mwawona vizindikiro na vodabwisa.”
49 Wotumikira mpfumu ule adamuuza kuti: “Ambuya, naboni mwana wangu akanati wafa.”
50 Yesu adamuuza kuti: “Yenda, mwana wako anamoyo.” Munthu muyo adakhulupirira mawu yomwe Yesu adamuuza ndipo adayendadi.
51 Koma ali munjira, akapolo wake adamuchunguzira kudzamuuza kuti mulumbwana wake anamoyo.
52 Pamwapo iye adawabvunza nthawe yomwe adapola. Iwo adadawira kuti: “Adapola dzulo cha m’ma 13 ora.”
53 Padauziwa vimwevi, baba ule adadziwa kuti yenze nthawe mwiyoletu yomwe Yesu adamuuza kuti: “Mwana wako anamoyo.” Pamwapo iye na wanthu wose wa m’banja mwake adakhulupirira.
54 Chimwechi chenze chizindikiro chachiwiri chomwe Yesu adachita padachoka ku Yudeya nkuyenda ku Galileya.
Mawu ya m’nyantsi
^ Panango kuti: “Rabi.”
